supreme-court

సీవీసీ నివేదిక అసమగ్రం

Updated By ManamFri, 11/16/2018 - 22:10
  • కొన్ని ఆరోపణలపై మాత్రం సమగ్రం

  • మరికొన్నింటిపై ఇంకా దర్యాప్తు చేయాలి

  • మాజీచీఫ్ అలోక్‌వర్మపై సీవీసీ దర్యాప్తు

  • ఆస్థానాకు నివేదిక ఇవ్వబోమన్న సీజే

  • అలోక్ వర్మకు సీల్డ్ కవర్‌లో కాపీ

  • సోమవారంలోగా సమాధానం ఇవ్వాలి

supreme-courtన్యూఢిల్లీ: సీబీఐ మాజీ చీఫ్ అలోక్‌వర్మ మీద కేంద్ర విజిలెన్స్ కమిషన్ (సీవీసీ) ఇచ్చిన నివేదిక కొన్ని ఆరోపణల విషయంలో అసమగ్రంగా ఉందని సుప్రీంకోర్టు ప్రధాన న్యాయమూర్తి జస్టిస్ రంజన్ గొగోయ్ అన్నారు. కొన్ని ఆరోపణల విషయంలో మాత్రం సమగ్రంగానే ఉందని తెలిపారు. మరికొన్ని ఆరోపణలపై ఇంకా దర్యాప్తు చేయాలని సూచించారు. కాగా, సీవీసీ నివేదిక కాపీ తనకు కావాలంటూ స్పెషల్ డైరెక్టర్ రాకేశ్ ఆస్థానా పెట్టుకున్న విజ్ఞప్తిని సుప్రీంకోర్టు తిరస్కరించింది. పరస్పరం అవినీతి ఆరోపణల బురద జల్లుకున్న ఆస్థానా.. అలోక్‌వర్మ ఇద్దరినీ సెలవుపై పంపిన విషయం తెలిసిందే. ఆస్థానా తరఫున సుప్రీంకోర్టులో మాజీ అటార్నీ జనరల్ ముకుల్ రోహత్గి వాదించారు. ఈ మొత్తం అంశంపై ఫిర్యాదు చేసిందే ఆస్థానా కాబట్టి.. సీవీసీ నివేదికను ఆయనకు ఇవ్వాలని రోహత్గి వాదించారు. కానీ, ధర్మాసనానికి నేతృత్వం వహించిన ప్రధాన న్యాయమూర్తి జస్టిస్ రంజన్ గొగోయ్ మాత్రం అందుకు తిరస్కరించారు. కాపీ ఇచ్చేందుకు అవకాశమే లేదని ఆయన స్పష్టం చేశారు. పోనీ, ఆ నివేదికపై అభిప్రాయం తెలుసుకునే అవకాశమైనా ఉందా అని రోహత్గి అడగ్గా.. అది కూడా లేదని ప్రధాన న్యాయమూర్తి చెప్పారు. అలోక్ వర్మ మీద వచ్చిన అవినీతి ఆరోపణలపై సీఈసీ నివేదికను ఈ వారం మొదట్లో సుప్రీంకోర్టుకు సమర్పించారు. ఈ నివేదిక కాపీని అలోక్ వర్మకు సీల్డ్ కవర్‌లో అందించాలని, ఆయన సోమవారం మధ్యాహ్నం 1గంట లోపు సమాధానం ఇవ్వాలని కోర్టు తెలిపింది. ఆ సమాధానం అందిన తర్వాత అప్పుడు తాము ఒక నిర్ణయం తీసుకుంటామని సీజే చెప్పారు. సమాధానం వీలైనంత త్వరగా పంపుతామని అలోక్‌వర్మ తరఫు న్యాయవాది ఫాలీ ఎస్ నారిమన్ చెప్పారు. తనను బలవంతంగా సెలవుపై పంపుతూ ప్రభుత్వం ఇచ్చిన ఉత్తర్వులను అలోక్ వర్మ సుప్రీంకోర్టులో సవాలుచేసిన విషయం తెలిసిందే. కాంగ్రెస్ నాయకుడు మల్లికార్జున్ ఖర్గే, సీబీఐ డిప్యూటీ ఎస్పీ ఏకే బస్సీ దాఖలు చేసిన పిటిషన్లను కూడా సుప్రీంకోర్టు విచారిస్తోంది. అండమాన్‌కు బదిలీ అయిన బస్సీ కేసును తదుపరి విచారణలో పరిశీలిస్తామని కోర్టు తెలిపింది. కేసు తదుపరి విచారణను మంగళవారానికి వాయిదా వేశారు. 



టపాసులు కాల్చారని.. అరెస్టు!

Updated By ManamFri, 11/09/2018 - 23:39
  • ఢిల్లీలోనే 562 కేసులు నమోదు.. ఇప్పటికి 310 మంది అరెస్టు

