Bhakthi

శ్రీకనకధార-15

Updated By ManamTue, 08/21/2018 - 00:09

నమోస్తు  దేవ్యై భృగునందనాయై
నమోస్తు విష్ణోరురసి స్థితాయై 
నమోస్తు లక్ష్మ్యై కమలాలయాయై
నమోస్తు దామోదరవల్లభాయై 

imageనమ్మి కొలిచిన భక్తులకు కొంగుబంగారం లక్ష్మీదేవి. ఆ తల్లి బ్రహ్మ ఆజ్ఞమేరకు తపస్సు చేసిన కారణంగా భృగు - ఖ్యాతి దంపతులకు పుత్రికగా జన్మించింది. బ్రహ్మమాసనపుత్రుడు, సప్తర్షుల్లో ఒకడైన భృగు మహర్షి తండ్రియైన బ్రహ్మ ఆదేశం మేరకు నిష్కామంగా తపస్సు చేశాడు. అందుకు పరాశక్తి ప్రసన్నురాలైంది. వరం కోరుకోమంటే ఆ మహర్షికి ఆదిపరాశక్తిని తన ఇంట నిలుపుకోవాలనుకోవడం తప్ప మరేదీ తోచలేదు. వెంటనే ఆ తల్లిని తన ఇంట పుత్రికగా ఉదయించమని కోరుకున్నాడు. అప్పడు ఆదిపరాశక్తి లక్ష్మీస్వరూపంలో భృగు ఇంట జన్మించింది. భార్గవి అయింది. మరోలా చెప్పాలంటే భృగు నిష్కామతపానికి మెచ్చి, ఆయనకు తండ్రిపదాన్ని అందించింది. ఆయనను భృగుసంహిత రచయితగా మారేలా చేసింది. అంతటి భక్తవరద ఆ తల్లి.

 భార్గవిగానే విష్ణుపత్ని స్థానాన్ని పొంది, ఆయన హృదయాధినేత్రి అయింది. కమలాధివా సినియైన ఆ తల్లికి ఉన్న లక్ష్మి అన్న పేరు కూడా జనోద్ధరణను సూచించేదే.  లక్ష్యాయిధి లక్ష్మిః- అంటే జనులను ఉద్ధరించే లక్ష్యం కలిగింది అని అర్థం. ఆ తల్లే దామోదరుని పాణిగ్రహణంతో లోకమాతగా నిలిచింది. దామం అంటే తాడు. దాన్ని ఉదరంపై గలవాడు దామోదరుడు. సదా విష్ణుగళంలో ఉండే దామం వైజయంతి. అది విజయకారకం. బాలశంకరులు ఈ స్తుతి శ్లోకంలో  అమ్మవారి భక్తసులభతని, ఆశ్రితవరదత్వాన్ని, కోమలావాస స్థానాన్ని, ఆర్తోద్ధరణ పరాయణత్వాన్ని సూచించారు.  అంతేకాదు భృగు ప్రస్తావనలో అమ్మవారి విద్యాతత్త్వాన్ని, లక్ష్మీ శబ్దంతో అర్థతత్త్వాన్ని, దామోదర వల్లభత్వంతో శక్తితత్త్వాన్ని చెబుతూ స్వరూపాలు వేరైనా అమ్మవారు ఒక్కటే అని మార్మికంగా సూచించారు. ఇదిగదా శాక్తేయమైన అద్వైతం. భృగువంశపుత్రిక, విష్ణువక్షస్థలనిలయ, కమలాలయ, దామోదర ప్రియయైన ఓ లక్ష్మీదేవీ నీకు వందనం.
-డా. కె. పూర్ణప్రజ్ఞాభారతి



ఓ చిన్నదానా లే!

Updated By ManamTue, 08/21/2018 - 00:09

క్రీస్తు సందేశం
imageసమాజ మందిరపు అధికారియైన
యాయీరు అనేవాడొకడు వ్యధా జనిత హృదయంతో యేసు పాదాలపై పడ్డాడు. రోగగ్రస్తయైన నా కుమార్తెను బ్రతికించడానికి నా యింటికి రమ్మని అడిగాడు. ప్రభువు తన శిష్యగణంతో వెళ్తుంటే జనసమూహం ఆయనను చుట్టు ముట్టింది.  చిరకాలం నుండి రక్తస్రావంతో బాధపడుతున్న ఒక స్త్రీ ప్రభువును సమీపించడానికి శంకించింది. ఆయన వస్త్రాన్ని తాకినా ధన్యనవుతాననే ఘన విశ్వాసంతో ఆమె తాకింది. తక్షణమే రక్తస్రావం ఆగింది. అప్పుడు యేసు ఇలా ప్రకటించాడు. నా తేజోబలం ఒకటి ఇక్కడున్న మీలో ఒకరిలో చేరిందని పలికాడు. అప్పుడా స్త్రీ భయంతో వణకుతూ ప్రభువు చెంత రెండు చేతులూ జోడించింది. యేసు భయపడకు, నీ విశ్వాసము నిన్ను స్వస్థపరచిందని పలికాడు.

