రచీన్ రవీంద్ర విధ్వంసం.. తొలి సెంచరీనే డబుల్ సెంచరీతో..!

న్యూజిలాండ్ క్రికెటర్ రచిన్ రవీంద్ర గురించి ప్రత్యేకంగా చెప్పాల్సిన అవసరమే లేదు. వ్యక్తి గతంగా భారతదేశానికి చెందిన వాడు అయినప్పటికీ.. వాళ్ల ఫ్యామిలీ న్యూజిలాండ్ లో సెటిల్ కావడంతో అక్కడే ఉంటున్నాడు. ప్రస్తుతం న్యూజిలాండ్ జట్టులో కీలక ఆటగాడిగా మారాడు రవీంద్ర. తాజాగా మౌంట్ మాంగనుయ్ వేదికగా దక్షిణాఫ్రికాతో జరుగుతున్న తొలి టెస్ట్ లో ఈ యువ సంచలనం రచిన్ రవీంద్ర దుమ్మురేపుతున్నాడు. ఈ మ్యాచ్ తొలి ఇన్నింగ్స్ లో రవీంద్ర అద్భుతమైన డబుల్ సెంచరీతో చెలరేగాడు.

340 బంతుల్లో 21 ఫోర్లు, 1 సిక్స్ తో డబుల్ సెంచరీ మార్క్ ను అందుకున్నారు. రవీంద్ర తన తొలి సెంచరీనే డబుల్ సెంచరీగా మార్చాడు. ప్రస్తుతం రవీంద్ర 222 పరుగులతో బ్యాటింగ్ చేస్తున్నాడు. 135 ఓవర్లు ముగిసే సరికి తొలి ఇన్నింగ్స్ లో కివీస్ 5 వికెట్ల నష్టానికి 437 పరుగులు చేసింది. క్రీజులో రవీంద్రతో పాటు గ్లెన్ ఫిలిప్స్ ఉన్నాడు. అలాగే రవీంద్రతో పాటు న్యూజిలాండ్ మాజీ కెప్టెన్ కేన్ విలియమ్సన్ కూడా సెంచరీతో మెరిసాడు. ఈ మ్యాచ్ తొలి ఇన్నింగ్స్ లో కేన్ మామ 118 పరుగులు చేశాడు. గత ఏడాది భారత్ వేదికగా జరిగి వన్డే వరల్డ్ కప్ లో కూడా రచిన్ అద్భుతమైన ప్రదర్శన కనబరిచిన విషయం తెలిసిందే.