  • దేశవ్యాప్తంగా భారీగా కేసులు

  • సుప్రీం ఆదేశాల ఉల్లంఘనలు

  • పలు రాష్ట్రాల్లో అరెస్టుల పర్వం

india-supreme-courtన్యూఢిల్లీ: దేశరాజధాని ఢిల్లీ సహా దేశవ్యాప్తంగా పలు ప్రధాన నగరాల్లో సుప్రీంకోర్టు ఆదేశాలను ఉల్లంఘించి ఇష్టారాజ్యంగా టపాసులు కాల్చినందుకు పలువురిపై పోలీసు కేసులు నమోదయ్యాయి. దీపావళికి ముందు, తర్వాత కాలుష్యం స్థాయిని నమోదుచేసిన అధికారులు.. అది ఎక్కువగా ఉన్న ప్రాంతాల్లో ఎవరెవరు ఎక్కువ సేపు టపాసులు కాల్చారో గుర్తించి వారిపై 562 కేసులు నమోదుచేశారు. ఇప్పటివరకు 310 మందిని అరెస్టు చేశారు. ఆదేశాలు పాటించనందుకు ఐపీసీ సెక్షన్ 188 కింద వీరు అరెస్టయ్యారు. ఢిల్లీ, చుట్టుపక్కల ప్రాంతాల్లో రాత్రి 8 నుంచి 10 గంటల వరకు మాత్రమే టపాసులు కాల్చాలని, అవి కూడా ఎక్కువ శబ్దం రానివి, అధిక కాలుష్యం వెదజల్లని ‘హరిత టపాసులు’ మాత్రమే కాల్చాలని సుప్రీంకోర్టు ఆదేశించిన విషయం తెలిసిందే. కానీ ఢిల్లీ సహా దేశంలోని పలు నగరాల్లో అక్రమంగా అన్నిరకాల టపాసులను అమ్మడంతో కాలుష్యం స్థాయి అత్యంత దారుణమైన స్థితికి దిగజారింది. నిషేధించిన టపాసులు అమ్మినా, రెండు గంటలకు మించి కాల్చినా ఆయా ప్రాంతాల పరిధిలోని స్టేషన్ హౌస్ ఆఫీసర్లను బాధ్యులుగా చేస్తామని సుప్రీంకోర్టు చెప్పింది. కానీ, అలాంటి టపాసులు ఢిల్లీలో చాలాచోట్ల అమ్మారు. అరెస్టు చేసిన వారికి తర్వాత బెయిల్ మంజూరుచేసి విడిచిపెట్టామని, అయితే సుప్రీంకోర్టు ఉత్తర్వులను పాటించనందుకు 24 మంది పిల్లలపై బాలనేరస్తుల చట్టం కింత తగిన న్యాయపరమైన చర్యలు తీసుకుంటున్నామని ఢిల్లీ పోలీసుల అధికార ప్రతినిధి మాధుర్ వర్మ చెప్పారు. గురువారం మధ్యాహ్నం వరకు ఢిల్లీ వాయు నాణ్యత ‘అత్యంత దారుణం’గానే ఉంది. తర్వాత ఉష్ణోగ్రత పెరగడంతో కలుషితాలు కాస్త తగ్గాయి. ఢిల్లీలో కొన్ని ప్రాంతాల్లో అయితే పర్టిక్యులేట్ మేటర్ ఏకంగా క్యూబిక్ మీటరుకు 1800 మైక్రోగ్రాములు నమోదైంది. నిజానికి ప్రమాణాల ప్రకారం అది 60 మైక్రోగ్రాములు మాత్రమే ఉండాలి. గురువారం నుంచి ఆదివారం వరకు ట్రక్కులు నగరంలోకి రాకూడదని ఢిల్లీ ప్రభుత్వం నిషేధం విధించింది. అయితే పాలు, కూరగాయలు, ఇతర సరుకుల్లాంటి నిత్యావసర సరుకులు తెచ్చేవాటిని దీన్నుంచి మినహాయించారు. ఢిల్లీకి ఇరుగుపొరుగునున్న గౌతమబుద్ధ నగర్‌లో 58 కేసులు, చండీగఢ్‌లో 34 కేసులు పెట్టారు. నవంబరు ఐదో తేదీ నుంచే అరెస్టులు మొదలుపెట్టినట్లు పోలీసులు తెలిపారు. రోహతక్‌లో కోర్టు ఆదేశాలను ఉల్లంఘించి టపాసులు అమ్ముతున్న నలుగురు దుకాణదారులను అరెస్టు చేశారు. పంజాబ్, హరియాణా రాష్ట్రాల్లోని పలు ప్రాంతాల్లో గురువారం ఉదయం నాటి ఎయిర్ క్వాలిటీ ఇండెక్స్ (ఏక్యూఐ) దారుణం, అత్యంత దారుణంగానే ఉంది. అసోంలో 150 మందిని అరెస్టు చేయగా, కోల్‌కతాలో 306 మందిని అరెస్టు చేశారు. 