అంతలో అధికారి తాలూకు దాసులు పరుగున అక్కడికి వచ్చారు. నీ కుమారుడు చనిపోయాడని కబురు చెప్పారు. క్రీస్తు ఆ అధికారితో భయపడకు అంటూ అతనితో కలిసి ఇంటిలో ప్రవేశించాడు. యేసు ఆ బిడ్డను చూచి ఈ బిడ్డ నిదురిస్తోంది అన్నాడాయన. అందరూ విస్తుబోయి చూస్తుండగా.... తలితాకుమీ - చిన్నదానా లెమ్మని నీతో చెబుతున్నా అని అరామి భాష (హెబ్రీ భాషలో ఒక మాండలికం)లో పలుకగానే బాలిక ప్రాణంతో కదులుతూ మంచంపై కూర్చుంది. ఈయన  దైవ కుమారుడు, లోకాన పవిత్రుడని అందరూ అంజలి పట్టారు. ప్రభువు పాదాలపై పడ్డారు.
ఈ అద్భుత క్రియ మత్తయి 9:18-26, మార్కు 5:21-43, లూకా 8:40-56లలో వర్ణితమైంది.



ధర్మ సందేహాలు

Updated By ManamTue, 08/07/2018 - 02:31

దీపారాధన గాలికి కొండెక్కితే అపశకునంగా భావిస్తారు.  ఇది సరైన పనేనా? 
imageదీపారాధనను ఆర్పకపోవడం మన సంప్రదా యం. ఇది అగ్నిఆరాధనలో భాగం. యజ్ఞయాగాది క్రతువులు చేసేటప్పుడు సమిధలతో ఆహుతులు సమర్పిస్తారు. అక్కడ జ్వాల పెరిగితే, పాలు కలిపిన నీళ్లు చిలకరించి నియంత్రిస్తారు. ఆకాశం నుంచి వాయువు, వాయువు నుంచి అగ్ని, అగ్ని నుంచి నీరు, నీటినుంచి భూమి, భూమిపైన ఓషధుల సాయంతో అన్నరూపంగా ఈ పంచతత్వాలను స్వీకరించి మనిషి ఏర్పడ్డాడు. అగ్ని పెరగడానికి గాలి సాయపడుతుంది.

అగ్ని చిన్నదిగా ఉంటే అదే గాలి ఆర్పివేస్తుంది. మనలోని జ్ఞానాగ్నికి దీపం ప్రతీక. అది నిరంతరం వెలుగుతూ ఉండాలి. అందుకే దీపం ఆరిపోతే అపశకునం అంటారు. గాలిలో దీపం పెట్టి దేవుడా నీదే భారం అంటామా? రక్షించుకోవడం మన బాధ్యత. అప్పుడే కొండెక్కిన దీపాన్ని మరోసారి వెలిగించవచ్చు. నిన్నటిరోజు చేసిన దీపారాధనలో మాత్రం నూనె, వత్తి కొత్తవి వేయకుండా దీపారాధన చేయ కూడదు. 



ధర్మ సందేహాలు

Updated By ManamTue, 08/07/2018 - 02:31

భగవంతునికి మొక్కులు ముడుపులు చెల్లించడం అవసరమా? మన డబ్బు భగవంతుడు ఆశిస్తాడా?

imageసర్వేగుణాః కాంచనమాశ్రయంతి అన్నారు. అంటే లోకంలోని మంచిచెడు గుణాలన్నీ ధనాన్ని ఆశ్రయించుకుని ఉంటాయి. కలియుగ మానవులకు ఆశామోహాలు ఎక్కువ. అందుకే మనం ఎక్కువ సందర్భాల్లో స్వార్ధంతోనే ధనం సంపాదిస్తాం. మనలోని స్వార్ధగుణమే మన సంపదకు దోషాన్ని ఆపాదిస్తుంది. అటువంటి దోషాలన్నీ తీసేసి స్థిరమైన సంపదను అనుగ్రహించమని కోరుకుంటూ భక్తుడు హుండీలో డబ్బు వేస్తాడు. దేవుడి హుండీలో పడేదంతా పాపపు సొమ్ము అనకూడదు. ఆయనను చేరిన తర్వాత అదంతా పవిత్రత పొందుతుంది. 

