telangana

కాంగ్రెస్‌కు 75 నుంచి 80 సీట్లు

Updated By ManamWed, 08/15/2018 - 17:35
  • కేసీఆర్ చెబుతున్నవన్నీ అబద్ధాలే

  • సెప్టెంబర్‌లో అభ్యర్థుల ప్రకటన

  • పొత్తులపై సీనియర్లతో చర్చించాకే నిర్ణయం

Uttam Kumar Reddy

హైదరాబాద్ : రాష్ట్ర అభివృద్ధి గురించి ముఖ్యమంత్రి కేసీఆర్ చెబుతున్నవన్నీ అబద్ధాలేనని తెలంగాణ పీసీసీ అధ్యక్షుడు ఉత్తమ్‌కుమార్ రెడ్డి అన్నారు. ఏఐసీసీ అధ్యక్షుడు రాహుల్ గాంధీ పర్యటనతో పార్టీలో కొత్త ఉత్సాహంతో పాటు తమలో ఐక్యత పెంచిందన్నారు. వచ్చే ఎన్నికల్లో కాంగ్రెస్ పార్టీకి 75 నుంచి 80  సీట్లు ఖాయమని ఆయన ధీమా వ్యక్తం చేశారు.  కాంగ్రెస్ పార్టీలో భేదాభిప్రాయాలు సహజమని, అవన్నీ త్వరలోనే సర్థుకుపోతాయన్నారు.  

సెప్టెంబర్‌లోనే అభ్యర్థులను ప్రకటిస్తామని, ఇందుకోసం ఓ కమిటీని ఏర్పాటు చేయనున్నట్లు తెలిపారు. దానికోసం కసరత్తు ప్రారంభమైందన్నారు. అలాగే పొత్తులపై ఇంకా ఎలాంటి నిర్ణయం తీసుకోలేదని, సీనియర్లతో చర్చించిన తర్వాతే నిర్ణయం తీసుకుంటామని ఉత్తమ్ కుమార్ రెడ్డి తెలిపారు. రాష్ట్రంలో కాంగ్రెస్ పార్టీ పనితీరుపై రాహుల్ సంతృప్తి వ్యక్తం చేశారన్నారు. మరో రెండు, మూడు రోజుల్లో కాంగ్రెస్ బస్సుయాత్ర ప్రారంభిస్తామని పేర్కొన్నారు.



‘కంటివెలుగు’ ప్రారంభించిన కేసీఆర్

Updated By ManamWed, 08/15/2018 - 16:05
CM KCR

హైదరాబాద్:  తెలంగాణ ప్రభుత్వం ప్రతిష్టాత్మకం చేపట్టిన ‘కంటివెలుగు’ పథకాన్ని ముఖ్యమంత్రి కేసీఆర్ బుధవారం తూప్రాన్ మండలం మల్కాపూర్ మల్కాపూర్‌లో ప్రారంభించారు. అనంతరం కంటి వెలుగు శిబిరాన్ని పరిశీలించిన ఆయన... ఓ మహిళకు కంటి అద్దాలు అందచేశారు. ఈ సందర్భంగా ఏర్పాటు చేసిన సభలో సీఎం కేసీఆర్ మాట్లాడుతూ... మల్కాపూర్ నుంచి కంటివెలుగు పథకాన్ని ప్రారంభించడం సంతోషంగా ఉంది. తెలంగాణవ్యాప్తంగా ఈ పథకాన్ని అమలు చేస్తాం. రాష్ట్రవ్యాప్తంగా 3కోట్ల 70లక్షల మందికి కంటి పరీక్షలు నిర్వహిస్తాం.

దేశంలో ఎక్కడా లేనివిధంగా కంటి వెలుగు పథకాన్ని ప్రారంభించాం. అవసరం అయినవారికి  కాటరాక్ట్ శస్త్రచికిత్సలు కూడా ఉచితంగా నిర్వహిస్తాం. ఇప్పటికే 40 లక్షల మంది కంటి అద్దాలు తీసుకు వచ్చాం. 825 బృందాలు రాష్ట్రం మొత్తం ఉచితంగా కంటి పరీక్షలు నిర్వహిస్తున్నాయి. ఈ అవకాశాన్ని ప్రజలంతా సద్వినియోగం చేసుకోవాలి’ అని తెలిపారు. మనదేశంలో ఆడ,మగ వివక్ష ఎక్కువగా ఉంది. మహిళలు అన్నిరంగాల్లో రాణిస్తున్నారు. అవకాశం వస్తే మహిళలు కూడా అద్భుతాలు సృష్టిస్తారు.

ఈ సందర్భంగా ముఖ్యమంత్రి కేసీఆర్ మల్కాపూర్ గ్రామానికి వరాల జల్లు కురిపించారు. గ్రామాభివృద్ధికి ఆరుకోట్ల రూపాయలు నిధులు మంజూరు చేశారు. అంతేకాకుండా వచ్చే జూన్ కల్లా గ్రామానికి గోదావరి నీళ్లని అందిస్తామని హామీ ఇచ్చారు. అలాగే తెలంగాణ వ్యాప్తంగా అండర్ గ్రౌండ్ డ్రైనేజీ వ్యవస్థను తీసుకు వచ్చేందుకు ప్రయత్నిస్తున్నట్లు చెప్పారు. దీపావళిలోగా రాష్ట్రంలోని అన్ని ఇళ్లకు మిషన్ భగీరథ నీళ్లు అందిస్తామన్నారు. ప్రభుత్వం సాగునీటి ప్రాజెక్టులపై 60కోట్లు ఖర్చు చేస్తుందని తెలిపారు.



రాహుల్‌తో రాజకీయాలు మారేనా!

Updated By ManamWed, 08/15/2018 - 02:17

rahul gandhiతెలంగాణలో కాంగ్రెస్‌పార్టీ జాతీయ అధ్యక్షులు రాహుల్ గాంధీ రెండు రోజుల పర్యటించిన నేపథ్యంలో రాష్ట్ర రాజకీయాలు వేడె క్కాయి. రాహుల్ పర్యటనను విజయవంతం చేసేందుకు రాష్ట్ర నాయకత్వం కసరత్తు చేసింది. బహిరంగ సభల నిర్వహణతో పాటు విద్యార్థి, యువజన, మహిళా సంఘాలు, కార్మిక కర్షక మేధావి వర్గాలతో భేటీ కార్యక్రమాలు నిర్వహించింది. ఎన్నికలు సమీపిస్తున్న వేళ రాహుల్ పర్యటనతో పార్టీ బలపడగలదని రాష్ట్ర నాయకత్వం ఆశిస్తోంది.

అయితే రాహుల్ రాకతో పార్టీలో ఉన్న అంతర్గత విభేధాలు వీడుతాయా! తెలంగాణ రాష్ట్ర సమితిని గద్దె దించేందుకు ఏ పార్టీతోనైనా పొత్తుకు సిద్ధమని రాష్ట్ర నేతలు ఇప్పటికే స్పష్టతనిచ్చారు. కాంగ్రెస్‌పార్టీకి అన్ని అనుకూలిస్తే నిజంగా అధికార పార్టీని నిలువరించే అవకాశం ఉందా! ఉంటే కాంగ్రెస్ పార్టీ ఏఏ పార్టీలతో కలిసి పోటీ చేయనుంది? అదే జరిగితే కాంగ్రెస్‌పార్టీ తన అస్థిత్వం కూడా కోల్పోయే ప్రమాదమూ ఉంది. నాలుగేళ్ళ పాటు అధికారం కోల్పోయిన కాంగ్రెస్‌పార్టీ తన సిద్ధాంతాలు పక్కనపెట్టి అటు జాతీయస్థాయిలో, రాష్ట్ర స్థాయిలో అధికారం చేజిక్కుంచుకునే లక్ష్యంగా ముందుకు సాగుతున్నట్లు కనబడుతోంది.