అత్యవసర విచారణకు నో

Updated By ManamTue, 10/09/2018 - 22:06
  • శబరిమల కేసుపై సుప్రీం నిర్ణయం

  • కోర్టులో దాఖలైన రివ్యూ పిటిషన్లు

  • దసరా సెలవుల తర్వాతే విచారణ 

  • 16 నుంచి తెరుచుకోనున్న ఆలయం

  • తీర్పుపై స్టే ఇవ్వాలని కోరిన లాయర్

  • స్పందించని సుప్రీంకోర్టు ధర్మాసనం

supreme-courtన్యూఢిల్లీ: శబరిమల ఆలయంలోకి అన్నివయసుల మహిళలను అనుమతించాలన్న తీర్పుపై దాఖలైన రివ్యూ పిటిషన్లను అత్యవసరంగా విచారించేందుకు సుప్రీంకోర్టు నిరాకరించింది. జాతీయ అయ్యప్ప భక్తుల సంఘం అధ్యక్షురాలు శైలజా విజయన్ తమ న్యాయవాది మాథ్యూస్ జె నెడుంపరా ద్వారా దాఖలుచేసిన పిటిషన్‌ను అత్యవసరంగా విచారించేది లేదని, అది సాధారణ పద్ధతిలోనే లిస్ట్ అవుతుందని ప్రధాన న్యాయమూర్తి జస్టిస్ రంజన్ గొగోయ్, జస్టిస్ ఎస్‌కే కౌల్, జస్టిస్ కేఎం జోసెఫ్‌లతో కూడిన ధర్మాసనం తెలిపింది. అలాగే రివ్యూ పిటిషన్‌ను కూడా బహిరంగ కోర్టులో కాకుండా చాంబర్‌లో విచారిస్తామని చెప్పింది. ఆలయాన్ని ఈనెల 16 నుంచి భక్తుల కోసం తెరుస్తున్నందున పాత ఉత్తర్వులపై స్టే విధించాలని న్యాయవాది కోరారు. అన్ని వయసుల మహిళలకూ అయ్యప్ప ఆలయ ప్రవేశార్హత కల్పిస్తూ ఐదుగురు న్యాయమూర్తులతో కూడిన రాజ్యాంగ ధర్మాసనం ఇచ్చిన తీర్పు ఏమాత్రం ఆమోదయోగ్యం కాదని, అది అహేతుకమని ఆయన వాదించారు. అయితే, దసరా సెలవుల తర్వాత మాత్రమే రివ్యూ పిటిషన్‌ను విచారణకు తీసుకుంటామని కోర్టు చెప్పింది. అయ్యప్ప భక్తుల సంఘంతో పాటు నాయర్ సర్వీస్ సొసైటీ, పాండలం రాజ కుటుంబం, అయప్ప ఆలయ ప్రధాన పూజారి (తంత్రి) కూడా సెప్టెంబరు 28 నాటి తీర్పును సమీక్షించాలంటూ పిటిషన్లు దాఖలు చేశారు.  అయ్యప్ప నైష్టిక (స్వచ్ఛంద) బ్రహ్మచారి అయినందున పదేళ్లలోపు, 50 ఏళ్లు దాటిన మహిళలకు మాత్రమే ఆయనను ఆరాధించేందుకు అవకాశం ఉంటుందని, అందువల్ల మహిళలను పూర్తిగా ఆలయ ప్రవేశం నుంచి నిషేధిస్తున్నట్లు భావించకూడదని నాయర్ సర్వీస్ సొసైటీ వాదించింది. దర్శనం 40 ఏళ్ల పాటు ఆలస్యమైనంత మాత్రాన దాన్ని నిరాకరించినట్లు కాదని, తీర్పును చూస్తుంటేనే అందులో చట్టపరమైన లోపం ఉన్నట్లు స్పష్టం అవుతోందని తెలిపింది. కాగా మతవిశ్వాసాలను శాస్త్రీయ, హేతుబద్ధ కారణాలతో నిర్ణయించకూడదని, సుప్రీంకోర్టు ఇచ్చిన తీర్పును కొంతమంది హిపోక్రాట్లు మాత్రమే స్వాగతించారని.. అది కూడా కేవలం పత్రికలలో పతాక శీర్షికల కోసవేునని అయ్యప్ప భక్తుల సంఘం న్యాయవాది వాదించారు. 



బీజేపీ ఢిల్లీ చీఫ్‌ను మందలించిన సుప్రీంకోర్టు

Updated By ManamTue, 09/25/2018 - 23:55

supreme-courtన్యూఢిల్లీ:  ఎంపీ అయినంతమాత్రాన చట్టాన్ని మీరెలా చేతుల్లోకి తీసుకుంటారంటూ ఢిల్లీ బీజేపీ అధ్యక్షుడు మనోజ్ తివారిని సుప్రీంకోర్టు మందలించింది. రాజధానిలోని వేలాది అక్రమ కట్టడాలను కమిటీ సీల్ చేయలేదంటూ ఆరోపించిన వ్యాఖ్యలపై వారం రోజుల్లో అఫిడవిట్ దాఖలు చేయాలని ధర్మానసం ఆదేశించింది. ఈ అంశంపై కోర్టు ధిక్కార అభియోగాలు ఎదుర్కొంటున్న తివారి మంగళవారం జరిగిన విచారణకు హాజరయ్యారు.  అక్రమ కట్టడాల జాబితాను తమకు ఇవ్వాలన్న ధర్మాసనం ఆయనకే సీలింగ్ ఆఫీసర్ బాధ్యతలు కట్టబె డతామంది.  దీనిపై తదుపరి విచారణను వచ్చే నెల 3వ తేదీకి వాయిదా వేసింది.  అత్యున్నత ధ ర్మాసనం చేసిన ఆదేశాలను స్వయంగా ఓ బాధ్యతగల ఎంపీ ఉల్లంఘించడం దురదృష్టమని కోర్టు వ్యాఖ్యానించింది. దేశరాజధానిలో అక్రమ కట్టడాలను మూసివేయాల్సిందిగా ఆదేశించిన కోర్టు, ఈ వ్యవహారంలో జోక్యం చేసుకున్న వారిపై కఠిన చర్యలు తీసుకోవాలని ఆదేశించింది. దీంతో మనోజ్ తివారిపై కఠిన చర్యలు తీసుకోవాల్సిందిగా పర్యవేక్షణా కమిటి పేర్కొంది.



