nara lokesh

లోకేశ్‌కు ఏం తెలుసని?: పవన్ కల్యాణ్

Updated By ManamMon, 10/15/2018 - 18:01
Pawan kalyan speech in JanaSena Kavathu

రాజమండ్రి : జనసేన అధ్యక్షుడు పవన్ కల్యాణ్ ‘జనసేన కవాతు’ సాక్షిగా మరోసారి ముఖ్యమంత్రి చంద్రబాబు నాయుడు, ఆయన కుమారుడు లోకేశ్‌పై తీవ్రస్థాయిలో విరుచుకుపడ్డారు. సోమవారం ధవళేశ్వరం బ్రిడ్జిపై కవాతు అనంతరం ఆయన బహిరంగ సభలో ప్రసంగించారు. పవన్ ఈ సందర్భంగా టీడీపీపై విమర్శనాస్త్రాలు ఎక్కుపెట్టారు. మీ కొడుకును ముఖ్యమంత్రిని చేయడానికా నేను జనసేన పార్టీ పెట్టింది అంటూ ఆయన ధ్వజమెత్తారు. 

జనసేన ఎప్పుడూ పల్లకి మోస్తూనే ఉండాలా? అని సూటిగా ప్రశ్నించారు. నేతలు తప్పుడు వాగ్ధానాలతో రగిలి రగిలి జనసేన ఆవిర్భవించిందని పవన్ కల్యాణ్ అన్నారు. భరిస్తాం...సహిస్తాం... ఎక్కువ చేస్తే తాట తీస్తాం అంటూ ఆయన హెచ్చరించారు. దౌర్జన్యాన్ని చీల్చిచండాడే కొదమ సింహాలే తన జనసేన సైనికులు అని పవన్ పేర్కొన్నారు. 

‘నన్ను సినిమా యాక్టర్ అంటున్నారు సరే...మరి లోకేశ్‌‌కు ఏం తెలుసు?. పంచాయతీ ఎన్నికల్లో పోటీ చేయని నారా లోకేశ్‌ను పంచాయతీ రాజ్ శాఖమంత్రిని చేశారు. నేను మీకు మద్దతు ఇస్తే...మీరు నన్ను, మా అమ్మను తిట్టించారు. అవినీతి గురించి గతంలో హెచ్చరించాను. నాకు ముఖ్యమంత్రి పదవి అలంకారం కాదు. ఓ కానిస్టేబుల్ కొడుకు సీఎం ఎందుకు కాలేడు?. లోకేశ్, జగన్‌లా నాకు సీఎం పదవి వారసత్వం కాదు. గత ఎన్నికల్లో చంద్రబాబుకు మద్దతు ఇచ్చినా ఎలాంటి పదవులు అడగలేదు. 

రాష్ట్రానికి మంచి పాలన ఇవ్వాలనే చంద్రబాబును కోరాను. ఏ విషయంలోనూ చంద్రబాబు నన్ను సంప్రదించలేదు. అవినీతిపై ప్రశ్నిస్తే...నేను హఠాత్తుగా మారిపోయానంటున్నారు. రాష్ట్రంలో ఏ మూలకు వెళ్లినా జన్మభూమి కమిటీలు దోచుకుంటున్నాయి. అవి జన్మభూమి కమిటీలా?... గుండా కమిటీలా? . రాష్ట్రంలో ఎక్కడికి వెళ్లినా మౌలిక సదుపాయాలు కరువు. విజన్-2020లో చెప్పినట్లు ఉద్యోగాలు, ఉపాధి కల్పన ఏమీలేవు.’ అని పవన్ మండిపడ్డారు.