2014 సార్వత్రిక ఎన్నికల్లో 44 సీట్లకే పరిమితమై కొంత స్తబ్దతలో ఉన్న కాంగ్రెస్‌పార్టీ, రాహుల్ గాంధీ పగ్గాలు చేపట్టాక పార్టీకి కొత్త ఊపు వచ్చింది. ప్రధానంగా మోదీ సర్కారుపై ఉన్న ప్రజావ్యతిరేకతతో పాటు నిమ్న వర్గాలు, మహిళలపై జరుగుతున్న అఘాయిత్యాలు కాంగ్రెస్ పార్టీకి ప్రజల పక్షాన మాట్లాడే అవకాశాలు కల్పిస్తున్నాయి. ఆ అవకాశాలను అంది పుచ్చుకొని యూపీఎ భాగస్వామ్య పార్టీలతో జతకట్టి 2019 ఎన్నికల్లో భారతీయ జనతా పార్టీని ఒడించేందుకు మందుకు సాగుతూ, అదే రీతిలో తెలంగాణ సర్కారుపై గురిపెట్టింది.

రాష్ట్రంలో కాంగ్రెస్‌పార్టీ అధికార పార్టీ అవినీతి అక్రమాలను ఎండగట్టేందుకు ఇటీవల ప్రజా బస్సుయాత్ర చేసింది. దాని ద్వారా ప్రజాబలాన్ని కూడకట్టే ప్రయత్నం చేయబోయింది. కానీ ఆశించిన స్థాయిలో ప్రజామద్దతు లభించకపోవడంతో ఆయా నియోజకవర్గాలల్లో ఉండే ఆశావాదుల సహకారంతో కొన్నిచోట్ల సభలు నిర్వహించారు. కొన్ని సభలల్లో పీసీసీ అధ్యక్షుడి హోదా లో అభ్యర్థలను సైతం ప్రకటించడం వల్ల విభేదాలకు మరింత ఆజ్యం పోసినట్లయింది. అనేకమంది సీనియర్ నేతలు పీసీసీ అధ్యక్షుడిపై ఆధిష్టానికి పిర్యాదు చేశారు. అందువల్ల పలు దఫాలుగా పీసీసీ అధ్యక్షుడు ఉత్తమ్ కుమార్‌రెడ్డికి హైకమాండ్ అపా యింట్ కూడా ఇవ్వలేకపోయింది. అంతేకాదు కాంగ్రెస్‌లో ఒకే సామాజిక వర్గానికి చెందిన నేతల ప్రమేయం ఎక్కుడైయిందనే భావనలో కార్యకర్తలు ఉన్నారు.

గతంలో కాంగ్రెస్ పార్టీకి ఎస్సీ, ఎస్టీ, బీసీ, మైనారిటీ ఓటు బ్యాంకు గంపగుత్తగా ఉండేది. దాని వల్ల పార్టీ అనేకసార్లు అధికారంలోకి రాగలిగింది. అయితే రాను రాను పార్టీలో ఎస్సీ, ఎస్టీ, బీసీ, మైనారిటీ వర్గాలకు చెందిన వారికి ప్రాధాన్యత తగ్గుతూ వస్తుందని చెప్పవచు. బస్సు యాత్రలో ఎక్కడ కూడా ఎస్సీ వర్గానికి చెందిన మల్లు, భట్టి విక్రమార్క గానీ, దామోదర రాజనరసింహ అలాగే బీసీ వర్గానికి చెందిన పొన్నాల లక్ష్మయ్య లాంటి వారిని పక్కన పెట్టిన సంద ర్భాలు ఉన్నాయి. దాని కారణంగానే దానం నాగేందర్ లాంటి సీనియర్ నేత పార్టీని విడారని చెప్పవచ్చు. ఇదిలా ఉంటే శాసన సభ సభ్యత్వాలు కోల్పోయిన సంపత్‌కుమార్, కొమటిరెడ్డి వెంకటరెడ్డి విషయంలో కూడా పార్టీ నాయకత్వం సరైన రీతిలో పోరాటం చేయలేకపోయిందనే విమర్మలను పార్టీ పెద్దల సైతం అంగీకరించారు.

కాంగ్రెస్‌లో చేరిన రేవంత్‌రెడ్డి కాబోయే ముఖ్యమంత్రిని నేనే నంటూ పార్టీలో కలకలం సృష్టించారు. కాంగ్రెస్ ప్రజాస్వామిక పార్టీ కనుక తామేమీ తక్కువ కాదని ముఖ్యమంత్రికి కావల్సిన అర్హతలు తమకూ ఉన్నాయంటూ జానారెడ్డి, కోమటి రెడ్డి వెంకట రెడ్డి లాంటి వారు ముందుకొస్తున్నారు. దళితుడ్ని ముఖ్య మంత్రిని చేస్తానని కేసీఆర్ మోసం చేశారని పదేపదే విమర్శించే కాంగ్రెస్‌కు కాబోయే ముఖ్యమంత్రి విషయం వరిస్తుందో లేదో  ఆ నాయకులు ఆలోచించాల్సి ఉంది. 

సరిగ్గా గత ఏడాది క్రితం సంగారెడ్డి బహిరంగ సభలో రాహుల్‌గాంధీ తెలంగాణ రాష్ట్ర సమితిపై రెండు ప్రధాన అంశా లను లేవనెత్తారు. ఒకటి తెలంగాణ యువతను ఉద్యోగ అవకాశాల పేరుతో మోసం చేసిందని, రెండోది రైతాంగానికి అన్యాయం చేస్తున్నందుకు టీఆర్‌ఎస్ పార్టీని ఒడించాలని పిలుపు నిచ్చారు. అయితే ఈ రెండు అంశాలను పరిశీలించినప్పుడు తెలంగాణ రాష్ట్ర సమితి అనేక ప్రజాసంక్షేమ కార్యక్రమాలు అమలు చేస్తున్నది. ముఖ్యంగా ఆసరా పెన్షన్స్ ద్వారా 39,43, 565 మందికి ఆర్థికంగా ఆసరావుతోంది.

ఎస్సీ, ఎస్టీ, బీసీ, మైనారిటీ విద్యార్థులకు నాణ్యమైన విద్యను అందిస్తున్నామని అధికార వర్గాలు పేర్కొంటున్నాయి. అలాగే ఉద్యోగ అవకాశాల్లో ఇప్పటివరకు 27,660 ఉద్యోగాలు భర్తీ చేశామని, మరో 26,806 పోస్టులు భర్తీ ప్రక్రియలో కొనసాగు తున్నాయని అలాగే 48,070 ఉద్యోగాల కోసం త్వరలోనే నోటిఫికేషన్స్ ఇస్తామని అధికార పార్టీ పేర్కొంటోంది. అదేవిధంగా అంగన్‌వాడి కార్యకర్తలకు, ఆశా వర్కర్లకు, వీఆర్‌ఎ, వీఆర్‌ఓ, కాంట్రాక్ట్ లెక్చరర్స్, పారిశుద్ధ కార్మికులు, ఫీల్డ్ అసిస్టెంట్స్, ఔట్‌సోర్సింగ్ ఉద్యోగస్తులకు భారీ స్థాయిలో జీతాలు సైతం పెంచామని చెప్పుకుంటున్నారు.

అదే రీతిన రెండవ అంశం రైతాంగ విషయానికి వచ్చినప్పుడు రాష్ట్రం లో 24 గంటల ఉచిత విద్యుత్ సౌకర్యం అందిస్తూ సుమారు 57.49 లక్షల మంది రైతులకు పంట సహాయం కింద ఎకరానికి 8 వేలు చెల్లిస్తున్నామని అంటున్నారు. అలాగే రైతంగానికి ఉచిత బీమా 5 లక్ష రూపాయలు ఇవ్వడం ద్వారా సుమారు 900 కోట్లు ఖర్చు చేయబోతున్నామని అధికారపార్టీ చెబుతోంది. అలాగే కాంగ్రెస్ నాయకులు చెప్పుతున్నట్లు భారీ నీటిపారుదల రంగం లో ఎక్కడా అవినీతి జరగలేదని టీఆర్‌ఎస్ అంటోంది. గతంలో కాంగ్రెస్ హయాంలో నిర్మించిన నాగార్జున సాగర్ ప్రాజెక్ట్ నిర్మాణ అంచనా 122 కోట్లు కాగా పూర్తయ్యే నాటికి 1183 కోట్లయిందని, అలాగే శ్రీరాంసాగర్ ప్రాజెక్టు నిర్మాణదశలో 40కోట్లతో అంచనా వేయగా పని పూర్తయ్యే నాటికి 4300 కోట్లు అయ్యిందని అధికార పార్టీ చెబుతోంది. ఏదేమైనప్పటికీ తెలంగాణ రాష్ట్ర సమితిని ఒడించే లక్ష్యంతో కాంగ్రెస్ పావులు కదుపుతోంది. అందులో భాగంగా తెలుగు దేశంతో పొత్తులుంటాయనే సంకేతాలను పీసీసీ వర్గాలు సైతం అంగీకరిస్తున్నాయి.