దోషగుణాన్ని తీసివేసి వైరాగ్య సంపదను మనకు అనుగ్రహించేందుకు ఈ సంప్రదాయం ఉంది. సిరిసంపదలు కూడబెట్టడం గొప్పవిషయం కాదు. వాటిని ఇష్టపూర్తిగా వదులుకోవడంలోనే నిజమైన మానసిక ఆనందం ఉంది. ఇతరులకు ఇవ్వడంలోనే తృప్తి ఉంది.ఈ కానుకలు, ముడుపులు ఆయనకు మనమే ఇస్తున్నామనుకుంటే తప్పే అవుతుంది. ధన, వస్తురూపమైన ఐశ్వర్యంపై వైరాగ్యభావనతో ఆయనకు సమర్పించాలి. ఈ వైరాగ్యభావన నుంచే ముముక్షుభావన పెరుగుతుంది.



శుభాల శ్రావణం

Updated By ManamTue, 08/07/2018 - 01:50

శ్రావణమాసం శుభాలకు నెలవు. మనవారు ఈ మాసంలో శుభకార్యాలు నిర్వహిస్తారు. వ్రతాలు, నోములు చేపడతారు. మహావిష్ణువును, లక్ష్మిని, గౌరిని ప్రత్యేకంగా పూజిస్తారు. నోములు, పేరంటాలతో మహిళలందరూ ఈ నెల్లాళ్లూ కోలాహలంగా ఉంటారు. పసుపు పాదాలతో, శనగ వాయినాలతో శ్రావణమాసం ప్రతిరోజూ ఓ పండుగలా సాగిపోతుంది. ఈ ఆదివారం నుంచి శ్రావణమాసం ప్రారంభమవుతున్న సందర్భంగా....

image


చాంద్రమానం ప్రకారం మనకున్న పన్నెండు నెలల్లో అయిదోది శ్రావణమాసం. ఈ మాసంలోని పూర్ణిమనాడు చంద్రుడు శ్రవణ నక్షత్రంలో సంచరిస్తాడు. శ్రావణమాసంతో వర్షరుతువు ప్రారంభమవుతుంది. త్రిమూర్తులలో స్థితికారుడు, దుష్టశిక్షకుడు శిష్టరక్షకుడు అయిన శ్రీమహావిష్ణువుకు, ఆయన దేవేరి శ్రీమహాలక్ష్మికి అత్యంత ప్రీతికరమైన మాసమిది. వివిధ వ్రతాలు, పూజలు ఆచరించడం వల్ల విశేష ఫలితాలను ప్రసాదించే దివ్యమాసం శ్రావణమాసం. శ్రీమహావిష్ణువు జన్మనక్షత్రం శ్రవణం. అటువంటి శ్రవణ నక్షత్రం పేరుతో ఏర్పడిన శ్రావణమాసం శ్రీమహావిష్ణు పూజకు ఉత్క ష్టమైన మాసం.

మాఘమాసంలో ఆదివారాలు, కార్తికమాసంలో సోమవారాలు, మార్గశిరమాసంలో గురువారాలు పుణ్యప్రదమైనవి. శ్రావణమాసంలో మాత్రం మంగళ, శుక్ర, శనివారాలు మహత్తు కలిగినవి.... ప్రధానమైనవి. శ్రావణంలో మంగళవారాల్లో గౌరీదేవిని, శుక్రవారాల్లో లక్ష్మీదేవిని, శనివారాల్లో శ్రీమహావిష్ణువును ప్రత్యేకంగా పూజిస్తారు. 
మాసం మొదటి తిథి అయిన పాడ్యమి నుంచి పౌర్ణమి వరకు ఉండే పదిహేను రోజులనూ శుక్లపక్షం అంటారు. ఇవి ఎంతో విశేషమైనవి. ఒక్కోరోజు ఒక్కోదేవుని పూజించాలని, పవిత్రారోపణోత్సవాలు చేయాలని శాస్త్రాలు చెబుతున్నాయి. పవిత్రం అంటే దర్భలతో తయారు చేసిన వేలి తొడుగు. దర్భ అత్యంత పవిత్రమైనది. అటువంటి దర్భను ఉపయోగించి 108 ముడులతో కాశీదారంలా తయారుచేసి దానితో ఆయాదేవుళ్లను అలంకరించి పూజిస్తారు. 