నారా లోకేశ్ అమెరికా పర్యటన రద్దు

Updated By ManamMon, 10/15/2018 - 08:51

Nara Lokeshఅమరావతి: మంత్రి నారా లోకేశ్ అమెరికా పర్యటన రద్దు అయ్యింది. ఈ నెల 17,18,19 తేదీల్లో అమెరికాలో జరగనున్న వరల్డ్ ఫుడ్ ప్రైజ్ కార్యక్రమంలో మంత్రి పాల్గొనాల్సి ఉంది. అయితే శ్రీకాకుళం జిల్లాలో తిత్లీ తుఫాను ప్రభావిత ప్రాంతాల్లో సహాయక కార్యక్రమాల్లో నిమగ్నమైన ఉన్న నారా లోకేశ్.. పూర్తి స్థాయిలో గ్రామాలు కోలుకొని, సాధారణ స్థితికి వచ్చే వరకు అక్కడే ఉండాలని నిర్ణయం తీసుకున్నారు. ఈ నేపథ్యంలో అమెరికా టూర్‌ను రద్దు చేసుకున్నారు.

కాగా వ్యవసాయ రంగంలో విశిష్ట సేవలు అందించిన వారికి వరల్డ్ ఫుడ్ ప్రైజ్ అత్యున్నత పురస్కారం ఇవ్వనుంది. ఈ కార్యక్రమంలో భారతీయ వ్యవసాయ రంగం- టెక్నాలజీ అనుసంధానంతో పాటు దేశ వ్యవసాయ రంగంలో వస్తున్న మార్పులపై కీ నోటు ప్రసంగం ఇచ్చేందుకు మంత్రి నారా లోకేశ్‌కు వరల్డ్ ఫుడ్ ప్రైజ్ నిర్వాహకులు ఆహ్వానం పంపారు. ఇందుకోసం మూడు రోజులు అమెరికాకు వెళ్లేందుకు నారా లోకేశ్ నిర్ణయించుకున్నారు.



తుపాను ప్రభావిత ప్రాంతాల్లో లోకేశ్ పర్యటన

Updated By ManamSat, 10/13/2018 - 20:31

Nara Lokesh, Tour by bike, Titli floods areas, palasa floods పలాస: శ్రీకాకుళం జిల్లాలోని ‘తిత్లీ’ తుపాను ప్రభావిత ప్రాంతాల్లో మంత్రి నారా లోకేశ్‌ పర్యటించారు. రట్టి గంగవాడ, ఎం గొంగాడ, చిన్నబిడం, బాహడ పల్లె, సువర్ణపురం, మందస మండలం హరిపురంతో పాటు మరికొన్ని ఉద్దానం గ్రామాల్లో లోకేశ్ పర్యటించారు. ఈ సందర్భంగా లోకేశ్‌తో పాటు బైక్‌పై ఎంపీ రామ్మోహన్‌ నాయుడు కూడా తిరిగారు. గ్రామాల్లో తిరుగుతూ ఎప్పటికప్పుడు బాధితులు, రైతులతో మాట్లాడి వారి సమస్యలను లోకేశ్ అడిగి తెలుసుకున్నారు. కూలిపోయిన కొబ్బరి, జీడి, మామిడి తోటలను మంత్రి పరిశీలించారు. తుపానుతో తీవ్రంగా నష్టపోయామని తమను ఆదుకోవాలని బాధితులంతా లోకేశ్‌తో మొరపెట్టుకున్నారు.

విద్యుత్ పునరుద్ధరణ జరిగే లోపు ప్రజలకు కావాల్సిన ప్రత్యామ్నాయ ఏర్పాట్లపై లోకేశ్ దృష్టి పెట్టారు. ఇతర జిల్లాల నుంచి వీలైనన్ని జనరేటర్లు సమీకరించి తాగునీటి సరఫరాకి ఎలాంటి ఇబ్బందులు లేకుండా చర్యలు తీసుకుంటామని మంత్రి లోకేశ్ హామీ ఇచ్చారు. రోడ్ల మరమ్మతులు, పారిశుద్ధ్యం పనులు వేగవంతం అయ్యేలా అక్కడికక్కడే మంత్రి ‌అధికారులకు ఆదేశాలిచ్చి చర్యలు తీసుకున్నారు. గ్రామాల్లో చెత్త తొలగింపు, పారిశుధ్యం పనుల కోసం ఇతర జిల్లాల నుంచి ప్రత్యేక బృందాలను రప్పించాల్సిందిగా ఆధికారులను ఆదేశించారు.