ఒక జాతీయపార్టీగా 2014లో జరి గిన అసెంబ్లీ ఎన్నికల్లో కాంగ్రెస్‌కు చెందిన అభ్యర్థులు టీఆర్‌ఎస్ అభ్యర్థులతో పోటిపడి సుమారు 50 స్థానాల్లో ద్వితీయ స్థానంలో నిలిచారు. రానున్న ఎన్నికల్లో ప్రజా సంక్షేమ కార్యక్ర మాలే ఎజెండాగా టీఆర్‌ఎస్ ప్రజల్లోకెళ్లే అవకాశం ఉం ది. ఎలాగైనా 50-60 స్థానాలు సాధిస్తామనే నమ్మకంతో నాయకత్వం ఉంది. ఇక ఎంఐఎం పార్టీ 7 స్థానాలు ఖచ్చితంగా గెలుస్తుంది.

అలాగే బీజేపీ రెండుమూడు స్థానాలు గెలుచుకోగలదు. ఎంఐఎం ఖచ్చితంగా తెలంగాణ రాష్ట్ర సమితికి మద్దతిచ్చే అవకాశాలు ఎక్కువగా ఉన్నాయి. అలాగే బీజేపీ కూడా బయటి నుంచి మద్దతు పలికే అవకాశం లేక పోలేదు. ఇలాంటి సందర్భాలల్లో ఎటుచూసినా మళ్ళీ తెలంగాణ రాష్ట్ర సమితి అధికారం చేపట్టే మార్గాలున్నాయి. ఈ నేపథ్యంలో రాహుల్‌గాంధీ తెలంగాణలో ఉన్న రాజకీయ సమీకరణలపై ఎలాంటి నిర్ణయాలతో ముందుకు సాగుతారో వేచిచూడాల్సి ఉంది.
 మోటె చిరంజీవి
రాష్ట్ర ప్రధాన కార్యదర్శి
తెలంగాణ గ్రాడ్యుయేట్స్ అసోసియేషన్
 9949194327



భద్రాచలంలో భూకంపం!

Updated By ManamTue, 08/14/2018 - 21:45

earthquake in bhadrachalam

భద్రాద్రి: భద్రాచలం, పాల్వంచలో భూకంపం వచ్చింది. ఉన్నట్టుండి ఒక్కసారిగా భూమి కంపించడంతో ఇళ్లలోని జనాలు బయటికి పరుగులు తీశారు. మూడు నుంచి ఐదు సెకన్లపాటు భూమి కంపించింది. భద్రాద్రిలోని బూర్గంపాడు, సుజాత నగర్, లక్ష్మిదేవిపల్లిలో భూ ప్రకంపనలు వచ్చినట్లు సంబంధిత అధికారులు గుర్తించారు. మంగళవారం రాత్రి 9:40 గంటల ప్రాంతంలో ఈ భూకంపం వచ్చినట్లుగా తెలుస్తోంది. అయితే ప్రాణ, ఆస్తి నష్టం ఎంత వాటిల్లిందనే విషయాలు ఇంత వరకూ తెలియరాలేదు. కాగా ఈ ఘటనకు సంబంధించి మరింత సమాచారం తెలియాల్సి ఉంది.

అయితే.. భద్రాచలంలో 1969 నుంచి ఇప్పటి వరకు చాలా ప్రకంపనలు వచ్చాయి. ఒకసారి పెద్దఎత్తున వస్తే ఆ తర్వాత తరచూ రావడం సహజమే. అయితే అవన్నీ చిన్నపాటివేనని ప్రజలు ఎలాంటి భయాందోళనకు గురికావద్దని అధికారులు చెబుతున్నారు. దక్షిణాదిలో అత్యధిక భూకంపాలు తెలుగు రాష్ట్రాల్లోనే నమోదైన విషయం విదితమే.



అక్కడ ఆయన.. ఇక్కడ ఈయన.. ఇద్దరూ ఇద్దరే..!: రాహుల్

Updated By ManamTue, 08/14/2018 - 18:50

Congress Chief Rahul Sensational Comments Modi, Kcr Govt In Telangana Tour

హైదరాబాద్: కాంగ్రెస్ జాతీయాధ్యక్షుడు రాహుల్ గాంధీ తెలంగాణలో పార్టీ సత్తా ఏంటో చూపడానికి మిషన్ తెలంగాణకు  సిద్ధమవుతున్నారు. ఈ క్రమంలో వరుస పర్యటనలతో రాష్ట్రంలో బిజీబిజీగా గడుపుతున్నారు. రెండ్రోజులు తెలంగాణలో పర్యటిస్తున్న ఆయన నిరుద్యోగులు మొదలుకుని మహిళా సంఘాల వరకు అందరితో ప్రత్యేక సమావేశాలు, బహిరంగ సభలు ఏర్పాటు చేసి కేంద్ర, రాష్ట్ర ప్రభుత్వాలపై ధ్వజమెత్తారు. మంగళవారం నాడు నగరంలోని సరూర్‌నగర్‌ స్టేడియంలో పార్టీ శ్రేణులు ఏర్పాటు చేసిన విద్యార్థి-నిరుద్యోగ గర్జన సభ రాహుల్ గాంధీ నిరుద్యోగులను ఉద్దేశించి సుధీర్ఘ ప్రసంగం చేశారు.

మీ పాత్ర ఎనలేనిది..
"
తెలంగాణ ఏర్పాటులో విద్యార్థుల పాత్ర ఎనలేనిది. రాష్ట్రం కోసం అనేక మంది విద్యార్థులు త్యాగాలు చేశారు. నీళ్లు, నిధులు, నియామకాలు నినాదంతో పోరాడారు. రాష్ట్రం వస్తే నీళ్లు, నిధులు, ఉద్యోగాలు వస్తాయని కలలు కన్నారు. ఏ కలలు కోసమైతే పోరాడామో ఆ కలలు నెరవేరలేదు. మన ఉద్యోగాలు మనకు వస్తాయని ఆశపడ్డాం కానీ అమరవీరుల ఆకాంక్షలు నెరవేరలేదు. లక్ష ఉద్యోగాలు ఖాళీగా ఉన్నాయని ఎన్నికల్లో కేసీఆర్ చెప్పారు. నిరుద్యోగులందరికీ ఉద్యోగులిస్తామని హామీ ఇచ్చారు. నాలుగేళ్లలో పదివేల ఉద్యోగ ఖాళీలు కూడా భర్తీ చేయలేదు" అని యువరాజు విమర్శలు గుప్పించారు 