శుక్లపక్షంలోని పాడ్యమి నుంచి పూర్ణిమ వరకు పూజించవలసిన దేవతల పేర్లు వరుసగా చెప్పాలంటే... పాడ్యమి-బ్రహ్మదేవుడు, విదియ- శ్రియఃపతి, తదియ-పార్వతీదేవి, చవితి- వినాయకుడు, పంచమి-చంద్రుడు, షష్ఠి- సుబ్రహ్మణ్యస్వామి, సప్తమి-సూర్యుడు, అష్టమి- దుర్గాదేవి, నవమి-మాత దేవతలు, దశమి- యమధర్మరాజు, ఏకాదశి-మహర్షులు, ద్వాదశి -శ్రీమహావిష్ణువు, త్రయోదశి-మన్మథుడు, చతుర్దశి -శివుడు, పూర్ణిమ-పిత దేవతలు..... ఈ విధంగా శుక్లపక్షంలోని ఒక్కోరోజుకు ఒక్కోదేవతను పూజించడం వల్ల సంవత్సరంలో చేసే పూజలన్నీ పవిత్రమవుతాయంటారు. ఎటువంటి సమస్యలూ రావని, సంపద వృద్ధి చెందుతుందని చెబుతారు. 
వ్రతాలు, నోములను చేపట్టడానికి శ్రావణం శుభకరమైన మాసం. శ్రావణమాసంలోని మంగళవారాల్లో కొత్తగా పెళ్లి చేసుకున్న ఆడపిల్లలు మంగళగౌరీ వ్రతం చేస్తారు. అయిదేళ్లపాటు కొనసాగించే మంగళగౌరీ వ్రతం సౌభాగ్యాన్ని వృద్ధి చేస్తుందని నమ్ముతారు. ఇంకా పౌర్ణమి తరువాత వచ్చే శుక్రవారం నాడు స్త్రీలందరూ వరలక్ష్మీవ్రతం చేసుకుంటారు. వర్షరుతువులో తప్పనిసరిగా ఆహారంలో తీసుకోవలసిన శనగలను నానబెట్టి మహిళలు పంచుకుంటారు. బురదనీటిలో తిరిగే కాళ్లకు అనారోగ్య సమస్యలు ఏర్పడకుండా ముత్తయిదువలు ఒకరి కాలికి మరొకరు పసుపు పారాణి దిద్దుతారు. వాయినాల పేరుతో స్త్రీల మధ్య ఆప్యాయత, అనురాగాలు వెల్లివిరుస్తాయి.

వేంకటేశ్వరస్వామి భక్తులకు శ్రావణమాసం అతిముఖ్యమైనది. వేంకటేశ్వరుని వద్ద శ్రావణంలోని ఏదో ఒక శనివారం నాడు పిండి దీపారాధన చేస్తారు. బియ్యపు పిండి, నెయ్యి, బెల్లం లేదా చక్కెర కలిపి చలిమిడిలా సిద్ధం చేసుకోవాలి. దానిని ప్రమిదలా నొక్కి తయారు చేసుకుని ఆవునెయ్యి పోసి దీపాలు వెలిగించాలి. శ్రీవేంకటేశ్వరుని శక్తికొద్దీ పూజించి నైవేద్యం సమర్పించాలి. దీపం కొండెక్కిన తరువాత చలిమిడిని ప్రసాదంగా స్వీకరించాలి. మాసాలలో కెల్లా శుభకరమైన శ్రావణమాసంలో ఆచరించిన పూజలు శీఘ్రఫలితాలను ఇస్తాయి.



శ్రీకనకధార-13

Updated By ManamTue, 08/07/2018 - 01:50
  • నమోస్తు నాళీకనిభాననాయై.. నమోస్తు దుగ్ధోదధిజన్మభూమ్యై 

  • నమోస్తు సోమామ తసోదరాయై.. నమోస్తు నారాయణవల్లభాయై 

imageఅమ్మవారు జగదేకసౌందర్యశోభిత. ఆ తల్లి మనస్సు ఎంత నవపల్లవ సమమో, మూర్తి సొందర్యం కూడా అంతే మహత్తరం. అందుకే బాలశంకరులు ఆ తల్లిని అమేయమైన ఉపమానాలతో కీర్తించి నమస్కరించారు. పద్మం, ఏనుగు కుంభస్థలం, ముత్తైదువల పాపిట, మారేడుదళం వెనుక భాగం, గోపృష్టం లక్ష్మీ నివాసస్థానాలని పెద్దలు చెబుతారు. ఆ పద్మాసనస్థ ముఖారవిందం నాళీకనిభతో మెరుస్తుంది. నాళీకం అంటే పద్మం. దాని సౌకుమార్యం, సౌందర్యం లోకవిదితాలే. ఆ సోయగంతో పోటిపడే అందం అమ్మవారిది. అందుకే అమ్మవారు సితోత్ఫుల్లపద్మవదన. అంటే పూర్తిగా వికసించిన తెల్ల కలువ వంటి ముఖసౌందర్యం గలది. ఆ తల్లి పుట్టిన ప్రదేశం పాలకడలి. దేవతలకు, రాక్షసులకు అనేక శుభకరమైన వస్తుతతిని, జీవతతిని అందించిన రత్నార్ణవం.