వెంటనే పనులు ప్రారంభించండి: నారా లోకేశ్

Updated By ManamSat, 10/13/2018 - 09:58

Nara Lokeshశ్రీకాకుళం: తిత్లీ తుఫాను ప్రభావిత ప్రాంతాల్లో చేపడుతున్న సహాయక కార్యక్రమాలపై మంత్రి నారా లోకేశ్ సమీక్షా నిర్వహించారు. అందులో పంచాయితీ రాజ్, గ్రామీణ తాగునీటి సరఫరా, గ్రామీణాభివృద్ధి శాఖలకు చెందిన అధికారులు పాల్గొన్నారు. ఈ సందర్భంగా నారా లోకేశ్ మాట్లాడుతూ.. 10గంటలకు అన్ని గ్రామాల్లో తాగునీటి పథకాలు వినియోగంలోకి రావాలని అన్నారు. నీటి సరఫరా కోసం అందుబాటులో ఉన్న అగ్నిమాపక వాహనాలు సైతం వినియోగించాలని తెలిపారు.

తుఫాను ప్రభావంతో దెబ్బతిన్న 116కిలోమీటర్ల మేర గ్రామీణ రోడ్లు వెంటనే మరమ్మత్తులు చేయాలని, సాయంత్రం 4గంటల లోపు అన్ని గ్రామాల్లో రోడ్ల పునరుద్దరణ చెయ్యాలని సూచించారు. అలాగే గ్రామాల్లో అంటు వ్యాధులు వ్యాప్తి చెందకుండా చెత్త కుంపల తొలగింపు, మురుగు కాలువల పూడికతీత, పొదల తొలగింపు, రహదారులు పరిశుభ్రంగా ఉంచాలని తెలిపారు. బ్లీచింగ్, దోమల నివారణకు ఫాగింగ్ అన్ని గ్రామాల్లో యుద్ధప్రాతిపదికన చేపట్టాలని పేర్కొన్నారు.



ఆపరేషన్ గరుడలో భాగంగానే ఐటీ దాడులు

Updated By ManamFri, 10/12/2018 - 11:49

Nara Lokeshహైదరాబాద్: టీడీపీ నేతలపై ఐటీ దాడులను ఐటీ మంత్రి నారా లోకేశ్ ఖండించారు. ఆపరేషన్ గరుడలో భాగంగా ఆంధ్రులపై మోదీ ఈ దాడులు చేస్తున్నారని నారా లోకేశ్ మండపడ్డారు. హోదాతో పాటు ఇచ్చిన 18హామీలు నెరవేర్చాలని అని నిలదీసినందుకు మోదీ ఏపీపై కక్ష కట్టారని ఆయన అన్నారు. అందులో భాగంగా మొన్న బీద మస్తాన్ రావు, నిన్న సుజనా చౌదరి, ఈ రోజు సీఎం రమేశ్‌లపై దాడులు చేస్తున్నారని లోకేశ్ విమర్శించారు.

ఉక్కు పరిశ్రమ కోసం సీఎం రమేశ్ దీక్ష చేసి ఈ రోజుకు వంద రోజులు పూర్తయ్యిందని అయినా కేంద్రంలో చలనం లేదని లోకేశ్ అన్నారు. ఏపీకి పెట్టుబడులు రాకుండా చేయాలని అనుకుంటున్న మోదీ.. రాష్ట్రంలోని పారిశ్రామికవేత్తలు, పరిశ్రమలపై ఐటీ దాడులు చేయిస్తున్నారని పేర్కొన్నారు. ఎన్ని ఇబ్బందులు పెట్టినా హోదా సాధనలో వెనక్కి తగ్గేది లేదని.. కేంద్రం మెడలు వంచైనా హోదా సాధిస్తామని చెప్పారు. ఈ మేరకు సోషల్ మీడియాలో ట్వీట్ చేశారు నారా లోకేశ్. 