మెరిట్ సాధించినా రిజర్వ్‌డ్ సీటే

Updated By ManamThu, 08/23/2018 - 23:28
  • జీవో 550పై స్టేతో నష్టపోతున్న బీసీ, ఎస్సీ, ఎస్టీలు

  • మెడిసిన్‌కు దూరమవుతున్న 700 మంది విద్యార్థులు

supreme-courtహైదరాబాద్: ఏండ్లుగా విద్య, ఉద్యోగ రిజర్వేషన్లు ఉన్నప్పటికీ బీసీ, ఎస్సీ, ఎస్టీలకు వాటి ఫలాలు అందడంలేదు. కర్ణుడి చావుకు సవాలక్ష కారణాలన్నట్లు ఇందుకు ఎన్నో కారణాలున్నాయి. ఓపెన్ కేటగిరీ మార్కులు సాధించిన బీసీ, ఎస్సీ, ఎస్టీలకు రిజర్వేషన్ కేటగిరీలో సీట్లు కేటాయించడం ఓ ముఖ్య కారణం. ఇప్పుడు ఈ అంశం జీవో నంబరు 550 రూపంలో ఇరు తెలుగు రాష్ట్రాల్లో చర్చనీయమవుతోంది. ఈ జీవోను ఉమ్మడి రాష్ట్ర ప్రభుత్వం 2001లో జారీ చేసింది. 1996లో రితేష్ షా కేసులో ఇచ్చిన తీర్పును అనుసరించి  మెడికల్, ఇంజనీరింగ్ తదితర వృత్తి విద్యా కోర్సుల్లో చట్టబద్ధమైన రిజర్వేషన్లు సక్రమంగా అమలు జరపాలన్న లక్ష్యంతో దీన్ని అప్పటి ప్రభుత్వం తీసుకొచ్చింది. 17 ఏండ్లుగా ఈ జీవో ఆధారంగానే మెడికల్ తదితర వృత్తివిద్యా కోర్సుల అడ్మిషన్లు జరుగుతున్నాయి.

హైకోర్టులో సవాల్
ఈ జీవో ప్రకారం అడ్మిషన్లు చేపట్టడంపై 2017లో ఉమ్మడి హైకోర్టులో ఓ పిటిషన్ దాఖలయింది. విచారణల అనంతరం జీవోపై స్టే విధిస్తూ ద్విసభ్య ధర్మాసనం తీర్పునిచ్చింది. ఈ మేరకు 2017, సెప్టెంబర్ 18న కౌంటర్ దాఖలు చేయాలని ఇరు తెలుగు రాష్ట్రాల ప్రభుత్వాలను బెంచ్ ఆదేశించింది. కానీ, ఈ విషయంలో రెండు రాష్ట్రాల ప్రభుత్వాలూ సరైన రీతిలో స్పందించలేదు. స్టే ఎత్తి వేయించడానికి ఎట్లాంటి ప్రయత్నాలూ చేయలేదన్న ఆరోపణలున్నాయి. ఈ జీవోపై స్టే ఉండడంతో మెరిట్ ఆధారంగా ఓపెన్ కోటాలో సీట్లు పొందగలిగే ఎస్సీ, ఎస్టీ, బీసీ, మైనారిటీ విద్యార్థులు ఆ అవకాశాన్ని కోల్పోతున్నారు. మెరిట్, ఓపెన్ కేటగిరి మార్కులు సాధించినప్పటికీ రిజర్వేషన్ కేటగిరీలోనే సీట్లు కేటాయిస్తుండడంతో ఆయా వర్గాల విద్యార్థులు తీవ్రంగా నష్టపోతున్నారు. ఇది రిజర్వేషన్ల మౌలిక లక్ష్యాన్ని దెబ్బ తీసే విధంగా ఉన్నదని, ఈ విషయమై చర్యలు చేపట్టాలని పలుమార్లు విద్యార్థి సంఘాల నేతలు తెలంగాణ, ఏపీ ప్రభుత్వాల ముఖ్యులను, ఉన్నతాధికారులను కలిసి విన్నవించినా ప్రయోజనం లేకుండాపోయింది.

ఓసీలకు 51.. ఇతరులకు 49..
మెరిట్ మార్కులు సాధించిన రిజర్వుడ్ అభ్యర్థులకు ఓపెన్ కేటగిరీలో సీటివ్వకుండా రిజర్వేషన్ కేటగిరీలో ఇస్తున్నారు. రిజర్వుడ్ సీట్లు మినహా మిగతావన్నీ ఓసీ అభ్యర్థులకే దక్కడం గమనార్హం. అంటే.. బీసీ, ఎస్సీ, ఎస్టీ, మైనారిటీలకు కేటాయించిన 49 శాతం సీట్లు పోనూ, మిగతా 51 శాతం సీట్లు ఓసీ అభ్యర్థులకు మాత్రమే దక్కుతున్నాయి. ప్రస్తుతం జరుగుతున్న మెడికల్(నెట్) సీట్ల కేటాయింపులో జరుతున్నది ఇదే. ఫలితంగా ఉభయ రాష్ట్రాల్లో సుమారు ఏడొందల మంది రిజర్వుడ్ కులాల విద్యార్థులు మెడిసిన్ చదివే అవకాశాన్ని కోల్పోతున్నారు.

సామాజిక న్యాయానికి తూట్లు
తక్కువ మందికి ఎక్కువ శాతం సీట్లు కేటాయించడం సామాజిక న్యాయానికి విరుద్ధం. బడుగు బలహీనవర్గాల కోసం ఎన్నో పథకాలు చేపడుతున్న తెలంగాణ ప్రభుత్వం సామాజిక న్యాయానికి వ్యతిరేకంగా వ్యవహరిస్తోంది. హైకోర్టులో రాష్ట్ర ప్రభుత్వ పేలవమైన పాత్ర వల్ల బీసీ, ఎస్సీ, ఎస్టీ, మైనారిటీ విద్యార్థులకు భారీ నష్టం వాటిల్లుతోంది. ఇప్పటికైనా తెలంగాణ ప్రభుత్వం సామాజిక న్యాయాన్ని పరిరక్షించే విధంగా సుప్రీంకోర్టులో జీవో నంబరు 550పై జరుగుతున్న విచారణలో వాదనలు వినిపించాలి. స్టే ఎత్తివేయించి సామాజిక న్యాయాన్ని కాపాడవల్సిందిగా ముఖ్యమంత్రి కేసీఆర్‌కు విజ్ఞప్తి చేస్తున్నం.
- తమ్మినేని వీరభద్రం, రాష్ట్ర కార్యదర్శి, సీపీఎం