ఆ పాలకడలిలో పుట్టిన ఆ తల్లి సోయగమూ దుగ్ధసమానమే కదా! ఇక ఆమె తోడుగా పుట్టింది కూడా సామాన్యమైనవారు, సామాన్యమైన నిధులూ కావు. అమృతాన్ని తన కిరణాల్లో వెదజల్లే చంద్రుడు ఆమె తమ్ముడు, సాక్షాత్తు ఆ అమృతమే ఆ తల్లి తరువాత ఉద్భవించిన ఆమె చెల్లెలు. తమ్ముడు, చెల్లెలే అంత ఔన్నత్యం కలవారైతే, వారికి ముందు ఉద్భవించిన అక్కది మరెంత ఘనతో గదా! తన తోడుగా క్షీరసాగరమథనంలో ఉదయించినవన్నీ దేవతా గణాలలోని అధికారులను వరిస్తే, అమ్మవారు ఏకంగా జగత్పతినే వరించింది. జగదేకమాతగా నిలిచింది. చిన్నికూనలమైన మనపై ఆ జగదేక కుటుంబిని ప్రేమ ఎంతగా కురిస్తే అంతగా మనం వృద్ధిలోకి వస్తాం. శుభంకరమైన జీవితాన్ని గడుపుతాం. పద్మం వంటి సోయగమున్న ముఖారవిందాన్ని కలిగిన మాతకు వందనం. క్షీరసముద్ర సంజాతకు నమస్సులు. చందురునికి, అమృతానికి తోబుట్టువైన తల్లికి ప్రణతులు. నారాయణుని ప్రియప్రితికి నమస్కారం.
- డా. కె. పూర్ణప్రజ్ఞాభారతి



దైవవాణి

Updated By ManamTue, 08/07/2018 - 01:01
  • ఆదర్శ కుటుంబం  

imageకుటుంబ బంధం వల్లనే కొత్తతరం ఉనికిలోకి వస్తుంది. బంధాలు, బంధుత్వాలు ఏర్పడతాయి. కుటుంబంలోని వారు తమ తరువాతి తరం వారి కోసం విస్త తమైన బాధ్యతలను, ప్రేమను, త్యాగనిరతిని కలిగి ఉంటారు. అందుకే కుటుంబ వ్యవస్థను ఉత్తమమైన, పటిష్టమైన ఆధారాలపై నిలబెట్టాలంటుంది ఇస్లాం. కుటుంబ వ్యవస్థ పటిష్టమైతే సమాజం పటిష్టమవుతుంది. కుటుంబ వ్యవస్థకు మూలమైన నికాహ్‌ను (వివాహం) ఇస్లాం కేవలం ధర్మబద్ధం చేయడమే కాకుండా అది ఒక సత్కార్యంగా, పుణ్యప్రదమైన ఆరాధనగా పరిగణిస్తుంది. కుటుంబ సంరక్షుకుడు పురుషుడే. సంతానం తల్లిదండ్రులకు విధేయత చూపాలి. పిల్లల బాధ్యతలను తల్లి, హక్కులను తండ్రి నిర్వర్తించాలి. ఆదర్శ కుటుంబ జీవనం అనేది భార్యాభర్తల పవిత్రబంధంతో ప్రారంభమవుతుంది. భార్యపట్ల సత్ప్రవర్తనతో మెలగాలి. ఆమెను గౌరవించాలి. ఆమె ఎడల మేలును, త్యాగబుద్ధిని కలిగి ఉండాలి.

వారితో సద్వర్తనంతో సంసారం చేయండి. (నిసా) విశ్వాసులకు ఇలా బోధించబడింది : మీకు ఏ కారణం చేతనైనా, ఆమె ఇష్టం లేకపోవచ్చు. మీకు ఇష్టం లేని వస్తువులోనే అల్లాహ్ బహుశా మీ కొరకు ఎంతో మేలు పొందుపరిచి ఉండవచ్చు. (దివ్యఖురాన్ 4:19)