జగన్, పవన్ కలిసినా మేమే గెలుస్తాం

Updated By ManamFri, 10/12/2018 - 09:56

Nara Lokeshన్యూఢిల్లీ: రానున్న అసెంబ్లీ ఎన్నికల్లో వైఎస్సార్‌సీపీ అధినేత వైఎస్ జగన్, జనసేనాని పవన్ కల్యాణ్‌ పొత్తు పెట్టుకున్నా.. టీడీపీనే ఘన విజయం సాధిస్తుందని మంత్రి నారా లోకేశ్ జోస్యం చెప్పారు. ఈ ఎన్నికల్లో జగన్, పవన్ కలిసి పోటీ చేసినా.. టీడీపీ 150సీట్లు వస్తాయని అన్నారు. వరల్డ్ ఎకనమిక్ ఫోరమ్ సదస్సు కోసం ఢిల్లీ వెళ్లిన ఆయన ఈ వ్యాఖ్యలు చేశారు.

తమ అవసరాలు తీర్చుకునేందుకు కలిసేవారిని ప్రజలు ఆదరించరని అన్న నారా లోకేశ్.. జగన్ మాటలకు విలువలేదని, పవన్‌కు తానేం మాట్లాడుతున్నానన్న విషయంలో కూడా కనీస అవగాహన లేదని విమర్శించారు. ఇక వేగవంతమైన నిర్ణయాలు తీసుకుంటున్న కారణంగానే ఏపీ అభివ‌ృద్ధి విషయంలో ముందుందని నారా లోకేశ్ చెప్పారు. రాష్ట్రంలో పరిశ్రమలు నెలకొల్పేందుక అన్ని రకాల అనువైన వాతావరణం ఉన్నందు వల్ల ప్రపంచ ప్రసిద్ధి చెందిన కంపెనీలు రాష్ట్రానికి వస్తున్నాయని తెలిపారు.



ఆ ఇద్దరికి ఓటిస్తే.. బీజేపీకి ఓటేసినట్టే: లోకేశ్

Updated By ManamSat, 09/29/2018 - 19:53

Lokesh babu, Ys jagan mohan reddy, Pawan Kalyan, Nara Lokesh, Vote to BJPతాడేపల్లిగూడెం: ఏపీ ప్రతిపక్షనేత వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి, జనసేన అధ్యక్షుడు పవన్ కల్యాణ్‌కు ఓటేస్తే.. ఆ ఓటు బీజేపీకి వేసినట్టే అవుతుందని మంత్రి నారా లోకేశ్ వ్యాఖ్యానించారు. ఏపీ రాష్ట్రానికి అన్యాయం చేస్తున్న కేంద్రంలోని బీజేపీ ప్రభుత్వాన్ని మోదీ దత్త పుత్రుడు పవన్‌ కల్యాణ్‌, అవినీతి పుత్రుడు జగన్‌ ఒక్క మాట కూడా అనరని ఆయన విమర్శించారు.

జగన్‌, పవన్‌లకు ఓటేస్తే.. ఆ ఓటు కమలానికే చేరుతుందని అన్నారు. శనివారం పశ్చిమగోదావరి జిల్లా తాడేపల్లిగూడెంలో ఏర్పాటు చేసిన టీడీపీ ధర్మపోరాట సభలో లోకేశ్ మాట్లాడారు. ఆంధ్రప్రదేశ్‌కు కేంద్రం అన్యాయం చేస్తుందని ధ్వజమెత్తారు. రాష్ట్రంలో బీజేపీకి ఒక్క సీటు కూడా గెలవలేని పరిస్థితి ఉందని, అయినప్పటికీ జాతీయ పార్టీతో పొత్తు పెట్టుకుంటే రాష్ట్రానికి న్యాయం జరుగుతుందని భావించినట్టు తెలిపారు.