జీవో 555...  నేడే విచారణ
జీవో నంబర్ 550పై విచారణను సుప్రీంకోర్టు శుక్రవారానికి వాయిదా వేసింది. రిజర్వ్‌డ్ అభ్యర్థి ఓపెన్ కోటా సీటు వదులుకునే విషయంలో అదే కేటగిరి అభ్యర్థిని ఎలా గుర్తిస్తారో చెప్పాలని ధర్మాస నం పేర్కొంది. మెడికల్ సీట్ల భర్తీకి సంబంధించి జీవో 550లోని పేరా 5 క్లాజ్(2)ని సంబంధిత జీవోపై హైకోర్టు కొట్టివేయడాన్ని, ఇచ్చిన ఉత్త ర్వులను సవాల్ చేస్తూ తెలంగాణ, ఏపీ ప్రభుత్వాలు, ఎన్టీఆర్, కాళోజీ వైద్య విశ్వవిద్యాలయాలు సుప్రీం కోర్టులో పిటిషన్ దాఖలు చేశాయి. జీవో నంబర్ 550 ప్రకారం వృత్తివిద్యా కళాశాలల్లో మెరిట్, రిజర్వుడ్ విద్యార్థులను 50:50 కోటా ప్రకారం చేర్చుకోవచ్చు.దీనిపై విద్యార్థుల నుంచి పెద్ద ఎత్తున వ్యతిరేకత వ్యక్తం అవుతోంది. ప్రతిభ ఆధారంగా జనరల్ కేటగిరిలో సీట్లు పొందిన రిజర్వు కేటగిరి అభ్యర్థులు ఆ సీటును వదులుకుని మరో కాలేజీలో చేరిన పక్షంలో ఆ సీటును ఆ తర్వాత స్థానంలో ఉన్న అభ్యర్థికే కేటాయించాలని హైకోర్టు స్పష్టం చేయడంతో రిజర్వేషన్ ఉన్న విద్యార్థులు నష్టపోతున్నారని పిటిషన్లో వివరించింది.



రాజీవ్ హంతకులను వదలొద్దు

Updated By ManamSat, 08/11/2018 - 04:10
  • తమిళనాడు ప్రతిపాదన సరికాదు.. అలా చేస్తే ప్రమాదకర సంకేతాలు

  • అంతర్జాతీయంగా కూడా ప్రభావం.. సుప్రీంకోర్టుకు తెలియజేసిన కేంద్రం

india-supreme-courtన్యూఢిల్లీ: రాజీవ్ గాంధీ హత్య కేసులో శిక్ష పడిన ఏడుగురిని విడుదల చేయాలన్న తమిళనాడు ప్రభుత్వ ప్రతిపాదనతో తాము ఏకీభవించడం లేదని కేంద్ర ప్రభుత్వం సుప్రీంకోర్టుకు తెలిపింది. ఇలా చేస్తే ప్రజల్లోకి చాలా ప్రమాదకర సంకేతాలు వెళ్తాయని, అలాగే దీనివల్ల అంతర్జాతీయంగా కూడా  ప్రభావం పడుతుందని కేంద్రం తెలిపింది. ఈ మేరకు కేంద్ర హోం మంత్రిత్వశాఖ సమర్పించిన పత్రాన్ని జస్టిస్ రంజన్ గొగోయ్, జస్టిస్ నవీన్ సిన్హా, జస్టిస్ కేఎం జోసెఫ్‌లతో కూడిన ధర్మాసనం స్వీకరించి, కేసును వాయిదా వేసింది. ఈ కేసులో ఏడుగురు దోషులను విడుదల చేయడానికి తాము సుముఖంగానే ఉన్నామంటూ తమిళనాడు ప్రభుత్వం 2016లో పంపిన లేఖపై మూడు నెలల్లో నిర్ణయం తీసుకోవాలని సుప్రీం కోర్టు జనవరి 23న కేంద్రానికి తెలిపింది. తాము సుముఖంగానే ఉన్నా, 2015 నాటి సుప్రీంకోర్టు ఆదేశాల ప్రకారం కేంద్ర ప్రభుత్వ అభిప్రాయం కూడా తీసుకోవాలని తమిళనాడు సర్కారు తెలిపింది. దాంతో సుప్రీ్ంట ఆదేశాల మేరకు కేంద్ర హోంశాఖ జాయింట్ సెక్రటరీ వీబీ దూబే సమాధానం పంపారు. ఏడుగురు దోషులను విడిచిపెట్టద్దని కోరారు. కేసు విచారణ సమయంలో నిందితులకు మరణశిక్ష విధిం చేందుకు తగిన కారణాలను తాము దిగువ కోర్టుకు తెలిపామని, సుప్రీం కోర్టులో కూడా ఇలాంటి హత్య దేశంలోనే దారుణాతి దారుణమని చెప్పామని ఆయన తన లేఖలో పేర్కొన్నారు. దేశ మాజీ ప్రధానమంత్రిని చంపి న నలుగురు విదేశీయులను విడుదల చేయడం సరికాదని, అలా చేస్తే భవిష్యత్తులో ఇలాంటి మరింతమంది నేరస్తులు కూడా ఇదే తరహాలో మినహాయింపులు కోరుతారని అన్నారు. 