అక్కడ ఆయన.. ఇక్కడ ఈయన దండుకుంటున్నారు..!
"
కేంద్రంలో నరేంద్ర మోదీ.. రాష్ట్రంలో కేసీఆర్ దొందూ దొందే.. ఇద్దరూ దోచుకుంటున్నారు. రాఫెల్ కాంట్రాక్టును ప్రధాని మోదీ తన వాళ్లకు కట్టబెట్టారు. అనుభవం లేని అనిల్ అంబానీకి కాంట్రాక్ట్ ఇచ్చారు. ఫ్రాన్స్ ప్రధాని రాఫెల్ డీల్‌లో ఎలాంటి రహస్యం లేదని  చెప్పారు కానీ రక్షణమంత్రి నిర్మలాసీతారామన్ మాత్రం ఆ ఒప్పందం రహస్యమని పార్లమెంట్‌లో చెప్పారు. ఈ ఒప్పందంతో అనిలిల్ అంబానీకి ప్రధాని మోదీ కోట్ల రూపాయిల గిఫ్ట్ ఇచ్చారు. తెలంగాణలో కూడా రీ డిజైన్ల పేరుతో కేసీఆర్ కోట్లు దండుకుంటున్నారు. రైతుల నుంచి భూములు లాక్కుంటున్నారు. ఢిల్లీలో మోదీ రీ-డిజైన్ చేస్తుంటే.. ఇక్కడ కేసీఆర్ రీ-డిజైన్ చేస్తున్నారు. పాత ప్రాజెక్టుల పేర్లు మార్చి కోట్లు దండుకుంటున్నారు. రీడిజైనింగ్ పేరుతో రూ. 38వేల కోట్ల ప్రాజెక్టు లక్షకోట్లకు చేరింది. ప్రధాని చేసే రీడిజైన్లన్నింటినీ ఇక్కడుండే కేసీఆర్ సమర్థిస్తున్నారు. రూ. 2,500 కోట్ల ఇందిరాసాగర్ ప్రాజెక్టు 12వేల కోట్లకు చేరింది. కేంద్రంలో మోదీ, రాష్ట్రంలో కేసీఆర్ మాయమాటలు చెప్పి జనాలకు మభ్యపెడుతున్నారు. ప్రజలు తమ సమస్యలు చెప్పుకునే అవకాశం లేకుండా చేశారు" అని రాహుల్ చెప్పుకొచ్చారు. 

కేసీఆర్ కుటుంబానికే దక్కుతోంది!!
"
ధర్నా చౌక్‌లను తొలగించి అణచివేతకు గురిచేస్తున్నారు. జంతర్‌మంతర్, ఇందిరాపార్క్‌లో ధర్నాచౌక్‌లు తొలగించారు. రూ. నాలుగు కోట్ల ప్రజల పోరాట ఫలితం ఒక్క కేసీఆర్‌ కుటుంబానికే దక్కుతోంది. దేశంలో ఎక్కడా లేని విధంగా హైదరాబాద్‌లోనే స్కూల్ ఫీజులు అధికంగా ఉన్నాయి. నాలుగేళ్లలో 400 శాతం స్కూల్ ఫీజులు పెరిగాయి. పంటలకు నామమాత్రపు మద్దతు ధర మాత్రమే పెంచారు. దేశవ్యాప్తంగా రూ. 10 వేల కోట్ల మద్దతు ధర పెంచారు. కర్ణాటక ప్రజలకు హామీ ఇచ్చినట్లుగానే 31వేల కోట్ల రుణమాఫీ చేశాం. 140 డాలర్లున్న బ్యారల్ పెట్రోలియం ధర 70 డాలర్లకు తగ్గింది. అయినా మనదేశంలో మాత్రం పెట్రోలు ఎన్నడు తగ్గిన దాఖలాల్లేవ్.. పెరగడమే తప్ప తగ్గిన సందర్భాల్లేవ్" అని కేంద్ర, రాష్ట్ర ప్రభుత్వాలపై రాహుల్ దుమ్మెత్తి పోశారు. 

ఒక్క ప్రశ్నకూ సమాధానం లేదు.. " పార్లమెంట్‌లో నేను అడిగిన ఏ ప్రశ్నకు కూడా మోదీ నుంచి సమాధనం రాలేదు. నా కళ్లలో కళ్లు పెట్టి చూడాలంటే మోదీకి భయమేస్తోంది. నోట్ల రద్దు, జీఎస్టీని కేసీఆర్ చప్పట్లు కొడుతూ స్వాగతించారు. భేటీ బచావో, భేటీ పడావో అని మోదీ చెబుతున్నారు.. కానీ ఎవరినుండి రక్షించాలి? బీజేపీ ఎమ్మెల్యేలు, నేతల నుంచి ఆడపిల్లలను కాపాడుకోవాల్సిన పరిస్థితి వచ్చింది. దేశంలో ఇన్ని అత్యాచారాలు జరుగుతుంటే మోదీ మాత్రం నోరు విప్పడం లేదు. నోట్ల రద్దు, జీఎస్టీతో చిరు వ్యాపారులను కోలుకోలేకుండా చేశారు. కాంగ్రెస్ అధికారంలోకి వచ్చాక చిరు వ్యాపారులకు జీఎస్టీ ఇబ్బందులను తప్పిస్తాం. కాంగ్రెస్ వచ్చాక ఐదు రకాల శ్లాబులు ఉండవు. ఒకే రకమైన జీఎస్టీ ఉంటుంది. ఈ మోదీ ప్రభుత్వం పెట్రోల్ రేట్ల పేరుతో ప్రజల నుంచి ధనాన్ని పెట్టుబడిదారులకు కట్టబెడుతోంది. రాఫెల్ డీల్‌పై ఎప్పుడైనా.. ఎక్కడైనా చర్చించేందుకు మేం సిద్ధంగా ఉన్నాము. ఈ ఒప్పందం ద్వారా లక్ష కోట్ల కుంభకోణం జరిగింది. యూపీఏ హయాంలో రూ. 524 కోట్లతో కొనుగోలు చేయాలని ఉంటే ఒక్కో విమానానికి రూ. 1600 కోట్లు వెచ్చించి మరీ కొనుగోలు చేస్తున్నారు. ఈ రాఫెల్ డీల్ ద్వారా లక్ష ఉద్యోగాలకు గండి కొట్టారు" అని రాహుల్ విమర్శలు గుప్పించారు. 

పారాషూట్‌లో వచ్చే వాళ్లకు టికెట్లివ్వం..!
"
పార్టీ కోసం కష్టపడిన వారికే రానున్న ఎన్నికల్లో టికెట్ల ఇస్తాం.. కానీ పారాషూట్‌లో వచ్చే వారికి టికెట్లు ఇవ్వం. తెలంగాణలోని యువత కాంగ్రెస్ పార్టీలోకి రావాలి. మీ శక్తి, మీ సంపదను రాష్ట్రంలోని ఒక్క కుటుంబం దోచుకుంటోంది. మీ బలం, ప్రజల బలంతో తెలంగాణ అభివృద్ధికి కృషి చేయాలి.  కాంగ్రెస్ అధికారంలోకి వచ్చిన వెంటనే తెలంగాణలోని నిరుద్యోగులందరికీ ఉద్యోగాలిస్తాం. తమ భవిష్యత్ ఏంటని తెలంగాణ యువత ఆందోళనలో ఉంది. అంతేకాదు అతి తక్కువ ధరకే విద్య, వైద్యం అందిస్తాము. కాంగ్రెస్ ప్రభుత్వం ప్రజల ఆకాంక్షల కోసం పనిచేస్తుంది. తెలంగాణలో తప్పకుండా కాంగ్రెస్ ప్రభుత్వం ఏర్పడుతుంది" అని రాహుల్ గాంధీ ఈ సందర్భంగా స్పష్టం చేశారు. ఈ సమావేశానికి మాజీ మంత్రులు, ఎమ్మెల్యేలు, ఎమ్మెల్సీలు, ఎంపీలు తదితరులు హాజరయ్యారు. కాగా ఈ బహిరంగ సభ అనతరం రాహుల్ గాంధీ నగరంలోని శంషాబాద్ విమానాశ్రయానికి చేరుకుని ఢిల్లీకి తిరుగుపయనమయ్యారు.



’అధికారంలోకి వస్తే రూ.3వేల నిరుద్యోగభృతి‘

Updated By ManamTue, 08/14/2018 - 17:26
  • తెలంగాణలో వచ్చేది కాంగ్రెస్ ప్రభుత్వమే...