ఏపీకి ప్రత్యేక హోదాతో పాటు విభజనచట్టంలోని 18 హామీలు నెరవేరుస్తారనే బీజేపీతో పొత్తు పెట్టుకున్నామనీ, నాలుగేళ్లు ఎదురుచూసినా ప్రయోజనం లేకుండా పోయిందన్నారు. ప్రత్యేక హోదాకు మించిన ఆర్థికసాయం చేస్తామని నమ్మించి.. మిగతా రాష్ట్రాలకు ప్రత్యేక హోదా కొనసాగిస్తూ ఏపీకి నమ్మకద్రోహం చేశారని మండిపడ్డారు. చంద్రబాబుది ధర్మపోరాటమైతే.. మోదీది అధర్మ పోరాటమన్నారు. న్యాయం చేయమని అడిగితే బాబ్లీ కేసును తెరపైకి తీసుకొచ్చి ఇబ్బందులు పెట్టేందుకు ప్రయత్నిస్తున్నారని ఆరోపించారు. టీడీపీ జోడెద్దుల బండి అని, ఓవైపు సంక్షేమం, మరోవైపు అభివృద్ధి కార్యక్రమాలతో ముందుకెళ్తున్నామని లోకేశ్ చెప్పారు. 



చంద్రబాబు, లోకేశ్‌పై పిల్ ఉపసంహరణ

Updated By ManamWed, 09/26/2018 - 11:20
 chandrababu, nara lokesh-manam telugu news

హైదరాబాద్ : టీడీపీ అధ్యక్షుడు, ముఖ్యమంత్రి చంద్రబాబు నాయుడు, ఆయన తనయుడు  పంచాయతీరాజ్, ఐటీ శాఖ మంత్రి నారా లోకేశ్‌పై దాఖలైన పిల్‌ను పిటిషన్‌దారు ఉపసంహరించుకున్నారు. ఆరోపణలపై సరైన ఆధారాలు లేనందున, పూర్తి ఆధారాలతో రావాలని న్యాయస్థానం సూచించడంతో పిటిషనర్ రిటైర్డు న్యాయాధికారి, ముందడుగు ప్రజాపార్టీ వ్యవస్థాపక అధ్యక్షులు జె.శ్రవణ్‌కుమార్ తాను దాఖలు చేసిన పిటిషన్‌ను వెనక్కి తీసుకున్నారు. , 

కాగా చంద్రబాబు నాయుడు,  నారా లోకేశ్ కూడబెట్టిన అక్రమాస్తులపై సీబీఐ, ఈడీ (ఎన్‌ఫోర్స్‌మెంట్ డైరెక్టరేట్)లతో దర్యాప్తునకు ఆదేశించాలని కోరుతూ హైకోర్టులో ప్రజాహిత వ్యాజ్యం దాఖలైన విషయం తెలిసిందే. కాగితాలకే పరిమితం అయిన కంపెనీలకు అత్యంత ఖరీదైన వేల ఎకరాల భూములు కేటాయించి రూ. 25 వేల కోట్లను నారా లోకేశ్ కూడబెట్టారని, ఈ బాగోతానికి అధికారికంగా సీఎం చంద్రబాబు, తెరవెనుక కీలకపాత్రధారిగా ఏపీ నాన్ రెసిడెంట్ తెలుగు సొసైటీ (ఏపీఎన్‌ఆర్‌టీ) సీఈఓ వేమూరి రవికుమార్ ఉన్నారని పిల్‌లో ఆరోపణలు చేశారు.



బాబు..లోకేశ్‌లపై పిల్!

Updated By ManamTue, 09/25/2018 - 01:18
  • సీబీఐ, ఈడీ విచారణ జరిపించాలి పిల్‌లో మాజీ న్యాయాధికారి శ్రవణ్‌కుమార్