రాజీవ్ గాంధీని 1991 మే 21 రాత్రి తమిళనాడులోని శ్రీ పెరుంబుదూర్‌లో థాను అనే మహిళా మానవబాంబుతో చంపించారు. ఈ ఘటనలో థానుతో పాటు మరో 14 మంది కూడా మరణించారు. ఒక ఉన్నతస్థాయి అంతర్జాతీయ నాయకుడిని చంపేందుకు ఇలా ఆత్మాహుతి బాంబర్లను వాడటం అదే మొదటిసారి. ఒక మాజీ ప్రధానిని అత్యంత దారుణంగా చంపేశారని, ఇందుకు ఒక విదేశీ ఉగ్రవాద సంస్థ చాలా పకడ్బందీగా కుట్ర పన్నిందని హోం శాఖ తన లేఖలో తెలిపింది. ఈ హత్య కారణంగా దేశంలో ప్రజాస్వామ్య వ్యవస్థ కూడా స్తంభించిందని, కొన్ని రాష్ట్రాల అసెంబ్లీ, లోక్‌సభ ఎన్నికలుకూడా వాయిదాపడ్డాయని తెలిపారు. ఈ కేసులో దోషులు వి. శ్రీహరన్ అలియా స్ మురుగన్, టి. సుతేంద్రరాజా అలియాస్ శాంతన్, ఎ.జి. పెరారివాలన్ అలియాస్ అరివు, జయకుమార్, రాబర్ట్ పయస్, పి. రవిచంద్రన్, నళినిలకు 25ఏళ్ల జైలుశిక్ష విధిం చారు. మురుగన్, శాంతన్, పెరారివాలన్‌లకు విధించిన మరణశిక్షను 2014 ఫిబ్రవరి 18న సుప్రీంకోర్టు జీవితఖైదుగా మార్చింది. ఆ తర్వాత కూడా పలు పరిణామాలు జరిగాయి. ఏడుగురు దోషులకు శిక్షను మాఫీ చేయడంపై కేంద్ర ప్రభుత్వ అభిప్రాయం కోరుతూ 2014 ఫిబ్రవరి 19న జయలలిత ప్రభుత్వం ఓ లేఖ రాయడం, దానికి సమాధానం ఇవ్వడానికి బదులు ఇలాంటి విషయాల్లో తుది నిర్ణయం తీసుకోవాల్సింది తామే గానీ రాష్ట్ర ప్రభుత్వం కాదని కేంద్రం చెప్పడం లాంటివి జరిగాయి. ఆ తర్వాత సుప్రీంకోర్టు ఏడుగురు దోషుల విడుదలపై స్టే విధించి, కేసు ను ఐదుగురు న్యాయమూర్తులతో కూడిన రాజ్యాంగ ధర్మాసనానికి నివేదించింది. 



నేరచరితుల పోటీని అడ్డుకోవాల్సిందే

Updated By ManamThu, 08/09/2018 - 23:22
  • ఆ అవసరం ఉంది: సుప్రీంకోర్టు

supreme-courtన్యూఢిల్లీ: తీవ్రమైన నేరారోపణలు ఉన్న వ్యక్తులను ఎన్నికల్లో పోటీ చేయకుండా నిలువరించాలంటూ దాఖలైన పిటిషన్‌పై సుప్రీంకోర్టు బుధవారం విచారణ జరపింది. చీఫ్ జస్టిస్ జస్టిస్ దీపక్ మిశ్రా నేతృత్వంలో జస్టిస్ ఆర్‌ఎఫ్ నారిమన్, జస్టిస్ ఖాన్విల్కర్, జస్టిస్ డీవై చంద్రచూడ్, జస్టిస్ ఇందూ మల్హోత్రాతో కూడిన రాజ్యాంగ ధర్మాసనం పిటిషన్‌ను విచారించింది. ఈ సందర్భంగా కోర్టు తీవ్ర వ్యాఖ్యలు చేసింది. ‘‘నేర చరితులు రాజకీయాల్లోకి రాకుండా చూడాల్సిన అవసరం ఉంది’’ అని కోర్టు పేర్కొంది. అదే సమయంలో కార్యనిర్వాహక వర్గానికి, న్యాయ వ్యవస్థ మధ్య ఓ గీత ఉందని, చట్టాలు చేయాల్సిన పార్లమెంట్  విధుల్లో  కోర్టు జోక్యం చేసుకోదని పేర్కొన్నారు. ‘‘మేం చట్టాలు చేయలే. ఆ హక్కు పూర్తిగా పార్లమెంట్‌దే. రెండింటి మధ్య స్పష్టమైన లక్ష్మణ రేఖ ఉంది. చట్టాలను రూపొందించే అధికారం మాకు లేదు’’ అని ధర్మాసనం అభిప్రాపడింది. చట్టాలు చేసే అధికారం పూర్తిగా పార్లమెంట్‌దేనని, నేరం రుజువయ్యే వరకూ  ఆ వ్యక్తి నిరపరాధి అనే సూత్రాన్ని అనుసరిస్తున్నామని ఈ సందర్భంగా అటార్నీ జనరల్ కేకే వేణుగోపాల్ పేర్కొన్నారు.



