చిరంజీవి చేయను అని మొండిగా చెప్పిన ‘గ్యాంగ్ లీడర్’ మూవీ మళ్లీ ఎందుకు చేయాల్సి వచ్చిందో తెలుసా ?

మెగాస్టార్ చిరంజీవి గురించి ప్రత్యేకంగా చెప్పాల్సిన అవసరమే లేదు. రీ ఎంట్రీ ఇచ్చిన తరువాత ప్రస్తుతం వరుస సినిమాలతో దూసుకుపోతున్నాడు. ఇప్పటికే 155 సినిమాల్లో నటించాడు. 156వ సినిమాగా విశ్వంభర వచ్చే ఏడాది సంక్రాంతి పండుగకు ప్రేక్షకుల ముందుకు రాబోతున్నాడు. ఇన్ని సినిమాల్లో చిరంజీవి అతనికి మెగాస్టార్ అనే రావడానికి కారణమైన మూవీ మాత్రం గ్యాంగ్ లీడర్ అంటే అతిశయోక్తి కాదు. ఈ చిత్రం చిరంజీవి కెరీర్ లో మైల్ స్టోన్ గా మిగిపోవడమే కాదు.. కలెక్షన్ల పరంగా కూడా సునామీ సృష్టించింది. 

విజయశాంతితో చిరంజీవి చేసిన డ్యాన్స్, పాటలు అద్భుతమైన విజయాన్ని సాధించాయి. కేవలం పాటల కోసమే ఈ చిత్రాన్ని ప్రేక్షకులు మళ్లీ మళ్లీ చూశారంటేనే మనం అర్థం చేసుకోవచ్చరు. తొలుత చిరంజీవి గ్యాంగ్ లీడర్ సినిమాకి నో చెప్పారట. చేయను అన్న సినిమాని ఎలా చేశాడంటే..? విజయబాపినీడు గ్యాంగ్ లీడర్ సినిమాకి దర్శకత్వం వహించారు. ఈ సినిమా కంటే ముందు పట్నం వచ్చిపతివ్రతలు, హీరో, మగధీరుడు వంటి సినిమాలకు విజయబాపినీడు దర్శకత్వం వహించారు. సరికొత్త కథతో చిరంజీవికి మంచి విజయాన్ని అందించాలనుకున్న విజయబాపినీడు గ్యాంగ్ లీడర్ కథను చాలా కష్టం మీద సిద్ధం చేసుకొని వినిపించారట. కథ విన్న తరువాత చిరంజీవి ఎలాంటి మొహమాటం లేకుండా ఈ సినిమా ఆడదు.. నేను చేయను అని చెప్పేశారట.

దీంతో తీవ్ర నిరాశకు లోనైనా విజయబాపినీడు సరాసరి పరుచూరి బ్రదర్స్ దగ్గరికి వెళ్లి ఆ కథను వినిపించాడట. కథ మొత్తం విన్న పరుచూరి దాంట్లో కొన్ని లోపాలను గమనించి వాటిని సరిచేయడానికి మూడు రోజుల సమయం అడిగారట. ఆ విషయాన్ని చిరంజీవికి చెప్పగానే పరుచూరి బ్రదర్స్ పై ఉన్న నమ్మకంతో ఓకే చెప్పారట. అలా కథలో కొన్ని మార్పులు చేసి చిరంజీవికి వినిపించాక ఆయన ఓకే చేసి అల్లు అరవింద్ కి డేట్స్ విషయం చూసుకోమని అప్పచెప్పారట. అల్లు అరవింద్ కూడా పరుచూరి గోపాల కృష్ణ చేత ఒకసారి చెప్పించుకుని రికార్డు చేసుకొని మరీ విన్నారట. అలా ఎందుకు చేశారంటే మీరు మాటలతో మాయాజాలం చేస్తారు. నేను ఇంటికి వెళ్లిన తరువాత మరోసారి ఆ రికార్డు విని కథ ఎలా ఉందో చెబుతాను అని చెప్పాడట. అలా మొదలైన ఈ సినిమా ఎంతటి సంచలన విజయాన్ని అందుకుందో అందరికీ తెలిసిందే.