ప్రతివారిలో ఏదో బలహీనత ఉంటుంది. అల్లాహ్ పై భారం వేసి జీవితభాగస్వామితో సర్దుకుపోవాలి. కుటుంబంతో సుఖసంతోషాలను పంచుకోవాలి. భార్య ధార్మికత, నైతికత వంటి సుగుణాలను కలిగిఉంటే ఆమె వల్లనే కుటుంబం వర్ధిల్లుతుంది. అందుకే దైవప్రవక్త (స) ఏమన్నారంటే, ‘‘మీ నడవడిలో అందరికంటే ఉత్తములైనవారే విశ్వాసంలో పరిపూర్ణులు. తమ భార్యల ఎడల అత్యధికంగా మంచిగా మెలిగేవారే మీలో అందరి కంటే మంచి నడవడిక కలవారు’’ అని. ప్రవక్తవారి ప్రకారం తల్లిదండ్రుల హక్కులు అల్లాహ్ హక్కులతో సమానమైనవి.
- ముహమ్మద్ లియాఖత్ ఉద్దీన్



జై జగన్నాథ

Updated By ManamMon, 07/09/2018 - 23:22

ఆషాఢంలో జగన్నాథ రథయాత్ర ప్రపంచ ప్రసిద్ధం. పతితపావనుడు, నీలమాధవుడు అని భక్తులంతా కీర్తించే జగన్నాథస్వామి ఆషాఢమాసంలో రెండోరోజున రథయాత్ర చేస్తాడు. సాధారణంగా ఏ ఆలయంలో అయినా ఉత్సవ విగ్రహాలను ఊరేగిస్తారు. పూరీలో మాత్రం మూలవిరాట్టులనే ప్రతి సంవత్సరం రథయాత్రలో ఊరేగిస్తారు. దేవేరులతో కాకుండా తోడబుట్టిన వారితో కలిసి జగన్నాథస్వామి గుండీచా మందిరం వరకు వెళ్లి, తిరిగి రావడమే రథయాత్రలోని ముఖ్య ఉద్దేశ్యం. ఈ శనివారం జగన్నాథ రథయాత్ర సందర్భంగా...

image


జగన్నాథ రథయాత్రకు రెండు రోజులు ముందుగా అమావాస్య నాడు పూరీక్షేత్రంలో దేవతామూర్తుల నేత్రోత్సవం జరుగుతుంది. మరుసటి రోజు ప్రజలకు నవయవ్వన దర్శనం  లభిస్తుంది. ఆషాఢ శుక్ల విదియనాడు ఉదయకాల పూజల తరువాత పెద్దపెట్టున నినాదాలు చేస్తూ విగ్రహాల్ని కదిలిస్తారు. ఆనందబజారు, అరుణస్తంభం మీదుగా అత్యంత కోలాహల వాతావరణంలో ఊరేగిస్తూ రథం వెనక భాగం నుంచి తీసుకువచ్చి రత్నపీఠం మీద అలంకరింపజేస్తారు. ఈ ఉత్సవాన్ని పహండీ అంటారు. ఆ దశలో కులమత భేదాలకు తావుండదు. గుండీచా ఆలయానికి వెళ్లేందుకు సిద్ధమైన సుభద్ర, జగన్నాథ, బలభద్రులు రథారూఢులవుతారు. పరమాత్ముని ముందు సేవకుడిగా మారిన మహారాజు బంగారపు చీపురుతో రథాల లోపల ఊడుస్తాడు. దీన్నే చెరా పహారా అంటారు.

రథ నిర్మాణం
జగన్నాథ రథయాత్రకు అరవై రోజుల ముందు, వైశాఖ బహుళ విదియనాడు పనులు మొదలవుతాయి. పూరీ మహారాజు పూజారుల్ని పిలిపించి, కలప సేకరించాల్సిందిగా ఆదేశిస్తాడు. మొత్తం 13 వేల ఘనపుటడుగుల కలపను జగన్నాథ రథాల నిర్మాణానికి వినియోగిస్తారు. ముందుగా వృక్ష కాండాల్ని 2,188 ముక్కలు చేస్తారు. వాటిలో 832 ముక్కల్ని జగన్నాథుడి రథం కోసం, 763 ముక్కల్ని బలభద్రుడి రథం కోసం, 593 ముక్కల్ని సుభద్రాదేవి రథం కోసం వినియోగిస్తారు. తయారీలో ఎక్కడా యంత్రాల్ని వాడరు. జగన్నాథుడి రథం నందిఘోష. ఎత్తు సుమారు 46 అడుగులు, పదహారు చక్రాలుం టాయి. ఒక్కో చక్రం ఎత్తూ ఆరు అడుగులు. సారథి పేరు దారుక. బలభద్రుడి రథం తాళధ్వజం. సుభద్రాదేవి రథం దేవదళన్. నిర్మా ణం పూర్తయ్యాక రథాల్ని యాత్రకు ఒకరోజు ముందుగా...ఆలయ తూర్పు భాగంలోని సింహ ద్వారం దగ్గర నిలబెడతారు. లాగేందుకు అనువు గా ఒక్కో రథానికీ 250 అడుగుల పొడవు, 8 అంగుళాల మందం ఉన్న తాళ్లను కడతారు.