కేంద్రం దృష్టికి జస్టిస్ జోసెఫ్ సీనియారిటీ

Updated By ManamTue, 08/07/2018 - 00:21

supreme-courtన్యూఢిల్లీ:  జస్టిస్ కేఎం జోసెఫ్ భవిష్యత్‌లో ప్రధాన న్యాయమూర్తి కాకుండా మోకాలడ్డేలాంటి చర్యలకు కేంద్ర ప్రభుత్వం పాల్పడిందన్న ఆరోపణలు మిన్నంటుతున్నాయి.  ఇందులో భాగంగా అదేపనిగా జస్టిస్ జోసెఫ్ సీనియారిటీని తక్కువ చేసి చూపుతూ నోటిఫికేషన్‌లో పేర్కొనడంపై కొలీజియం సభ్యులైన జడ్జిలు బాహాటంగా అసంతృప్తి వ్యక్తంచేస్తున్నారు. ఈమేరకు ప్రధాన న్యాయమూర్తి జస్టిస్ దీపక్ మిశ్రాను కలిసి, ముగ్గురు జడ్జీలు ప్రమాణస్వీకారం చేసేలోపు ప్రభుత్వ జాబితాలో మార్పులు చేయాలని ఒత్తిడి తీసుకువచ్చారు. దీంతో మొత్తం వ్యవహారాన్ని కేంద్ర ప్రభుత్వం దృష్టికి తీసుకెళ్లనున్నట్టు ప్రధాన న్యాయమూర్తి జస్టిస్ దీపక్ మిశ్రా పేర్కొన్నారు. ఈ అంశంపై అటార్నీ జనరల్‌ను కూడా సంప్రదించనున్నట్టు సీజేఐ వెల్లడించారు. మంగళవారం కొత్త జడ్జిల పదవీప్రమాణ స్వీకారం జరుగనుండగా మరోమారు జస్టిస్ జోసెఫ్ విషయం వివాదాస్పదమవుతోంది.  జస్టిస్ జోసెఫ్ పేరును జాబితాలో 3వ స్థానంలో పేర్కొంటూ కేంద్రం శనివారం నోటిఫికేషన్ జారీచేయడంతో మరోమారు వివాదం రాజుకుంది.  కొలీజియం జాబితాలో మొదటి స్థానంలో జస్టిస్ జోసెఫ్ పేరుండగా ఆతరువాతి స్థానాల్లో జస్టిస్ ఇందిరా బెనర్జీ, జస్టిస్ వినీత్ సరన్‌ల పేర్లున్నాయి. నిబంధనల ప్రకారం ఈ జాబితాలోని ప్రాధాన్యతా క్రమంలో మార్పు చేయకూడదు కానీ కేంద్రం మాత్రం ఈ క్రమంలో మార్పులు చేసింది.  దేశవ్యాప్తంగా న్యాయమూర్తుల సీనియారిటీ జాబితాలో జస్టిస్ జోసెఫ్ 45వ స్థానంలో ఉన్నారు. ఇతర రాష్ట్రాల నుంచి సుప్రీంకోర్టుకు తగిన ప్రాతినిధ్యం లేదన్న సాకుతో జస్టిస్ జోసెఫ్ పేరును కొలీజియం ప్రతిపాదించినా కేంద్రం తిరస్కరించింది. కానీ రెండవసారి కూడా ఆయన పేరునే కొలీజియం ప్రతిపాదించడంతో తప్పనిసరి పరిస్థితుల్లో జోసెఫ్ పేరును కేంద్రం ఆమోదించాల్సివచ్చింది. దీంతో మిగతా ఇద్దరు జడ్జిల కంటే ఆయన్ను జూనియర్‌గా చూపుతూ కేంద్రం నోటిఫికేషన్ జారీచేసింది.



సుప్రీంకు ‘ముజఫర్‌పూర్’ కేసు

Updated By ManamThu, 08/02/2018 - 23:20
  • బిహార్ ప్రభుత్వానికి నోటీసులు 

  • బాధితుల ఫొటోలు చూపరాదని మీడియాకు న్యాయస్థానం ఆదేశం

  • ఆశ్రమంలో బాలికలపై రేప్ ఘటన

supreme-courtన్యూఢిల్లీ: దేశవ్యాప్తంగా ఆందోళన రేకెత్తించిన బిహార్‌లోని ముజఫర్‌పూర్ అత్యాచార ఘటన కేసును సుప్రీం కోర్టు విచారణకు స్వీకరించింది. గురువారం న్యాయస్థానం బిహార్ ప్రభుత్వానికి, మహిళా శిశు సంక్షేమ మంత్రిత్వ శాఖకు నోటీసు జారీ చేసింది. అత్యాచారానికి గురైన చిన్నారుల ఫొటోలను, మార్ఫ్ చేసినవి కూడా మీడియా ప్రచురించరాదని ఆదేశించింది. చిన్నారుల ఫోటోలను బ్లర్ చేసి ఎలక్ట్రానిక్, ప్రింట్ మీడియా వాడటాన్ని కోర్టు ఆక్షేపించింది. ఇటీవల ముజఫర్‌పూర్‌లో ఓ ఎన్జీవో నడుపుతున్న బాలికల పునరావాస ఆశ్రమంలో ఉన్న పలువురు మైనర్ బాలికలను తీవ్రం హింసించి, అత్యాచారం చేసిన ఘటన వెలుగు చూసిన సంగతి తెలిసిందే. రాజకీయ నేతలు, ఆశ్రమం ఉద్యోగులు దారుణానికి పాల్పడినట్టు ఆరోపణలు వచ్చాయి. తమను లైంగికంగా వేధించి, అత్యాచారం చేశారని 7- 17 ఏళ్ల బాలికలు అధికారులకు ఫిర్యాదు చేశారు. రోజూ భోజనంలో తమకు మత్తు పదార్థాలు కలపి, రాత్రి పూట అఘాయిత్యా లకు పాల్పడేవారని చెప్పారు. ఎదురు తిరిగినవా రిని ఆశ్రమం ఉద్యోగులు చిత్రహింసలు పెట్టేవార ని చెప్పారు. ఆశ్రమంలో కనీసం 34 మంది బాలికలు అత్యాచారానికి గురైనట్టు వైద్య నివేదిక లో తేలింది. ఇదిలావుండగా ముజఫర్‌పూర్ అత్యా చార ఘటనను ఖండిస్తూ వామపక్షాలు, ఆర్జేడీ బిహార్ బంద్ చేపట్టాయి. ముఖ్యమంత్రి నితీశ్ కుమార్ రాజీనామా చేయాలని డిమాండ్ చేశాయి.