babu-lokeshహైదరాబాద్: ఏపీ ముఖ్యమంత్రి చంద్రబాబునాయుడు, ఆయన కుమారుడు, పంచాయతీరాజ్, ఐటీ శాఖ మంత్రి నారా లోకేశ్ కూడబెట్టిన అక్రమాస్తులపై సీబీఐ, ఈడీ (ఎన్‌ఫోర్స్‌మెంట్ డైరెక్టరేట్)లతో దర్యాప్తునకు ఆదేశించాలని కోరుతూ హైకోర్టులో ప్రజాహిత వ్యాజ్యం దాఖలైంది. కాగితాలకే పరిమితం అయిన కంపెనీలకు అత్యంత ఖరీదైన వేల ఎకరాల భూములు కేటాయించి రూ. 25 వేల కోట్లను నారా లోకేశ్ కూడబెట్టారంటూ రిటైర్డు న్యాయాధికారి, ముందడుగు ప్రజాపార్టీ వ్యవస్థాపక అధ్యక్షులు జె.శ్రవణ్‌కుమార్ పిల్ దాఖలుచేశారు. ఈ బాగోతానికి అధికారికంగా సీఎం చంద్రబాబు, తెరవెనుక కీలకపాత్రధారిగా ఏపీ నాన్ రెసిడెంట్ తెలుగు సొసైటీ (ఏపీఎన్‌ఆర్‌టీ) సీఈఓ వేమూరి రవికుమార్ ఉన్నారని పిల్‌లో ఆరోపించారు. చంద్రబాబు, లోకేశ్, రవికుమార్ కలిసి దురుద్దేశంతోనే ఐటీ పాలసీని రూపొందించి ప్రజలను, ముఖ్యంగా నిరుద్యోగుల్ని మోసం చేశారని ఆరోపించారు. ఏపీఎన్‌ఆర్‌టీ ద్వారా వచ్చిన ఫైళ్లను సత్వరమే క్లియర్ అయ్యేలా చట్టంలో మార్పులు చేసి ఎన్నో కంపెనీలను ఆకర్షించేలా చేసి మోసానికి తెర తీశారన్నారు. విశాఖలో ఎకరం రూ.15 కోట్ల విలువైన భూమిని రూ.3.5 లక్షలకే ఇచ్చారని.. అలా మొత్తం రూ.500 కోట్ల విలువైన 40 ఎకరాల్ని ఫ్రాంక్లిన్ టెంపుల్టన్ ఇన్వెస్ట్‌మెంట్స్ అండ్ ఇన్నోవా సొల్యూషన్స్‌కు ధారాదత్తం చేశారని ఆయన ఆరోపించారు. ఇంత ఖరీదైన భూమి ఇచ్చేందుకు విధించిన షరతులు విస్తుపోయేలా ఉన్నాయన్నారు. రెండున్నర వేల మందికి ఉద్యోగాలు ఇస్తే ఆ కంపెనీపై ప్రభుత్వ అజమాయిషీ ఏమీ ఉండదని, భూమిని అమ్ముకునేందుకు కూడా ఆ కంపెనీకి అధికారం వచ్చేస్తుందని.. ఇలాంటి షరతుతో రూ.500 కోట్ల విలువైన ప్రభుత్వ భూమిని నారా చంద్రబాబు, లోకేశ్‌బాబులు అప్పనంగా ఇచ్చేశారని పిల్‌లో ఆరోపించారు. టీడీపీకి నాయకుడికి చెందిన వీబీసీ ఫెర్టిలైజర్స్ కంపెనీకి రూ.100 కోట్ల విలువైన భూమి ఇచ్చేశారని, ఏపీఐఐసీ 57, 836 ఎకరాలకు వివిధ కంపెనీలకు ఇచ్చేసిందని తెలిపారు. ఏ కంపెనీకి ఎంత భూమి ఇచ్చారో వివరాలు ఇవ్వడం లేదని, సమాచార హక్కు చట్టం కింది కోరినా ఇవ్వడం లేదని అన్నారు. చంద్రబాబు పాలనలో అప్పులు అక్షరాలా అనూహ్యంగా రూ. 2.06 లక్షల కోట్లకు చేరుకున్నట్లు కేంద్రం రాజ్యసభలో చెప్పిందని తెలిపారు. 2015-16 సంవత్సరంలో లోకేశ్ ఆస్తి రూ. 71.19 లక్షలు, ఆయన భార్య ఆస్తి రూ. 4.33 కోట్లుగా ఉంటే ఆ తర్వాత ఏడాది లోకేష్‌బాబు ఆస్తి రూ.303.36 కోట్లకు పెరిగిపోయిందని, ఆయన భార్య బ్రాహ్మణి ఆస్తి రూ.4.33 కోట్ల నుంచి రూ.27 కోట్లకు చేరిందని తెలిపారు. ఏడీఆర్ రిపోర్టు మేరకు చంద్రబాబు దేశంలోనే అత్యంత ధనవంతుడైన ముఖ్యమంత్రి అని చెప్పారు. ఒక పక్క చంద్రబాబు, మరోవైపు ఆయన కుమారుడు లోకేశ్‌ల ఆస్తి విపరీతంగా పెరిగిందని తెలిపారు. అక్రమార్జన అయితే వేల కోట్లకు చేరిందని అన్నారు. ప్రభుత్వం అప్పుల్లో ఊబిలో కూరుకుపోతుంటే వారి ఆస్తి మాత్రం పెరుగుతోందని ఆరోపించారు. ఈ బాగోతంపై సీబీఐ, ఈడీలతో కూడిన సిట్‌తో దర్యాప్తునకు ఆదేశాలు జారీ చేయాలని పిల్‌లో హైకోర్టును కోరారు. 