ఘోషయాత్ర
జగన్నాథ స్వామిని పతితపావనుడు అంటారు. లక్షలాది భక్తులు రథయాత్రలో పాల్గొంటారు. జగన్నాథస్వామి ఆలయం నుంచి సుమారు మూడు కిలోమీటర్ల దూరంలో ఉన్న గుండీచా ఆలయం వరకు రథయాత్ర కొనసాగుతుంది. అందుకు 12 గంటల సమయం పడుతుంది. ఆనాటి రాత్రి ఆలయం బయట రథాల్లోనే మూలవిరాట్టులకు విశ్రాంతినిస్తారు. మర్నాడు పొద్దున మేళతాళాలతో గుడిలోపలికి తీసుకువెళతారు. స్వామి అక్కడ ఏడురోజుల పాటు ఉంటాడు. ఐదోరోజున ఓ ఆసక్తికరమైన విశేషం జరుగుతుంది. ఆలయంలోకి తనతోపాటూ తీసుకెళ్లలేదని స్వామిపై అలిగిన లక్ష్మీదేవి, గుండిచా గుడి బయటి నుంచే జగన్నాథుడిని ఓరకంట దర్శించి.. పట్టలేని కోపంతో స్వామి రథాన్ని కొంతమేర ధ్వంసం చేసి వెనక్కి వెళ్లిపోతుంది. ఈ ముచ్చట అంతా అమ్మవారి పేరిట పూజారులే జరిపిస్తారు. ఆ రోజును హీరాపంచమి అంటారు. వారంపాటు గుండిచాదేవి ఆతిథ్యం స్వీకరించిన సుభద్ర, జగన్నాథ, బలభద్రులు దశమినాడు తిరుగు ప్రయాణం చేస్తారు. దీన్ని బహుదాయాత్ర అంటారు . తరువాత రోజు ఏకాదశినాడు స్వామివార్లను బంగారు ఆభరణాలతో (సునావేష) అలంకరించి దర్శనానికి అనుమతిస్తారు. ద్వాదశినాడు మళ్లీ విగ్రహాలను రత్నసింహాసనంపై ప్రతిష్ఠించడంతో రథయాత్ర పూర్తవుతుంది.



రాహుకాల దీపం అంటే ఏమిటి?

Updated By ManamMon, 07/09/2018 - 23:08
  • దీనిని ఇంట్లో వెలిగించవచ్చా?

imageరాహుకాలం నిడివి రోజుమొత్తంలో తొంబై నిమిషాలు ఉంటుంది.  ఆ సమయంలో రాహుప్రీతి కోసం నిమ్మకాయను మధ్యకు తరిగి, రసం తీసివేయాలి. ఖాళీ అయిన నిమ్మకాయ డిప్పలో ఆవునేతితో లేదా నువ్వుల నూనెతో దీపాన్ని వెలిగించాలి. నిజానికి నవగ్రహాలలో అందరికీ ఈ దీపాలు ఇష్టమైనవే. ఎవరి ముందు దీపారాధన చేసినా అన్నీ శివప్రీతి కలిగిస్తాయి. ఈ నిమ్మకాయ దీపాలను కార్తిక, మార్గశిర మాసాల్లో వెలిగించడం మంచిది. అందులోనూ సోమవారం నాటి ఉదయం 7.30 నుంచి 9.00 గంటల మధ్య కాలంలో చేయడం వల్ల సమస్త దోషాలూ నశిస్తాయి.

 శుభసమయం లేనప్పుడు ఏదైనా పని ప్రారంభించవలసి వచ్చినా, ప్రయాణం చేయవలసి వచ్చినా నిమ్మకాయలో రాహుకాల దీపం వెలిగించడం వల్ల తలపెట్టిన విఘ్నాలు రావని, విజయం పొందుతారని రుద్రయామళ తంత్రం చెబుతోంది. అయితే తెలుగు సంప్రదాయంలో రాహుకాలానికి పట్టింపులేదు.

- డా. అన్నదానం చిదంబర శాస్త్రి, ఆధ్యాత్మిక వేత్త



యాదాద్రీశుని బ్రహ్మోత్సవం

Updated By ManamTue, 02/20/2018 - 02:25

yadadri templeప్రతి సంవత్సరం ఫాల్గుణమాసంలో యాదాద్రి బ్రహ్మోత్సవ, వార్షిక కల్యాణోత్సవాలు జరుగుతాయి. గత శనివారం ఈ ఉత్సవాలు ప్రారంభమయ్యాయి. కాగా వచ్చే శనివారం నాడు యాదాద్రీశునికి కల్యాణం, మరునాడు రథోత్సవం జరుగనున్నాయి. వచ్చే మంగళవారం నాడు నిర్వహించే చక్రస్నానం, శతఘటాభిషేకాలలో వేలాదిగా భక్తులు పాల్గొంటారు.