  • ఎన్నికలు ఎప్పుడైనా కాంగ్రెస్‌దే విజయం

  • కాంగ్రెస్ అధికారంలోకి వస్తే రూ.3వేల నిరుద్యోగ భృతి

హైదరాబాద్: ఎన్నికలు ఎప్పుడు జరిగిన తెలంగాణలో వచ్చేది కాంగ్రెస్ ప్రభుత్వమేనని టీపీసీసీ అధ్యక్షుడు ఉత్తమ్ కుమార్ రెడ్డి ధీమా వ్యక్తం చేశారు. కాంగ్రెస్ విద్యార్థి-నిరుద్యోగ గర్జన సభలో ఆయన మాట్లాడుతూ.. తెలంగాణ రాష్ట్రం ఏర్పడటానికి విద్యార్థులే కీలకం అని అన్నారు. ఎప్పుడు ఎన్నికలు వచ్చినా కాంగ్రెస్‌దే విజయమన్న ఆయన తాము అధికారంలోకి రాగానే నిరుద్యోగులకు నెలకు రూ.3వేల నిరుద్యోగ భృతి ఇస్తామని ప్రకటించారు.  

తమ ప్రభుత్వం ఏర్పడ్డాక సక్రమంగా ఫీజు రీయింబర్స్‌మెంట్ అమలు చేస్తామన్నారు. గతంలో ఫీజు రీయింబర్స్‌మెంట్ సకాలంలో జరిగేవన్నారు. అధికారంలోకి వచ్చిన టీఆర్ఎస్...విద్యార్థులను పట్టించుకోలేదన్నారు. రాష్ట్రం కోసం 12వందల మంది విద్యార్థులు బలిదానం చేసుకున్నారన్నారు. ఇక తెలంగాణ ప్రభుత్వం ఇంటికో ఉద్యోగం కాదు కదా...ఊరుకో ఉద్యోగం కూడా ఇవ్వలేకపోయిందని ఎద్దేవా చేశారు. అదే కేసీఆర్ కుటుంబంలో నలుగురికి ఉద్యోగాలు దొరికాయని విమర్శించారు. 



ఏపీ, తెలంగాణ పోలీసులకు కేంద్ర పతకాలు

Updated By ManamTue, 08/14/2018 - 15:18
AP, Telangana police personnel to receive medals

న్యూఢిల్లీ : స్వాతంత్ర్య దినోత్సవం సందర్భంగా  రాష్ట్రపతి పోలీసు విశిష్ట సేవా పతకాలు, ప్రతిభా, శౌర్య పతకాలను కేంద్ర హోంమంత్రిత్వ శాఖ సోమవారం ప్రకటించింది. ఆంధ్రప్రదేశ్ నుంచి ఇద్దరికి రాష్ట్రపతి పురస్కారాలు, మరో 14మందికి పోలీస్ పతకాలు, అలాగే తెలంగాణ నుంచి ఇద్దరికి రాష్ట్రపతి పురస్కారాలు, మరో 10మందికి ప్రతిభా పురస్కారాలకు ఎంపికయ్యారు.



సెప్టెంబర్‌లో అభ్యర్థులను

Updated By ManamTue, 08/14/2018 - 07:20
  • ఆయన అబద్ధాలు చూసి జనం నవ్వుతున్నరు

  • కాంగ్రెస్, బీజేపీ కూటములకు  ప్రత్యామ్నాయమే ఫెడరల్ ఫ్రంట్

  • అన్ని సర్వేలూ గెలుపు మాదేనని తేల్చాయి

  • పథకాలను ప్రజల్లోకి తీసుకుపోవాలి

  • టీఆర్‌ఎస్ కార్యవర్గంలో అధ్యక్షుడు కేసీఆర్

  • పార్టీ శ్రేణులకు ఎన్నికల దిశానిర్దేశనం

kcrహైదరాబాద్: టీఆర్‌ఎస్ అధ్యక్షడు కేసీఆర్ ఎన్నికల దూకుడు పెంచారు. సెప్టెంబరు నెలలోనే అభ్యర్థులను ప్రకటిస్తామని తెలిపారు. తెలంగాణ భవన్‌లో సోమవారం గులాబీ పార్టీ రాష్ట్ర కార్యవర్గ సమావేశం జరిగింది. అనంతరం కేసీఆర్ మీడియాతో మాట్లాడారు. సెప్టెంబరు 2వ తేదీ న హైదరాబాద్‌లో ప్రగతి నివేదన సభ పేరు తో భారీ బహిరంగ సభ ఏర్పాటు చేయనున్నట్లు కేసీఆర్ మీడియాతో చెప్పారు. పార్టీ శ్రేణులను ఎన్నికలకు సిద్ధం చేస్తున్నట్లు వెల్లడించారు. ఎన్నికల్లో గెలుపు కోసం కేసీఆర్ పక్కా ప్రణాళికతోనే నేటి కార్యవర్గ సమావేశాన్ని పెట్టినట్లు భావిస్తున్నారు. దీనితో సెప్టెంబరు నుంచే తెలంగాణ రాజకీయాల్లో కీలక మలుపులు చోటు చేసుకుంటాయని సమాచారం. అంతేకాదు ఆయన ప్రకటించిన విషయాలను బట్టి చూస్తే ముందస్తు ఎన్నికలకు కూడా ఫుల్‌స్టాప్ పెట్టినట్లు తెలుస్తోంది. ఒక పక్క రాహుల్ సభతో కాంగ్రెస్ బిజీగా ఉన్న వేళ, కేసీఆర్ అభ్యర్థుల ప్రకటనను చేయడం, కార్యవర్గ సమావేశం నిర్వహించడం ఆయన మార్కు దూకుడు రాజకీయానికి నిదర్శమని వ్యాఖ్యానిస్తున్న పరిశీలకులు ఇక రాష్ట్రంలో ఎన్నికల వాతావరణం వచ్చేసినట్లేనన్నాను. అంతేకాదు, ప్రస్తుత ప్రకటనతో ప్రత్యర్థి పార్టీల్లో గందరగోళం మొదలైందని కూడా అంటున్నారు. ఈ భారీ బహిరంగసభ ద్వారా తమ నాలుగేళ్లలో జరిగిన ప్రగతిని ప్రజలకు తెలియచేస్తామని స్పష్టంచేశారు. ఈమేరకు పార్టీ సమావేశంలో నిర్ణయం తీసుకున్నట్లు చెప్పారు. మరొక పెద్ద నిర్ణయాన్ని కూడా కేసీఆర్ ప్రకటించారు. సెప్టెంబరు 2న ప్రగతి సభ అయిపోగానే అదే నెలలో టీఆర్‌ఎస్ అభ్యర్థులను కూడా ప్రకటిస్తామని స్పష్టం చేశారు. అభ్యర్థుల ఎంపిక నిర్ణయాన్ని సమావేశంలో పార్టీ అధినేతకు అప్పగిస్తూ నిర్ణయం తీసుకుందని తెలిపారు. అభ్యర్థుల ఎంపిక కోసం పార్టీ నేత కేశవరావు నేతృత్వంలో స్క్రీనింగ్ కమిటీని ఏర్పాటు చేశామన్నారు. ప్రతి మూడు నియోజకవర్గాలకు ఒక కార్యదర్శి ఈ వ్యవహారంలో పాలుపంచుకుంటారన్నారు. పార్టీ కార్యదర్శులంతా ఇక నుంచి అత్యంత చురుకుగా ఉండాలని, యాక్టివ్ కావాలని ఆదేశాలిస్తున్నట్లు కేసీఆర్ చెప్పారు. పనిలో పనిగా కాంగ్రెస్ చీఫ్ రాహుల్‌గాంధీపై తనదైన శైలిలో కేసీఆర్ విమర్శల వర్షం కురిపించారు. రాహుల్ గాంధీ దేశంలో ప్రతిపక్ష పార్టీకి అధినేతగా వ్యవహరించాలన్నారు. ఆయన తన మెచ్యూరిటీ లెవల్స్ ఇంకా పెంచుకోవాలని సూచించారు. తెలంగాణ రాష్ట్రంలో కాంగ్రెస్ అధికారంలో ఉన్నప్పుడు ఎక్సెస్ బడ్జెట్ తో ఉన్నదని మాట్లాడడం విడ్డూరంగా ఉందన్నారు.