లోకేశ్ మంత్రి అయ్యాక.. 
లోకేశ్ ఎమ్మెల్సీ అయ్యాక చంద్రబాబు తన మంత్రివర్గంలో చోటు కల్పించారని, వెంటనే ప్రవాస భారతీయుడు వేమూరి రవికుమార్‌ను సలహాదారుడిగా నియమించడమే కాకుండా ఏపీఎన్‌ఆర్‌టీకి చైర్మన్ పదవి కట్టబెట్టారని కూడా అన్నారు. ఐటీ కంపెనీల్లో ఉద్యోగ కల్పన పేరుతో కాగితాలకే పరిమితమైన షెల్ కంపెనీలకు అత్యంత ఖరీదైన భూములు కేటాయించేశారని తెలిపారు. ఉద్యోగ కల్పన చేశామని తప్పుడు లెక్కలు చెబుతున్నారని... వాస్తవానికి వేలు కాదు కదా వందల్లో కూడా ఉద్యోగాలు ఇవ్వలేదని ఆయన అన్నారు. వెబ్‌సైట్‌లో వివరాలేమీ లేకుండా అంతా గుట్టుగా ఉంచారని, వివరాలు వెబ్‌సైట్‌లో పొందుపరిస్తే ప్రభుత్వం మోసం చేసిందని తేలిపోతుందని చెప్పారు. అధికారంలోకి వస్తే ఏకంగా లక్ష ఉద్యోగాలు ఇస్తామని చంద్రబాబు ప్రజలను నమ్మించి మోసం చేశారని, పాలనా పగ్గాలు అందుకున్నాక కాగితాల మీద ఉన్న కంపెనీలకు భూకేటాయింపులకు వీలుగా ఉన్న చట్టాల్ని మార్చేశారని పేర్కొన్నారు. ఉద్యోగ కల్పన పేరుతో నారా లోకేశ్, వేమూరి రవికుమార్ నిరుద్యోగులకు తీరని అన్యాయం చేశారన్నారు. ఏపీలో పెట్టుబడులకు రవికుమార్‌నే మధ్యవర్తిగా పెట్టుకుని ఈ దారుణాలకు తెరతీశారని ఆరోపించారు. చంద్రబాబు, లోకే శ్‌ల తరఫున రవికుమారే మాట్లాడుతున్నారని, ‘మీకిది-నాకిది’ అనే తరహాలో క్విడ్‌ప్రోకో పద్ధతిలో అవినీతికి పాల్పడ్డారని తీవ్రంగా ఆరోపించారు. ఈ బాగోతంపై సీబీఐ, ఈడీ దర్యాప్తులకు ఆదేశించాలని పిల్‌లో హైకోర్టును కోరారు. ఇందులో నారా చంద్రబాబునాయుడు, నారా లోకేశ్, ఐటీ శాఖ మాజీమంత్రి పల్లె రఘునాథరెడ్డి, ఏపీ నాన్ రెసిడెంట్ తెలుగు సొసైటీ (ఏపీఎన్‌ఆర్‌టీ) సీఈఓ వేమూరి రవికుమార్ లను వ్యక్తిగత ప్రతివాదుల్ని చేశారు.



