gangster

‘శివా’జ్ఞ లేనిదే...!

Updated By ManamMon, 09/17/2018 - 14:36
  •     ఏ పని జరగాలన్నా అనుమతి ఉండాల్సిందే

  •     పోలీస్ అధికారిగా గ్యాంగ్‌స్టర్‌తో సంబంధాలు

  •     భూ దందాలు, సెటిల్‌మెంట్లతో ఇబ్బడిముబ్బడిగా అక్రమార్జన

  •     వాలంటరీ రిటైర్మెంట్‌తో రాజకీయ ప్రవేశం

  •     అధికార పార్టీలో చేరి చక్రం తిప్పుతున్న నేత

  •     చిన్న.. పెద్ద.. ఏ పనైనా ఆయన కనుసన్నల్లోనే

  •     ఛోటా నేతలతో కలిసి ఇష్టారాజ్యంగా ఇసుక దందా

  •     నీరు-చెట్టు పనులన్నీ బంధువులు.. విపక్షాలకే

  •     పనులన్నింటిలో 14% వాటా    ఆయునకు ఇవ్వాల్సిందే

  •     భగ్గుమంటున్న అధికార పార్టీ 

 Land Settlements In Kurnool district

కర్నూలు : ఆయన ఒకప్పుడు ఓ పోలీసు ఉన్నతాధికారి. విధి నిర్వహణలో ఉండగా, పేరుమోసిన ఓ కరడుగట్టిన గ్యాంగ్‌స్టర్‌తో పరిచయం ఏర్పడింది. అక్కడ నుంచి ఆయన రాతే మారిపోయింది. గ్యాంగ్‌స్టర్‌తో జతకట్టి భూదందాలు, సెటిల్‌మెంట్లు చేయించి కోట్లు ఆర్జించారు. ఉద్యోగానికి మధ్యలోనే స్వస్తి పలికి, అడ్డంగా సంపాదించిన డబ్బును కాపాడుకునేందుకు రాజకీయాల్లోకి ప్రవేశించారు. 2014 ఎన్నికల ముందువరకు ఒక పార్టీలో ఉండి.. తర్వాత మరో పార్టీలో చేరిపోయారు. అధికార దండం చేతికందడంతో మరింత రెచ్చిపోతున్నారు. 

నియోజకవర్గంలో అన్ని శాఖల్లో అనుకూలమైన అధికారులను వేయించుకుని చక్రం తిప్పుతున్నారు. ఏ పని కావాలన్నా ముందు ‘శివా’జ్ఞ లేనిది ఏమీ జరగడం లేదు. ఇసుక దందా, భూ ఆక్రమణలు, నీరు-చెట్టు పనులకు ఛోటా నేతలను అడ్డపెట్టుకుని అందినకాడికి దండుకుంటున్నారు. సొంతపార్టీ వారికంటే అవతలివాళ్లే ముద్దంటూ.. ప్రతి పనిలో సగం వాటా ఇస్తున్నారు. దీంతో సొంత పార్టీ క్యాడర్ కూడా తీవ్ర అసంతృప్తితో ఉంది. నందికొట్కూరు.. కర్నూలు జిల్లాలో ఎస్సీలకు రిజర్వయిన నియోజకవర్గాల్లో ఇదొకటి. ఇక్కడ ప్రజాప్రతినిధులు ఎస్సీలయినా, పెత్తనం మాత్రం ఇతరులదే. అధికార పార్టీ మొదలుకుని అన్ని పార్టీల తీరు అలాగే ఉంది.

