నేపాల్ థియేటర్లలో నిలిపివేసిన ఆదిపురుష్ చిత్రం..! కారణం ఏమిటంటే..?

ప్రభాస్ రాముడిగా నటించిన ఆదిపురుష్ మూవీ మొదటి నుంచి నెగిటివ్ టాక్ ని ఎదుర్కొంటోంది. ఈ చిత్ర టీజర్ రిలీజ్ అయిన మొదటి నుంచి కూడా సవాళ్లను, విమర్శలను ఎదుర్కొంటూ ఈ జూన్ 16న ప్రపంచవ్యాప్తంగా విడుదలైంది. రూ.500 కోట్ల బడ్జెట్‌తో రామాయణం ఆధారంగా ఈ చిత్రాన్ని ప్రేక్షకుల ముందుకు తీసుకొచ్చారు నిర్మాతలు. టీజర్ రిలీజ్ టైం నుంచి ఎన్నో విమర్శలను ఎదుర్కొంటున్న ఈ చిత్రం తొలిరోజే బాక్స్ ఆఫీస్ వద్ద రూ. 140 కోట్ల గ్రాస్ కలెక్ట్ చేసి సక్సెస్ దిశగా దూసుకుపోతుంది.

అంతేకాకుండా ఎన్నో భారీ అంచనాల నడుమ విడుదలైన ఆదిపురుష్ చిత్రం విడుదలైన తొలి రోజే వివాదంలో చిక్కుకుంది. ఈ సినిమాలోని కొన్ని సన్నివేశాలు రామాయణాన్ని అవమానించడంతో పాటు రాముడు, సీత, రావణుడు, హనుమంతుడు పాత్రలపై పలు సన్నివేశాలు అభ్యంతరకరంగా ఉన్నాయంటూ విమర్శలు ఎదుర్కోవాల్సి వస్తుంది.

ఈ సినిమా రామాయణంలో ఉన్న వాస్తవికతకు చాలా దూరంగా ఉందని.. యావత్ హిందూ సమాజాన్నే కించపరిచేదిగా ఉందని హిందూ సేన అనే హిందూ సంస్థ జాతీయ అధ్యక్షుడు విష్ణు గుప్త ఢిల్లీ హై కోర్టులో పిటిషన్ దాఖలు చేశారు. సినిమాలోని అభ్యంతరకరమైన సన్నివేశాలను తొలగించడం లేదా సవరించడం చేయాలని ఆదేశాలు జారీ చేయాల్సిందిగా విష్ణు గుప్త ఢిల్లీ హై కోర్టును ఆశ్రయించారు.

ఇక ఆదిపురుష్ చిత్రంపై మన భారత రాజధాని ఢిల్లీలోనే పరిస్థితి ఇలా ఉంటే..  ఆదిపురుష్ మూవీపై నేపాల్ లో మరో వివాదం తెరపైకి వచ్చింది. దీని కారణంగా అక్కడ ఆదిపురుష్ చిత్ర ప్రదర్శనను థియేటర్ల వద్ద ఆపివేయడం జరిగింది. ఆదిపురుష్ సినిమాలో ఒక ఒక డైలాగ్ కారణంగా ఆ సినిమాపై నేపాల్ ప్రజలను ఆగ్రహాన్ని వ్యక్తం చేస్తున్నారు.

నేపాల్ రాజధానైనా ఖాట్మాండు నగర మేయర్ బెలెన్ షా మీడియాతో మాట్లాడుతూ.. ఆదిపురుష్ మూవీలో సీతా దేవిపై ఒక అభ్యంతరకరమైన డైలాగ్ ఉందని.. సీతా దేవిని భారత దేశం బిడ్డగా చిత్రీకరిస్తూ డైలాగ్ పెట్టారని.. కానీ సీతమ్మను వారు నేపాల్ గడ్డపై పుట్టిన బిడ్డగా ఆరాధిస్తామని ఆయన మీడియాతో వెల్లడించారు. అందుకే ఆ డైలాగ్ తమ మనోభావాలని కించపరిచేదిగా ఉందని, అందువలన నేపాల్‌లో ఆదిపురుష్ మూవీ నిలిపేయాల్సిందిగా ఖాట్మాండు నగర మేయర్ బెలెన్ షా పట్టుపట్టారు. బెలెన్ షా అక్కడి మేయర్ కావడంతో ఆయన ఆదేశాల మేరకు ఖాట్మాండులో ఆదిపురుష్ మూవీ షోలను నిలిపివేయడం జరిగింది.

మరికొన్ని ముఖ్యమైన వార్తలు :

ఓటీటీలో సందడి చేయబోతున్న ఆదిపురుష్ చిత్రం.. ఎప్పుడంటే..?

ఆర్ఆర్ఆర్ చిత్రంలోని ఈ సన్నివేశాన్ని గమనించారా..?

ప్రభాస్ ఫ్యాన్స్ పై రెచ్చిపోయిన శ్రీరెడ్డి.. దమ్ముంటే ఓమ్ రౌత్ ను కొట్టాలంటూ..!