సుప్రీం విచారణల ప్రత్యక్షప్రసారం

Updated By ManamMon, 07/23/2018 - 22:44
  • ప్రస్తుతానికి తాత్కాలిక ప్రాతిపదికనే

  • సీజే వినే రాజ్యాంగ విచారణలు మాత్రమే

  • సుప్రీంకోర్టుకు తెలిపిన ఏజీ వేణుగోపాల్

supreme-courtన్యూఢిల్లీ: న్యాయ విచారణలను ప్రత్యక్ష ప్రసారం చేయడాన్ని ముందుగా తాత్కాలిక ప్రాతిపదికతో మొదలుపెట్టవచ్చని సుప్రీంకోర్టుకు కేంద్రం తెలిపింది. ఇందుకోసం ముందుగా ప్రధాన న్యాయమూర్తి వినే రాజ్యాంగ సంబంధిత విచారణలను మాత్రమే వీడియో రికార్డింగ్ చేసి, ప్రత్యక్ష ప్రసారం కూడా చేయచ్చని ప్రధాన న్యాయమూర్తి జస్టిస్ దీపక్ మిశ్రా నేతృత్వంలోని ధర్మాసనానికి అటార్నీ జనరల్ కేకే వేణుగోపాల్ తెలిపారు. ఈ విషయంలో కోర్టు ఆయన సాయం కోరింది. తొలుత దీన్ని పైలట్ ప్రాజెక్టుగా ప్రారంభించి, ఆ తర్వాత విశ్లేషించి అపుడు మరింత సమర్థంగా పూర్తిస్థాయిలో అమలు చేయచ్చని ఏజీ వివరించారు. సాంకేతికంగా ప్రత్యక్ష ప్రసారాలు ఎంత బాగా వస్తున్నాయో ఒకటి నుంచి మూడు నెలల పాటు చూసుకున్న తర్వాత దాన్ని శాశ్వత ప్రాతిపదికన అమలు చేయచ్చని తెలిపారు. ఇదే అంశంపై వ్యక్తిగత హోదాలో ప్రజాహిత వ్యాజ్యం దాఖలు చేసిన సీనియర్ న్యాయవాది ఇందిరా జైసింగ్ సహా అన్ని పార్టీలనూ అటార్నీ జనరల్‌కు ఈ విషయంలో సలహాలు ఇవ్వాలని జస్టిస్ ఏఎం ఖాన్విల్కర్, జస్టిస్ డీవై చంద్రచూడ్‌లతో కూడిన ధర్మాసనం తెలిపింది. అన్ని సూచనలు, సలహాలను వేణుగోపాల్ క్రోడీకరించి వాటిని కోర్టుకు సమర్పిస్తే, దాన్ని తాము ఆమోదిస్తామన్నారు. కేసు తదుపరి విచారణను ఈనెల 30వ తేదీకి వాయిదా వేశారు. కోర్టు విచారణల ప్రత్యక్ష ప్రసారాలు ఇప్పుడు చాలా అవసరమని, ఈ విషయంలో అందరి సలహాలు, సూచలను తీసుకుంటామని జూలై 9వ తేదీన జరిగిన విచారణలో కోర్టు తెలిపింది. అత్యాచారాల్లాంటి కొన్ని కేసులలో తప్ప, మిగిలిన అన్నింటి ప్రత్యక్ష ప్రసారాలకు అనుమతించేందుకు ఎలాంటి అభ్యంతరం ఉండకపోవచ్చని కోర్టు తెలిపింది. రాజ్యాంగ, జాతీయ ప్రాముఖ్యత కలిగిన కేసుల విచారణను ప్రత్యక్ష ప్రసారం చేయాలని సీనియర్ న్యాయవాది ఇందిరా జైసింగ్ తన ప్రజాహిత వ్యాజ్యంలో కోరారు. వాటి గురించి తెలుసుకునే హక్కు ప్రజలకు ఉందని ఆమె తెలిపారు. పాశ్చాత్య దేశాలలో ఇలా ప్రత్యక్ష ప్రసారాలు ఇప్పటికే అమలులో ఉన్నాయని, యూట్యూబ్‌లో కూడా ఆ వీడియోలు పెడతారని ఆమె చెప్పారు. కుటుంబాలకు సంబంధించిన కే సులు, క్రిమినల్ లా కేసులు, నేరపరమైన అంశాలలో సాక్షుల వాంగ్మూలాలను కాపాడాల్సి వచ్చినపుడు.. ఇలాంటప్పుడు వాటికి మినహాయింపు ఇవ్వచ్చని ఆమె సూచించారు. ఇదే అంశంపై జోధ్‌పూర్‌లోని నేషనల్ లా యూనివర్సిటీ విద్యార్థి స్వప్నిల్ త్రిపాఠీ కూడా ఒక పిటిషన్ దాఖలు చేశారు. 





Related News