సరిగ్గా ఇక్కడకు 2014 ఎన్నికల ముందు ఓ మాజీ పోలీస్ ఉన్నతాధికారి అడుగుపెట్టారు. అంతకుముందు తెలంగాణలో వివిధ ప్రాంతాల్లో పనిచేసి, అసాంఘిక శక్తులతో అంటకాగి భారీగా అక్రమార్జన చేసినట్టు ఆరోపణలు వినిపిస్తున్నాయి. తెలంగాణ లో పేరుమోసిన గ్యాంగ్‌స్టర్‌తో సంబంధాలు పెట్టుకుని భారీగా భూదందాలు, సెటిల్‌మెంట్లు, ఆక్రమణలకు పాల్పడినట్టు తెలుస్తోంది. గతంలో ఇలా కొండాపూర్ ప్రాంతంలో ఆక్రమించిన స్థలంలో అత్యంత విలాస వంతమైన 50 విల్లాలను నిర్మిస్తున్నట్టు తెలుస్తోంది. ఇవి ఒక్కోటి రూ.50 కోట్లకు పైనే ధర పలుకుతున్నట్టు సమాచారం. 

పేదల భూముల్లోనూ పాగా 
నందికొట్కూరు మండలంలోని అల్లూరు, కోనేటమ్మ పల్లె, వల్లూరు, తెలంగాణ రాష్ట్రంలోని ఆలంపూరు, ర్యాలంపాడు, రెడ్డికుంట తదితర గ్రామాల్లో ప్రభుత్వాలు ఎస్సీ, ఎస్టీ, బీసీలకు భూములు ఇచ్చాయి. ఈ భూములపై సదురునేత కన్ను పడింది. తన వందిమాగధులతో రైతులను బెదిరించి తక్కువ రేటుకు కొనుగోలు చేసినట్టు ఆరోపణలున్నాయి. నిబంధనల ప్రకారం ప్రభుత్వం ఇచ్చిన భూముల క్రయ విక్రయాలు చెల్లవు. అయినా ఈయనకు మాత్రం ఆ నిబంధనలు బలాదూర్.

ఇసుక దందాతో కోట్లు 
నందికొట్కూరు నియోజకవర్గానికి సమీపంలో కృష్ణానది ప్రవహిస్తోంది. నదిలో భారీగా ఇసుక మేటలు ఉంటాయి. ఆ నేత కన్ను ఈ ఇసుకపై పడింది. ఛోటా నేతలను ఏర్పాటు చేసుకుని భారీగా ఇసుక దందా సాగించారు. కొన్ని రోజుల క్రితం శాతనకోట, నెహ్రూనగర్ ప్రాంతాల్లో ఇసుక తవ్వకాలు అధికారుల అనుమతి ఇచ్చినట్టు తెలుస్తోంది. దీన్ని అదనుగా తీసుకుని ప్రకాశం జిల్లా వెలిగొండ ప్రాజెక్టులో అండర్‌గ్రౌండ్ గేట్ల నిర్మాణ పనులు చేపడుతున్న ఓ టీడీపీ నేతకు ఇసుక సరఫరా చేసినట్టు ఆరోపణలున్నాయి.

పగలు ట్రాక్టర్ల ద్వారా తరలించి  పెద్దకోన దగ్గర డంప్ చేయడం, అక్కడ నుంచి రాత్రి పూట టిప్పర్ల ద్వారా వెలిగొండ ప్రాజెక్టుకు తరలించి కోట్లాది రూపాయలు గడించినట్టు తెలుస్తోంది. ఈ విషయంపై అప్పట్లో ప్రతిపక్షాలు భారీగా ఆందోళన చేపట్టాయి. కలెక్టర్, ఎస్పీ, డీఐజీ, సీబీఐ, విజిలెన్స్ అధికారులకు కూడా ఫిర్యాదు చేశారు. ప్రస్తుతం ఈ ఇసుక దందాపై విచారణ జరుగతోంది. 