యాదాద్రి నృసింహుడు జగద్రక్షకడు. శ్రీరాముని బావగారైన రుష్యశృంగ మహర్షిపుత్రుడే యాదమహర్షి. ఆయన తపస్సు ఫలితంగా యాదాద్రి ఏర్పడింది. యాదర్షి పేరుమీదుగా యాదగిరి, యాదాద్రి అని పిలుస్తారు. యాదర్షి కోరిక మేరకు నృసింహస్వామి ఇక్కడజ్వాలానరసింహ, ఉగ్రనరసింహ, లక్ష్మీనరసింహస్వామి, గండభేరుండనరసింహ రూపాలతో వెలిశాడు. పంచనృసింహులు ఒకే క్షేత్రంలో ఉండడం వల్ల యాదాద్రి పంచనృసింహ క్షేత్రమని పిలుస్తారు. స్కాంద, బ్రహ్మాండ పురాణాల ప్రకారం యాదాద్రికృతయుగం నాటి పరమ పవిత్ర క్షేత్రం. 

పంచనారసింహ క్షేత్రం
సర్వాంతర్యామి అయిన శ్రీమహా విష్ణువ ప్రహ్లాదుని కోరిyadadri templeక మేరకు స్తంభంలో ఉదయించి నారసింహనిగా విచ్చేశాడు. ప్రహ్లాదుని కోరిక మేరకు అనేక ప్రాంతాల్లో ఆయన వెలిశాడు. యాదాద్రిలోని గుహలో కృతయుగం నుంచి ఉండే వాడని చెబుతారు. ఆనాడు బ్రహ్మాది దేవతలు ఈ నృసింహస్వామిని ఆకాశగంగతో అభిషేకంచేశారు. ఆయన పవిత్ర పాద తీర్థమే విష్ణుకుండమై దివ్యధారగా యాదాద్రిలో నేటికీ భక్తులను పునీతులను చేస్తోంది.

యాదమహర్షి తపస్సు చేసుకునే కాలంలో ఒక సారి భయంకర ఆకృతిగల రాక్షసుడొకడు మహర్షిని కబళించడానికి రావడంతో భక్తరక్షణార్థం భగవానుడు శ్రీచక్రరాజాన్ని ప్రయోగిం చాడు. అది దివ్యమైన అగ్నిజ్వాలలతో మండి పడుతూ ఆరాక్షసుని శిరస్సును తెంచివేసింది. యాదగిరి శ్రీలక్ష్మీ నరసింహ స్వామి ఆలయగోపురం పైష ట్కోణ ఆకారంలో ఆవిర్భ వించాడు. యాదా ద్రి శిఖరంపై స్వామి సుదర్శ నాన్ని దర్శించుకు న్నంత మాత్రంలో రోగాలు తగ్గిపోతా యని భక్తులు విశ్వసిస్తారు. యుగ యుగాలుగా ఆరాధన లం దుకుంటున్న యాదగిరీశుని సరికొత్త ఆలయం అతి త్వరలో రూపొందబోతోంది.
అంగరంగ వైభవం

yadadri templeయాదాద్రిలోన వాహ్నిక దీక్షతో 11రోజులపాటు బ్రహ్మోత్సవాలు నిర్వహిస్తారు. ప్రతిసంవత్సరం ఫాల్గు ణశుద్ధవిదియ నుంచి ద్వాదశివరకూ బ్రహ్మోత్సవాలు జరుగుతాయి. ఈ సంవత్సరం బ్రహ్మోత్సవాలను అంకురారోపణతో మొదలయ్యాయి. ధ్వజారోహణం నుంచి శృంగారడోలోత్సవం వరకూ వివిధ కార్యక్రమా లు ఈ పదకొండు రోజుల్లో చోటుచేసుకుం టాయి. ఈ శుక్రవారంనాడు ఎదుర్కోలు మహోత్సవం, శనివారం తిరుకల్యాణ మహోత్సవం, వచ్చే ఆదివారం దివ్య విమాన రథోత్సవం ఉంటాయి. ప్రతిరోజూ వాహన సేవలుంటాయి. ఆలయనిర్మాణ పనులకు ఆటంకం కలగకుండా ఉండేందుకు, స్వామి కల్యాణాన్ని భక్తులందరూ చూసి తరించేందుకు వీలుగా దేవస్థానం అన్ని ఏర్పాట్లుచేస్తోంది.





Related News