చంద్రబాబు, పవన్ కళ్యాణ్ పై సిద్ధం సభలో రెచ్చిపోయిన సీఎం జగన్

ఏలూరు జిల్లా దెందులూరు వైసీపీ సిద్ధం సభలో సీఎం జగన్ చంద్రబాబు, పవన్ కళ్యాణ్ ల పై రెచ్చిపోయారు. ముఖ్యంగా చంద్రబాబు కుట్రలు, కుతంత్రాలు చీల్చీ చెండాడాలని పేర్కొన్నారు. చారిత్రక విజయాన్ని అందుకునేందుకు మీరందరూ సిద్ధమా అని సభకు వచ్చిన వైసీపీ శ్రేణులను సీఎం జగన్ ప్రశ్నించారు. ఇంటింటి భవిష్యత్ ను మరింత మార్చేందుకు మీరు సిద్ధమా ? దుష్టచతుష్టయంపై యుద్దానికి మీరు సిద్దమా ? పేదల భవిష్యత్ ను కాటేసే ఎల్లో వైరస్ పై యుద్ధానికి మీరు సిద్దమా? అని ప్రసంగించారు సీఎం జగన్.

రామాయణం, మహాభారతంలో ఉన్న విలన్లు అందరూ చంద్రబాబు, ఈనాడు, ఆంధ్రజ్యోతి, టీవీ5, దత్తపుత్రుడు రూపంలో ఇక్కడే ఉన్నారని అన్నారు సీఎం జగన్. ఇంతమంది తోడేళ్ల మధ్యన జగన్‌ ఒంటరిగానే కనిపిస్తాడని.. కానీ నిజం ఏంటంటే.. కోట్ల మంది హృదయాల్లో జగన్‌ ఉన్నాడని పేర్కొన్నారు. జగన్‌ ఒంటరివాడు కాదన్నది ఇక్కడ కనిపిస్తున్న జనమే నిజం అని అన్నారు. కోట్లాది మంది గుండెల్లో జగన్‌ ఉండటమే నిజం.. నాకున్న సైన్యం, బలం.. దేవుడు, ప్రజలే అని సీఎం జగన్‌ వ్యాఖ్యానించారు.

వచ్చే ఎన్నికల రణక్షేత్రంలో మీరంతా కృష్ణుడైతే నేను అర్జునుడిని అని అన్నారు సీఎం జగన్. దుష్టచతుష్టయం దాడి అంతా అభివృద్ది, సంక్షేమం మీదనే.. రాబోయే తరం విద్యావిధానాల మీద దుష్టచతుష్టయం దాడి చేస్తోందని అన్నారు. రాష్ట్ర ప్రభుత్వం చేస్తున్న అభివృద్ధిపై టీడీపీ దండయాత్ర చేస్తోందిని ఫైర్ అయ్యారు. మేనిఫెస్టోలో చెప్పిన హామీలన్నీ నెరవేర్చిన ప్రభుత్వం మనది అని పేర్కొన్నారు. పేదవాడి భవిష్యత్తు, సంక్షేమం మీద వారంతా దాడి చేస్తున్నారని.. గ్రామగ్రామాల్లో మనం తెచ్చిన మార్పు స్పష్టంగా కనిపిస్తోందని అన్నారు.