తెలంగాణ రాష్ట్రంలో కాంగ్రెస్ గవర్నమెంటే లేదు కదా అని ఎద్దేవా చేశారు. రాహుల్ అలా మాట్లాడితే జనాలు నవ్వుకుంటారని అన్నారు. తెలంగాణలో ఉన్న వారందరికీ డబుల్ బెడ్రూమ్ ఇండ్లు కట్టిస్తామని తాము హామీ ఇచ్చామని అనడం అవివేకమన్నారు. 27 లక్షల డబుల్ బెడ్రూమ్ ఇండ్లు ఇస్తామని తాము ఎక్కడా ప్రకటించలేదన్నారు. 2లక్షల 70వేల ఇండ్లు కట్టిస్తామని చెప్పాం. ఇండ్ల నిర్మాణం సాగుతున్నది అన్నారు. ఐదు వేల ఇండ్లు కూడా కట్టించలేదని మాట్లాడడం తగదన్నారు. రాహుల్ వస్తే ఎన్ని ఇండ్లు కట్టిస్తున్నామో తెలుస్తుందన్నారు. రాహుల్ లక్ష ఉద్యోగాలిస్తామన్నారు, ఇవ్వలేదని రాహుల్ మాట్లాడడం సరికాదన్నారు. వారు చెబుతున్నదంతా పచ్చి అబద్ధం అన్నారు. ఇప్పటికే మేము ఇచ్చిన ఉద్యోగాలు లక్ష దగ్గర దగ్గరకు వచ్చాయన్నారు. రాహుల్ గాంధీ నోట కుటుంబ పాలన అని మాట్లాడితే ఏమన్నా ఉందా అని ఎద్దేవా చేశారు. కాగా, ఢిల్లీ కుటుంబ పాలన కంటే మా కుటుంబ పాలన వంద శాతం బెటర్ అన్నారు. మీ కుటుంబ పాలన  ఎట్లుందో మా కుటుంబ పాలన గట్లే ఉన్నది అని విమర్శించారు. బానిస రాజకీయాలను ఎప్పుడో తెలుగు ప్రజలు బట్టబయలు చేశారన్నారు. ఎన్టీఆర్ కాలంలోనే బానిస రాజకీయాలకు చెక్ పెట్టారని చెప్పారు. ఢిల్లీకి బానిసలుగా ఉండడానికి ప్రజలు ఇక్కడ సిద్ధంగా లేరన్నారు. అసలు కాంగ్రెస్ పార్టీలో పీసీసీ ప్రెసిడెంట్‌కు స్వేచ్ఛ ఇస్తరా? అని ప్రశ్నించారు. కనీసం అభ్యర్థులను కూడా పిసిసి ప్రసిడెంట్ ఢిల్లీ పర్మీషన్ తోనే ప్రకటించాల్సిన పరిస్థితి ఉంటుందన్నారు. రాహుల్ గాంధీ ప్రతిపక్ష పార్టీకి అధ్యక్షుడు. రాహుల్ వస్తే కేసీఆర్ భయపడతాడని మాట్లాడడం పట్ల అభ్యంతరం వ్యక్తం చేశారు. కేసిఆరా భయపడేది అని ప్రశ్నించారు. ఇప్పటి వరకు దాదాపు ఆరు, ఏడు డిఫరెంట్ సంస్థలతో సర్వేలు చేయించామన్నారు. అన్ని సర్వేల్లో టిఆర్‌ఎస్ కు వంద పైచిలుకు సీట్లు వస్తాయని తేలిందన్నారు. తాము సెప్టెంబరులోనే అభ్యర్థులను ప్రకటిస్తున్నా ముందస్థు, వెనకస్థు అన్నదానికి అర్థం లేదన్నారు. రెగ్యులర్ ఎన్నికలే ఇప్పుడు వస్తాయి తప్ప ముందస్థు ప్రశ్న ఉత్పన్నం కాదని తేల్చి చెప్పారు. ఫెడరల్ ఫ్రంట్ నాన్ కాంగ్రెస్, నాన్ బిజెపి కూటమిగా ఉంటుందన్నారు. ఫెడరల్ ఫ్రంట్ ఆవశ్యకత కాంగ్రెస్, బీజేపీలకు అర్థం కాదన్నారు. ఈ రెండు పార్టీలు ఎంతకాలం జనాలను మోసం చేస్తాయని ప్రశ్నించారు. కాంగ్రెస్ పార్టీ అధికారంలోకి వస్తే ఏక కాలంలో రైతులకు రెండు లక్షల రుణమాఫీ చేస్తామన్న ప్రకటన ఒక జోక్ అన్నారు. వాళ్లు ఎట్టి పరిస్థితుల్లో ఏకకాలంలో రెండు లక్షల రుణమాఫీ చేయలేరన్నారు. వీళ్ల ముఖ్యమంత్రే పంజాబ్ లో ఉన్నాడు ఆయన చేయలేదు కదా అని ప్రశ్నించారు. రుణ మాఫీ విషయంలో కర్ణాటక ముఖ్యమంత్రి నా సలహా తీసుకున్నాడని అన్నారు. కర్ణాటకలో కూడా విడతల వారీగానే చేశారన్నారు. అసలు రాష్ట్ర ఖజానాకు వచ్చే ఆదాయం నెలకు 8,500 కోట్లు మాత్రమే. అటువంటప్పుడు రుణమాఫీ కోసం ఏం ఆపుతారు అని నిలదీశారు. చౌక బియ్యం ఆపుతారా? ఫీజు రీయంబర్స్ మెంట్ ఆపుతారా? ఇంకేమి ఆపుతారో చెప్పాలని రాహుల్‌తో పాటు తెలంగాణ కాంగ్రెస్ నేతలను నిలదీశారు. ఇకపై మాట్లాడె ముందు ప్రతి దానికి స్పష్టత ఇవ్వాలని డిమాండ్ చేశారు. 

kcr

టీఆర్‌ఎస్ అధినేత, సీఎం కేసీఆర్ అధ
క్షతన టీఆర్‌ఎస్ కార్యవర్గం సమావేశమైంది. 31 జిల్లాలకు చెందిన టీఆర్‌ఎస్ రాష్ట్ర స్థాయి ముఖ్య నేతలు, కార్యవర్గ సభ్యులు, పలువురు ఎమ్మెల్యేలు, ఎమ్మెల్సీలు హజరయ్యారు.  ఇందులో బాగంగా మధ్యాహ్నం 3:30 గంటలకు తెలంగాణ భవన్‌లో భేటీ అయిన కేసీఆర్, తెలంగాణలోని పలు కీలక అంశాలపై వారితో చర్చించారు. తాజా రాజకీయ పరిస్థితులు సహా..తెలంగాణలో ముందస్తు ఎన్నికలకు సంబంధించిన ఊహాగానాలు వినిపిస్తున్న నేపథ్యంలో.. వచ్చే ఎన్నికల్లో అనుసరించాల్సిన వ్యూహం, ప్రభుత్వం చేపట్టిన అభివృద్ధి, సంక్షేమ కార్యక్రమాలు తదితర అంశాలపై కేసీఆర్ దిశానిర్దేం చేసినట్లు తెలుస్తోంది.