నీరు-చెట్టుతో కాసుల వర్షం
నీరు- చెట్టు పథకం కింద నియోజకవర్గానికి కోట్లాది రూపాయల నిధులు వచ్చాయి.  ఈ నిధులను ఆయా గ్రామాల్లోని అధికార పార్టీ నేతలకు ఇవ్వాలి. కానీ ఈయన మాత్రం తనకు కావల్సిన వారు, బంధువులు, తన సామాజిక వర్గానికి చెందిన ప్రతిపక్ష నేతలకు కూడా ఇస్తున్నట్లు ఆరోపణలున్నాయి. పాములపాడు, కొత్తపల్లి మండలాల్లో ఇలా పనులు కట్టబెట్టినట్టు తెలుస్తోంది. పనులు చేసే కాంట్రాక్టర్లు ఎవరైనా 14% వాటా ముందే సమర్పించినట్టు వినిపిస్తోంది. పాములపాడు మండలానికి చెందిన ఓ ప్రజాప్రతినిధి చేసిన పనులపై కలెక్టర్, ఎస్పీ, విజిలెన్స్ అధికారులకు ఫిర్యాదులు వెళ్లాయి. 

నేత తీరుపై క్యాడర్ అసంతృప్తి
అభివృద్ధి పనులను ఇతర పార్టీల వాళ్లకు కూడా కట్టబెడుతున్నారంటూ ఈయనపై నియోజకవర్గానికి చెందిన కొందరు నేతలు ఇటీవల మంత్రి నారా లోకేష్‌కు ఫిర్యాదు చేసినట్టు సమాచారం. సీఎం వరకు కూడా వెళ్లడంతో ఆయనను ఇటీవలే సీఎం పిలిచి అక్షింతలు వేసినట్లు సమాచారం. పార్టీని భ్రష్టు పట్టించారని, ప్రభుత్వ పథకాలను వైసీపీ వాళ్లకు ఎందుకు ఇచ్చారని ప్రశ్నించినట్లు తెలిసింది. 

రుణాలలో సైతం అధికార పార్టీతో పాటు ప్రతిపక్ష పార్టీకి సగం ఇస్తే అధికార పార్టీ వర్గీయులు ఎర్రమఠం, గుమ్మడాపురం, దుద్యాల, సింగరాజుపల్లె గ్రామాలలో తిరస్కరించినట్టు తెలుస్తోంది. ప్రతి విషయంలో పక్కపార్టీ వారికే ఈయన ఎక్కువ ప్రాధాన్యం ఇవ్వడంపై తీవ్ర అసంతృప్తితో ఉన్నట్టు తెలుస్తోంది. నియోజకవర్గంలో నేత ఇష్టారాజ్యంగా వ్యవహరిస్తున్నా.. పనులన్నీ అవతలివాళ్లకు కూడా పంచుతున్నా పట్టించుకునే నాథులు కరువయ్యారు



సంజు నిర్మాతలకు గ్యాంగ్‌స్టర్ లీగల్ నోటీసులు

Updated By ManamFri, 07/27/2018 - 13:15
sanju team

ముంబై : బాలీవుడ్ హీరో సంజయ్‌దత్ జీవిత చరిత్ర ఆధారంగా తెరకెక్కిన ‘సంజు’చిత్ర నిర్మాతలకు... గ్యాంగ్‌స్టర్ అబు సలేం లీగల్ నోటీసులు పంపాడు. ఆ సినిమాలో తన గురించి అవాస్తవాలు చూపించారంటూ, ఆ సీన్లను తక్షణమే తొలగించాలంటూ అతడు హెచ్చరించాడు. ఈ మేరకు అబూ సలేం తన న్యాయవాది ప్రశాంత్ పాండే ద్వారా నోటీసులు పంపించాడు. రణబీర్ కపూర్ హీరోగా తెరకెక్కిన సంజు చిత్రంలో  అబూ సలేం పరువుకు నష్టం కలిగించేలా ఉన్న ఈ సీన్లను  పదిహేను రోజుల్లోగా సినిమాలో నుంచి తొలగించాలని లేకుంటే పరువునష్టం దావా వేస్తామని లాయర్ హెచ్చరించారు.