యువతకు నైపుణ్యం మెండు

Updated By ManamWed, 09/19/2018 - 00:52
  • ఏపీలో పరిశ్రమల స్థాపనకు అనుకూలత

  • వరల్డ్ ఎకనామిక్ ఫోరం సమావేశంలో లోకేష్

lokeshఅమరావతి: ఆంధ్రప్రదేశ్‌లో నైపుణ్యం ఉన్న యువతీ, యువకులు మెండుగా ఉన్నారని.. పరిశ్రమల స్థాపనకు ఎన్నో అనుకూలతలు ఉన్నాయని వరల్డ్ ఎకనామిక్ ఫోరం న్యూ ఛాంపియన్స్ వార్షిక సమావేశంలో మంత్రి నారా లోకేష్ వెల్లడించారు. విదేశీ పర్యటనలో భాగంగా ఈ సమావేశంలో మంత్రి పాల్గొని.. ఆంధ్రప్రదేశ్‌లో ఐటీ రంగానికి ఇస్తున్న విశిష్టత గురించి పలు కంపెనీ నిర్వాహకులకు వివరించారు. మ్యాప్ కంటెంట్, ట్రాకింగ్, లొకేషన్ సర్వీసెస్, ఐటీ సర్వీసెస్ సేవలు అందిస్తున్న హియర్ టెక్నాలజిస్ హెడ్ ఆఫ్ గ్లోబల్ ఆపరేషన్స్ మెలోడీతో మంత్రి నారా లోకేష్ భేటీ అయ్యారు. ప్రస్తుతం బెంగుళూరులో హియర్ టెక్నాలజిస్ కార్యకలాపాలు కొనసాగుతున్నాయి. ఆంధ్రప్రదేశ్‌లో విశాఖపట్నం ఐటీ హబ్‌గా మారుతుందని లోకేష్ చెప్పారు. ఫ్రాంక్లిన్, కాన్డ్యూయెంట్ లాంటి కంపెనీలు విశాఖపట్నానికి వచ్చాయని తెలిపారు. ఇన్నోవేషన్‌ని వే ఆఫ్ లైఫ్‌గా (నూతన ఆవిష్కరణలు జీవితంలో ఒక భాగంగా)మార్చేందుకు అనేక ప్రయత్నాలు చేపడుతున్నామని తెలియజేశారు. అక్టోబర్‌లో జరిగే ఫింటెక్ ఛాలెంజ్ ఈవెంట్ లో పాల్గొనాలని వారిని ఆహ్వానించారు. ఆంధ్రప్రదేశ్‌కు వచ్చి జరుగుతున్న అభివృద్ధి చూసిన తరువాత ఏపీలో పెట్టుబడులు పెట్టే అంశంపై నిర్ణయం తీసుకోవాలని మంత్రి నారా లోకేష్ కోరారు. వరల్డ్ ఎకనామిక్ ఫోరం ప్రాజెక్ట్ లీడ్, వరల్డ్ ఎకనామిక్ ఫోరం జయంత్ నారాయన్‌తో మంత్రి భేటీ అయ్యారు. మొదటిసారి ఇండియాలో సెంటర్ ఆఫ్ ఏక్సలెన్స్‌ను ముంబై కేంద్రంగా సెంటర్ ఆఫ్ ఎక్సలెన్స్ ఫర్ డ్రోన్స్, బ్లాక్ చైన్, ఆర్టిఫిసియల్ ఇంటెలిజెన్స్ ఏర్పాటు చేస్తున్నారు. ఏఐఐబీ బ్యాంక్ వైస్ ప్రెసిడెంట్ వాన్ ఆమ్స్‌బర్గ్‌తో మంత్రి భేటీ అయ్యారు. రాష్ట్రంలో జరుగుతున్న అభివద్ధి గురించి మంత్రి నారా లోకేష్ వివరించారు. రాష్ట్ర అభివృద్ధికి సహకరించాలని మంత్రి లోకేష్ కోరగా.. ఇందుకు వాన్ ఆమ్స్‌బర్గ్ సమ్మతి తెలిపారు.





Related News