9 తీర్మానాలకు ఏకగ్రీవ ఆమోదం
ఇప్పటికే టీఆర్‌ఎస్ పార్టీ తమ అభ్యర్ధులపై ఓ 6, 7 సర్వేలు చేయించామన్నారు. వచ్చే ఎన్నికల్లో టీఆర్‌ఎస్ ఒంటరిగానే పోటీ చేస్తుందన్నారు. అయితే, వచ్చె ఎన్నికల్లో 100 పైగా సీట్లతో తెలంగాణ రాష్ట్ర సమితి తిరిగి ప్రభుత్వా న్ని ఏర్పాటు చేస్తుందని కేసీఆర్ స్పష్టం చేశారు. 15 ఆగస్టు 5వది.. ప్రగతి నివేదన సెప్టెంబర్ 2న భారీ బహిరంగ సభ హైదరాబాద్‌లో అభ్యర్థులను సెప్టెంబర్‌లో ప్రకటిస్తామన్నారు. అభ్యర్థుల నియామకంపై పార్టీ అధ్యక్షుడికి పూర్తి భాద్యతలు ఇస్తామన్నారు. స్క్రీనింగ్ కమిటీ జిల్లాలు పర్యటిస్తుందన్నారు. శంషాబాద్, కుత్బుల్లాపూర్, శామీర్‌పెటలో సభ స్థలం పరిశీలన జరుగుతుందని కేసీఆర్ పేర్కొన్నారు. కాగా, టీఆర్‌ఎస్ సమావేశంలో సీఎం కేసీఆర్ 9 తీర్మానాలను ఏకగ్రీ వంగా ఆమోదించామని...వాటిని కేంద్రానికి పంపుతామన్నారు. విభజన చట్టంలోని అంశాలను అమలు చేయాలని...కాళేశ్వరం ప్రాజెక్ట్‌కు 20వేల కోట్లు ఇవ్వాలని గతంలో నాటి, ప్రస్తుత ప్రధానులను కోరామని పేర్కోన్నారు. వరి, మొక్కజోన్నకు 2 వేలు ఎంఎస్పీ పెంచాలని తీర్మానం చేశామన్నారు. రైతులకు నరేగాను వ్యవసా యానికి అనుసంధానించాలన్నారు. తమిళనాడు తరహాలోనే 9వ షెడ్యూల్‌లో చేర్చి ఎస్టీలకు, మైనార్టీలకు రిజర్వేషన్లు పెంచాలని..ఎస్సిల వర్గీకరణ చేయాలని డిమాండ్ చేస్తామన్నారు. ద్వంద నీతి దేశ సమగ్రతకు మంచిది కాదని హెచ్చరించారు.50 శాతం పైగా ఉన్న బీసీ జనాభాకు ఒకటి పూర్తి మంత్రిత్వ శాఖను కేంద్రంలో ఏర్పా టు చేయాలని కోరామన్నారు. కొత్తగా బీసిలకు, మహిళలకు రిజర్వేషన్లు కల్పించా లని తీర్మానం చేసినట్లు చెప్పారు. ఫెడరల్ స్ఫూర్తితో తెచ్చిన నీతి ఆయోగ్‌లో.. వికేంద్రీకరణ జరగాలని చెప్పామన్నారు.

ప్రధానంగా హెల్త్, ఎడ్యుకేషన్, వ్యవసాయం, రూరల్, అర్బన్ డెవలప్‌మెంట్ వంటి కొన్ని అంశాలను రాష్ట్రాలకు వదిలిపెట్టాలని సూచించినట్లు కేసీఆర్ చెప్పారు. కేంద్రంలో ప్రభుత్వం ఏర్పడ్డ ఈ నాలుగున్నర సంవత్సరాల్లో మాటలు తీయగా ఉన్నాయి... కానీ వారు తెలంగాణకు చేసిందేమీ లేద ని ఘాటుగా విమర్శించారు. రాజకీయాలు..న్యూస్ పేపర్లు తగ్గి.. వ్యూస్ పేపర్ల పాత్ర పెరిగిందన్నారు. అయితే, రాహుల్ గాంధీ డబుల్ బెడ్ రూమ్స్ 2లక్షలని చేసిన కామెంట్స్‌పై..మెచ్యూరిటీ పెంచుకోవాలని ఎవరో రాసి ఇచ్చింది చదవటం కరెక్ట్ కాదని కౌంటర్ ఇచ్చారు. తెలంగాణలో రాహుల్ గాంధీ పర్యటనికి తాము భయపడతామా.. అని ప్రశ్నించారు. గత ఎన్నికల్లో అందరూ వచ్చారని? ఏ మైంది. అని ప్రశ్నించారు. కాంగ్రెస్ 2 లక్షలు రుణ మాఫీ చేస్తామంటే ఎవరన్నా వ ద్దన్నామా?. ఏకకాలంలో అది అసాధ్యమన్నారు. తమకు అబద్దాలు చెప్పడం రాదన్నారు. నిరుద్యోగుల భృతి ఏ లెక్క ప్రకారం ఇస్తారు?.. కాంగ్రెస్ స్పష్టం చేయాల ని..ప్రజలకు అబద్దాలు చెప్పవద్దని అధినేత కేసీఆర్ ప్రతిపక్షాలకు హితవు పలికారు.



‘డబుల్’కు వర్షపు పోటు

Updated By ManamTue, 08/14/2018 - 02:12
  • కురుస్తున్న డబుల్‌బెడ్‌రూం ఇండ్లు

  • కారేపల్లి మండలంలో మునిగిన ఇండ్ల్లు

  • చెరువు లోతట్టు ప్రాంతాల్లో నిర్మాణాలు

  • బయటపడిన అవినీతి

imageఖమ్మం: డబుల్ బెడ్‌రూం ఇళ్లకు వర్షపు పోటు తగిలింది. చెరువు లోతట్టు ప్రాంతాల్లో నిర్మించడం,  నాసీరకంగా పనులు చేపట్టడం, వాగు సమీపంలో నిర్మించడం వల్ల ఈ పరిస్థితి ఎదుైరెంది. మూడు రోజులుగా కురుస్తున్న వర్షాలకు కారేపల్లి, కల్లూరు, ఖమ్మం రూరల్ మండలాల్లోని లబ్ధిదారులు ఇబ్బందులు పడుతున్నారు. మిగతా ప్రాంతాల్లోనూ ఇదే పరిస్థితి ప్రస్తుతం లేకున్నా, భవిష్యత్తులో ముప్పు వాటిల్లే అవకాశాలు లేకపోలేదు.ఖమ్మం జిల్లాలో నియోజకవర్గానికి 400 చొప్పున డబుల్ బెడ్‌రూం ఇళ్లు కేటాయించారు. ఖమ్మం కార్పొరేషన్‌లో గతంలో ముఖ్యమంత్రి కెసిఆర్ పర్యటించిన సందర్భంలో అక్కడి పరిస్థితులను గమనించి ఖమ్మం నియోజకవర్గానికి 2400 ఇళ్లను కేటాయించారు. ఇటీవల కాలంలో ఎమ్మెల్యే పువ్వాడ అజయ్‌ుకుమార్ అభ్యర్ధన మేరకు ఆ నియోజకవర్గానికి మరో ఐదువేల ఇళ్లను మంజూరు చేశారు.

ప్రస్తుతం అన్నీ ప్రాంతాల్లోనూ నిర్మాణాలు సాగుతున్నాయి. కొన్ని చోట్ల ప్రారంభం అయ్యాయి. కారేపల్లి మండలం పేరేపల్లి గ్రామంలో నిర్మించిన రెండు పడకగదుల ఇళ్లు వరద ముంపులో చికుకున్నాయి. ఇక్కడ 20 ఇళ్లను నిర్మించారు. గత ఏడాది జూన్‌లో ఈ ఇళ్లను రాష్ట్ర రోడ్లు, భవనాల శాఖ మంత్రి తుమ్మల నాగేశ్వరరావు ప్రారంభించారు. ఆ గ్రామంలో ఇళ్లు నిర్మించేటప్పుడే స్థలం ఎంపికపై వివాదం ఏర్పడింది. ఈ స్థలంలో గతంలో స్మశానం ఉండేది. ఈ ఇళ్లకు సమీపంలో బుగ్గవాగు ప్రవహిస్తుంది. గత మూడు రోజులుగా కురుస్తున్న వర్షాలతో బుగ్గవాగులో భారీ వరద నీరు చేరి ఇళ్లకు పోటెత్తాయి. దీంతో లబ్ధిదారులను సురక్షిత ప్రాంతానికి తరలించారు. ప్రస్తుతం లబ్ధిదారులు అనేక ఇబ్బందులు పడుతున్నారు. కల్లూరు మండలం  బత్తులపల్లి గ్రామంలో నిర్మించిన డబుల్‌బెడ్‌రూం ఇళ్లు కురుస్తున్నాయి. నాసీరకంగా నిర్మించడం వల్లనే ఈ పరిస్థితి ఏర్పడిందని లబ్ధిదారులు పేర్కొన్నారు. విషయం తెలుసుకున్న సత్తుపల్లి ఎమ్మెల్యే సండ్ర వెంక టవీరయ్య ఆ ఇళ్లను సోమవారం పరిశీలించారు. ఇళ్లు స్లాబ్‌లు కురుస్తున్న తీరును పరిశీలించి లబ్ధిదారులతో మాట్లాడారు. కాంట్రాక్టర్ అవినీతి వల్లనే ఇళ్లు నాసీరకంగా నిర్మాణం అయ్యాయని పేర్కొన్నారు.