అయితే 1993లో ముంబై పేలుళ్ల కేసులో దోషిగా ఉన్న అబూసలేం.. ప్రస్తుతం ఆర్థర్ రోడ్ జైలులో శిక్ష అనుభవిస్తున్న విషయం తెలిసిందే. అయితే సంజు సినిమాలో ముంబై అల్లర్ల సందర్భంగా సంజయ్‌దత్‌కు.. అబూ సలేం తుపాకులు, బుల్లెట్లు సమకూర్చినట్లు చూపించడంపై అభ్యంతరం వ్యక్తం చేస్తూ... తాను ఎన్నడూ సంజయ్‌దత్‌ను కలవలేదని స్పష్టం చేశాడు. ఈ మేరకు రాజు హిరాణీ, విదు వినోద్ చోప్రా సహా పలువురుకు నోటీసులు పంపించాడు.

కాగా బాలీవుడ్ దర్శకుడు రాజ్‌కుమార్ హిరాణీ దర్శకత్వం వహించిన ‘సంజు’... విమర్శలతో పాటు ప్రశంసలు సొంతం చేసుకున్న విషయం తెలిసిందే. అయితే ఆ సినిమాలో చాలా విషయాలను ప్రస్తావించలేదనే విమర్శలు వచ్చాయి. 



జైల్లో గ్యాంగ్‌స్టర్ బజరంగీ హత్య

Updated By ManamMon, 07/09/2018 - 21:27
  • తుపాకీతో కాల్చిచంపిన మరో ఖైదీ.. ఉత్తరప్రదేశ్ జిల్లా జైలులో ఘటన 

  • సీరియస్‌గా తీసుకున్న యోగీ సర్కార్.. ఘటనపై న్యాయ విచారణకు ఆదేశం

imageబాఘ్‌పట్(యూపీ): ఉత్తరప్రదేశ్‌లో పేరుమోసిన గ్యాంగ్‌స్టర్ ప్రేమ్ ప్రకాశ్ సింగ్ అలియాస్ మున్నా బజరంగీ జైల్లోనే హత్యకు గురయ్యాడు. ఓ ప్రజాప్రతినిధి హత్య సహా పలు కేసుల్లో ముద్దాయిగా ఉన్న బజరంగీని ప్రత్యర్థి ముఠాకు చెందిన మరో ఖైదీ తుపాకీతో కాల్చి చంపేశాడు. బాఘ్‌పట్ జిల్లా జైలులో ఈ ఘటన చోటుచేసుకుంది. అయితే, ఈ ఘటనపై పలు సందేహాలు వ్యక్తమవుతున్నాయి.

జైలులో ఉన్న విచారణ ఖైదీల చేతుల్లోకి ఆయుధాలు ఎలా చేరాయనేది ప్రశ్నార్థకంగా మారింది. ఇదే విషయాన్ని సీరియస్‌గా పరిగణించిన సీఎం యోగి ఆదిత్యనాథ్ నలుగురు జైలు అధికారులను సస్పెండ్ చేయడంతో పాటు ఘటనపై విచారణకు ఆదేశించారు. బీజేపీ ఎమ్మెల్యే లోకేష్ దీక్షిత్‌ను డబ్బు కోసం బెదిరించాడనే కేసులో బజ్రంగీపై బాఘ్‌పట్ కోర్టులో విచారణ జరుగుతోంది. ఈ విచారణకు హాజరుపరిచేందుకు ఝాన్సీ జైలులో శిక్ష అనుభవిస్తున్న బజ్రంగీని ఆదివారం నాడు పోలీసులు బాఘ్‌పట్ జిల్లా జైలుకు తీసుకువచ్చారు. ఈ క్రమంలో సోమవారం ఉదయం అదే జైలులో ఉన్న బజరంగీ ప్రత్యర్థి, మరో గ్యాంగ్‌స్టర్ సునీల్ రాతి తుపాకీతో కాల్పులు జరిపాడు. ఈ కాల్పుల్లో బజరంగీ అక్కడికక్కడే ప్రాణాలు కోల్పోయాడని పోలీసులు వెల్లడించారు.

పోలీసుల హిట్ లిస్ట్‌లో..
గ్యాంగ్‌స్టర్ బజ్రంగీ ప్రాణాలకు ముప్పు ఉందని ఆయన భార్య సీమ గతంలోనే ఆందోళన వ్యక్తం చేశారు. బజరంగీ పోలీసులు ఎన్‌కౌంటర్ చేసే ప్రయత్నాలు చేస్తున్నారని సీమ ఆరోపించారు. ఈ క్రమంలో సోమవారం బజ్రంగీ హత్యకు గురవడం.. అదీ జిల్లా జైలులోని ఓ ఖైదీ తుపాకీతో కాల్చిచంపడంపై పలు సందేహాలు వ్యక్తమవుతున్నాయి. జైలులోపలికి తుపాకీ ఎలా చేరిందనే ప్రశ్నలు తలెత్తుతున్నాయి. అయితే, సోమవారం ఉదయం బజరంగీని న్యాయస్థానానికి తీసుకెళ్లే ప్రయత్నాలలో ఉండగా.. సునీల్ రాతి అనే ఖైదీ కాల్పులు జరిపి బజరంగీని హత్య చేశాడని జైలు అధికారులు వివరిస్తున్నారు.



యూపీ జైల్లో గ్యాంగ్‌స్టర్ హతం

Updated By ManamMon, 07/09/2018 - 10:51
Gangster Munna Bajrangi

లక్నో : ఉత్తరప్రదేశ్‌లో కరుడుగట్టిన గ్యాంగ్‌స్టర్  మున్నా భజరంగి హతమయ్యాడు. మున్నా భజరంగిపై జైలులోని సహచర ఖైదీ సునీల్ రాథి కాల్పులు జరపడంతో అక్కడిక్కడే ప్రాణాలు విడిచాడు.  మున్నా భజరంగిని సోమవారం ఉదయం భాజపా ఎమ్మెల్యే కృష్ణానంద్ రాయ్ హత్య కేసులో  కోర్టులో హాజరు పరచాల్సి ఉండగా, భాగ్‌పట్‌ జైల్లో హత్యకు గురయ్యాడు.

ఉదయం 6.30 గంటల సమయంలో కాల్పుల ఘటన చోటుచేసుకుంది. కాగా మున్నాను నిన్నే ఝాన్సీలోని జైలు నుంచి భాగ్‌పట్‌ జైలుకు తరలించారు. పోలీసులు ఘటనా స్థలానికి చేరుకుని మృతదేహాన్ని స్వాధీనం చేసుకున్నారు. కేసు నమోదు చేసి విచారణ చేపట్టారు.

మరోవైపు ఈ ఘటనపై ముఖ్యమంత్రి యోగి ఆదిత్యానాథ్ విచారణకు ఆదేశించారు. జైలు ఆవరణలో ఇటువంటి సంఘటన చోటుచేసుకోవటం తీవ్రమైన చర్యగా భావిస్తున్నామని, బాధ్యులపై కఠిన చర్యలు తీసుకుంటామని ఆయన స్పష్టం చేశారు.

కాగా తన భర్త హత్యకు కుట్ర జరుగుతుందంటూ, అతడికి ప్రాణహాని ఉందంటూ మున్నా భజరంగి భార్య  సీమా సింగ్‌  ఆరోపించిన విషయం తెలిసిందే. తన భర్తను నకిలీ ఎన్‌కౌంటర్ చేసేందుకు కుట్ర జరుగుతుందని, ఈ విషయాన్ని సీఎం యోగి దృష్టికి తీసుకువెళ్లనున్నట్లు ఆమె గత నెల్లో పేర్కొన్నారు.  మున్నా భజరంగిపై హత్య కేసుతో పాటు పలు దోపిడీ కేసులలో నిందితుడిగా ఉన్నాడు. 