ప్రమాదంలో మరికొన్ని ఇళ్లు
ప్రభుత్వం ఇచ్చేది తక్కువ, ఖర్చు అయ్యేది ఎక్కువ కావడంతో డబుల్ బెడ్‌రూం ఇళ్ల నిర్మాణంలో కాంట్రాక్టర్లు నాసీరకం పనులు చేపట్టారనే విమర్శలు ఉన్నాయి. గతంలో కురిసిన బారీ వర్షానికి కూసుమంచి మండలం నేలపట్ల గ్రామంలో ఇళ్లు కూలిపోయాయి. కల్లూరు మండలం చిన్నకోరుకొండి గ్రామంలో పునాది స్థాయిలోనే పిల్లర్స్ పడిపోయాయి. ఈ ఘటనలు కాంట్రాక్టర్ల అవినీతికి, అధికారుల నిర్లక్ష్యానికి నిదర్శనంగా నిలిచాయి. ఇదే తరహాలో అన్ని ప్రాంతాల్లో ఇళ్ల నిర్మాణాలు జరుగుతున్నాయి. ఖమ్మం రూరల్ మండలం మద్దులపల్లి గ్రామంలో నిర్మించిన ఇళ్లు  చెరువు లోతట్టు ప్రాంతంలో ఉన్నాయి. ప్రస్తుతం కురుస్తున్న వర్సాలు మరో మూడు రోజుల పాటు సాగితే అక్కడి చెరువు నిండి ఈ ఇళ్లల్లోకి నీళ్లు ప్రవేశించే అవకాశాలు ఉన్నాయి. 



కంటి వెలుగులు నింపుతాం

Updated By ManamTue, 08/14/2018 - 01:49
  • మల్కాపూర్‌లో శ్రీకారం చుట్టనున్న కేసీఆర్

  • రాష్ట్రవ్యాప్తంగా కంటి పరీక్ష కేంద్రాలు

  • ప్రపంచంలోనే అత్యుత్తమ అద్దాలు అందిస్తాం

  • కంటి వ్యాధులు లేని రాష్ట్రంగా తీర్చిదిద్దుతాం

  • మొత్తం ఖర్చు ప్రభుత్వమే పెట్టుకుంటది

  • సమీక్ష సమావేశంలో సీఎం కేసీఆర్ వెల్లడి

imageహైదరాబాద్: రాష్ట్ర ప్రజలందరికీ కంటి పరీక్షలు చేసి ఉచితంగా అద్దాలు అందించి, అవసరమైతే ఆపరేషన్లు చేయించి వెలుగు ప్రసాదించేందుకు తలపెట్టిన కంటి వెలుగు కార్యక్రమాన్ని ముఖ్యమంత్రి కేసీఆర్ ఈ నెల 15న మెదక్ జిల్లా మల్కాపూర్ గ్రామం నుంచి ప్రారంభించనున్నారు. అదే సమయంలో జిల్లా కేంద్రాల్లో, గ్రామాల్లో ప్రజా ప్రతినిధులు ఈ కార్యక్ర మానికి శ్రీకారం చుట్టనున్నారు. ఇందుకు సంబంధించిన ఏర్పాట్లపై వైద్యారోగ్య, కుటుంబ సంక్షేమ శాఖ అధికారులతో ముఖ్యమంత్రి సమీక్షించారు. సోమవారం, ప్రగతి భవన్‌లో జరిగిన ఈ సమావేశంలో కార్యక్రమ ఏర్పాట్లను అధికారులు ముఖ్యమంత్రికి వివరించారు. రాష్ట్రంలోని అన్ని గ్రామాల్లో కార్యక్రమాన్ని విజయవంతంగా నిర్వహించేందుకు 812 వైద్య బృందాలను ఏర్పాటు చేసినట్టు అధికారులు తెలిపారు. ఈ సందర్భంగా ముఖ్యమంత్రి మాట్లాడుతూ.. కంటి చూపును నిర్లక్ష్యం చేస్తూ దృష్టిలోపంతో బాధ పడుతున్న వారికి కంటివెలుగును ప్రసాదించేందుకు తెలంగాణ ప్రభుత్వం ఈ చారిత్రాత్మక కార్యక్రమాన్ని చేపడుతోందన్నారు. ఈ కార్యక్రమం ద్వారా చేపట్టే కంటి వైద్య పరీక్షలు, అద్దాలు, శస్త్ర చికిత్సలు, మందులు పూర్తిగా ప్రభుత్వ ఖర్చులతో అందజేస్తున్నామని చెప్పారు. కండ్లను కాపాడుకునేందుకు తీసుకోవాల్సిన జాగ్రత్తలు, కంటి ఆరోగ్యానికి సంబంధించిన అవగాహనను కూడా ఈ కార్యక్రమంలో వైద్య సిబ్బంది ప్రజలకు వివరిస్తారని తెలిపారు.

అత్యంత నాణ్యమైన అద్దాల పంపిణీ
కంటి పరీక్షల అనంతరం అవసరమైన వారికి ప్రపంచంలోనే అత్యుత్తమ కంపెనీ తయారు చేసిన నాణ్యమైన అద్దాలను పంపిణీ చేయనున్నట్టు ముఖ్యమంత్రి వెల్లడించారు. మంచి పనితీరును కనబర్చేందుకు వైద్య బృందాలకు వారానికి రెండ్రోజులు సెలవు ఇవ్వాలని అధికారులను ఆదేశించారు. గ్రామాల్లో ప్రాథమిక ఆరోగ్య కేంద్రాల వారీగా, పట్టణాల్లో వార్డుల వారిగా కంటి వెలుగు క్యాంపులను ఏర్పాటు చేస్తున్నట్టు కేసీఆర్‌కు అధికారులు వివరించారు. ఒక్కో క్యాంపులో ఒక మెడికల్ ఆఫీసర్, కంటి వైద్యుడు, ఎఎన్‌ఎం, సూపర్ వైజర్లు, ఆశా వర్కర్లు సహా  ఆరు నుంచి 8 మందితో కూడిన బృందం ప్రజలకు సేవలందిస్తుందన్నారు. ఒక్కో బృందానికి ఒక్కో వాహనాన్ని కేటాయించారు. ఒక్కో వైద్య బృందం రోజుకు గ్రామాల్లో అయితే 250, పట్టణాల్లో అయితే 300 మందికి కంటి పరీక్షలు చేస్తారు. కంటి పరీక్షలు చేయించుకునే వారిలో కేవలం 40 శాతం మందికి మాత్రమే తదుపరి చికిత్స అవరసమవుతుందని అధికారులు సీఎం దృష్టికి తీసుకెళ్లారు. ఆరోగ్యశాఖ మంత్రి లక్ష్మారెడ్డి, దేవాదాయశాఖ మంత్రి ఇంద్రకరణ్ రెడ్డి, ఎమ్మెల్యేలు రెడ్యానాయక్, ఎర్రబెల్లి దయాకర్ రావు, ఆరూరి రమేశ్, ప్రభుత్వ విప్ పల్లా రాజేశ్వర్ రెడ్డి, సీఎం ముఖ్య కార్యదర్శులు ఎస్.నర్సింగ్ రావు, శాంతి కుమారి, కార్యదర్శి స్మితా సబర్వాల్, ప్రత్యేక కార్యదర్శి భూపాల్ రెడ్డి, ఆరోగ్య కుటుంబ సంక్షేమ శాఖ కమిషనర్ వాకాటి కరుణ, డైరక్టర్ శ్రీనివాసరావు తదితరులు ఈ సమీక్షా సమావేశంలో పాల్గొన్నారు.
 

image

 





Related News