సల్మాన్‌ను చంపేందుకు గ్యాంగ్‌స్టర్ కుట్ర

Updated By ManamSun, 06/10/2018 - 13:20

sampath బాలీవుడ్ కండల వీరుడు సల్మాన్ ఖాన్‌ను కరుడుగట్టిన గ్యాంగ్‌స్టర్ సంపత్ నెహ్రా కుట్ర చేస్తున్నట్లు పోలీసులు వెల్లడించారు. హరియాణా, రాజస్థాన్, పంజాబ్ రాష్ట్రాలకు మోస్ట్ వాంటెడ్ గ్యాంగ్‌స్టర్‌గా ఉన్న సంపత్ నెహ్రాను ఇటీవల హైదరాబాద్ పోలీసులు అరెస్ట్ చేశారు. విచారణలో అతడి నుంచి కీలక విషయాలు తెలుసుకుంటున్నారు. అందులో అనేక హత్యలు చేసిన నెహ్రా.. బాలీవుడ్ నటుడు సల్మాన్ హత్యకు కుట్ర పన్నాడని, ఇందుకోసం అతడి ఇంటి వద్ద రెక్కీ కూడా నిర్వహించినట్లు వారు తెలిపారు.

అంతేకాదు హత్య చేసిన తర్వాత దేశం విడిచి వెళ్లేందుకు కూడా నెహ్రా ప్రణాళిక వేసినట్లు వారు పేర్కొన్నారు. అయితే కృష్ణజింక కేసులో సల్మాన్‌ను హత్య చేస్తామని బిష్ణోయ్ వర్గం హెచ్చరించింది. ఇక సంపత్ నెహ్రా కూడా అదే వర్గానికి చెందిన వాడు కావడంతోనే సల్మాన్‌ను హత్య చేసినందుకు కుట్ర చేస్తున్నట్లు పోలీసులు తెలిపారు.



‘గ్యాంగ్‌స్టర్’ కేడీగా జగ్గుభాయ్

Updated By ManamThu, 05/17/2018 - 12:59
gangster

సామాజిక మాధ్యమాలు పెరుగుతున్న కొద్దీ నటీనటులు కూడా తమ స్టైల్‌ను మార్చేస్తున్నారు. ఒకప్పుడు సినిమాలకు మాత్రమే పరిమితమైన నటీనటులు ఇప్పుడు బుల్లితెరపైనా, వెబ్‌ సిరీస్‌లో తమ సత్తాను చాటుతున్నారు. ఈ నేపథ్యంలో తాజాగా జగ్గుభాయ్ కూడా వెబ్‌సిరీస్‌లో కనిపించేందుకు సిద్ధమయ్యారు. ‘గ్యాంగ్‌స్టర్’ పేరుతో తెరకెక్కుతున్న ఈ వెబ్‌సిరీస్‌లో జగపతిబాబు గ్యాంగ్‌స్టర్ కేడీగా కనిపించనున్నారు.

అలాగే నవదీప్ క్రేజీస్టార్ విశ్వగా, శ్వేతాబసు ప్రసాద్ సూపర్‌స్టార్ ఐశ్వర్యగా, గుంటూరు టాకీస్ ఫేం సిద్దు మరో పాత్రలో కనిపించనున్నారు. అజయ్ భుయాన్ దర్శకత్వం వహిస్తున్న ఈ వెబ్ సిరీస్ టీజర్ శుక్రవారం విడుదల కానుంది. అమెజాన్ ప్రైమ్ వీడియోలో ఈ వెబ్ సిరీస్ విడుదల కానుంది.

 



పుష్క‌ర‌కాలం.. కంగనా కానుక‌

Updated By ManamWed, 11/01/2017 - 12:44

manikarnikaగ్లామ‌ర్‌, పెర్‌ఫార్మెన్స్‌.. ఇలా ఈ రెండు విష‌యాల్లోనూ త‌నేంటో నిరూపించుకుంది కంగ‌నా ర‌నౌత్‌. తొలి చిత్రం 'గ్యాంగ్ స్ట‌ర్' నుంచి గ‌త చిత్రం 'సిమ్ర‌న్' వ‌ర‌కు ఫ‌లితాల‌తో సంబంధం లేకుండా ఈ ముద్దుగుమ్మ న‌ట‌న‌కి బాలీవుడ్ ప్రేక్ష‌క లోకం ఫిదా అయ్యింది. తెలుగులోనూ ఎనిమిదేళ్ల క్రితం 'ఏక్‌నిరంజ‌న్‌'తో కంగ‌నా సంద‌డి చేసిన సంగ‌తి గుర్తుండే ఉంటుంది. కాగా, కంగ‌నా ప్ర‌స్తుతం ఓ చారిత్రాత్మ‌క చిత్రం చేస్తోంది. అదే 'మ‌ణిక‌ర్ణిక‌'. ఝాన్సీ ల‌క్ష్మీభాయ్ జీవితం ఆధారంగా రూపొందుతున్న ఈ చిత్రాన్ని తెలుగు చిత్రాల ద‌ర్శ‌కుడు క్రిష్  తెర‌కెక్కిస్తున్నారు. సంక్రాంతికి వ‌చ్చిన చారిత్రాత్మ‌క చిత్రం 'గౌత‌మిపుత్ర శాత‌క‌ర్ణి' త‌రువాత ఆయ‌న వెంట‌నే రూపొందిస్తున్న సినిమా కూడా అదే నేప‌థ్యంతో తెర‌కెక్కుతుండ‌డం విశేషం.

ఇదిలా ఉంటే.. ఈ సినిమాకి సంబంధించి కంగ‌నా ఎలా ఉండ‌బోతుందో అన్న ఆస‌క్తి ప్రేక్ష‌కుల్లో ఉంది. దానికి త‌గ్గ‌ట్టే.. కొద్ది రోజుల క్రితం జైపూర్  చిత్రీక‌రించిన కొన్ని దృశ్యాల తాలుకు ఛాయాచిత్రాలు లీక్ అయి సోష‌ల్ మీడియాలో వైర‌ల్ అయ్యాయి. ఇప్పుడేమో.. ఏకంగా సినిమాలోని స్టిల్సే బ‌య‌ట‌కు వ‌చ్చాయి. అయితే.. అవి లీక్ అయ్యాయా?  చిత్ర బృంద‌మే విడుద‌ల చేసిందా? అనేది తెలియ‌దు. ఆ స్టిల్స్‌ చూసిన‌వాళ్లంతా.. నిజంగానే ఝాన్సీ ల‌క్ష్మీ భాయ్ ఇలాగే ఉంటుందేమో అన్న‌ట్లుగా కంగ‌నా ఉందంటున్నారు. కాగా, ఈ సినిమాని వచ్చే ఏడాది ఏప్రిల్ 27న విడుద‌ల చేయ‌నున్నారు. విశేష‌మేమిటంటే.. కంగ‌నా తొలి చిత్రం 'గ్యాంగ్ స్ట‌ర్' కూడా స‌రిగ్గా ప‌న్నెండేళ్ల క్రితం ఆ తేదికి ఒక రోజు త‌రువాత అంటే ఏప్రిల్ 28న రిలీజైంది. సో..న‌ట‌ప్ర‌స్థానం పుష్క‌ర‌కాలం పూర్తిచేసుకోనున్న త‌రుణంలో కంగ‌నా.. త‌న అభిమానుల‌కు 'మ‌ణిక‌ర్ణిక' రూపంలో కానుక ఇవ్వ‌నుంద‌న్న‌మాట‌.

 





Related News