ముసురుతో రైతుకు మురిపెం

Updated By ManamThu, 07/12/2018 - 07:05
mulugu
  • వాగులు పొంగుతున్నయ్... చెరువులు దుంకుతున్నయ్

  • ప్రాజెక్టుల్లోకి భారీగా నీరు.. ఊపందుకోనున్న యవుసం

muluguహైదరాబాద్: రాష్ట్రమంతటా మస్తు వానలు పడుతున్నయ్.. రైతు కండ్లల్లో ఆనందం వెల్లి విరుస్తోంది. ఖరీఫ్ సీజన్ ప్రారంభమైనా.. సకాలంలో వరుణుడు కరుణిం చకపోవడం, కాలం కరిగిపోతుండడంతో రైతాంగం అయోమయ స్థితిలో పడిపోయింది. కానీ నాలుగైదు రోజులుగా రాష్ట్రంలో ముసురుపెడుతోంది. చురుగ్గా కదులుతున్న నైరుతి రుతుపవనాలు, బంగాళాఖాతంలో ఏర్పడిన అల్ప పీడనం కారణంగా తెలంగాణలో విస్తారంగా వానలు పడుతున్నయ్. భారీ వర్షాలకు రాష్ట్రంలోని పలు జిల్లాల్లో వాగులు వంకలు పొంగిపొర్లుతున్నయ్. ప్రాజెక్టుల్లోకి భారీగా నీరు చేరుతోంది. రాష్ట్రవ్యాప్తంగా చెరువులు మత్తడులు దుంకుతున్నయి. దీంతో రైతాం గం కండ్లల్లో ఆనందం వెల్లివిరుస్తోంది.ప్రస్తుతం తెలంగాణ వ్యాప్తంగా కురుస్తున్న వర్షాలకు రైతులతో పాటు అధికారులు ఊపిరి పీల్చుకుంటున్నారు. రాష్ట్ర ప్రభుత్వం ఆదేశాలతో వ్యవసాయానికి కావాల్సిన అన్ని ఏర్పాట్లను అధికారం యంత్రాంగం సిద్ధం చేసిపెట్టింది. విత్తనాలు, ఎరువులు, రసాయన మందులు, బ్యాంకుల్లో పంట రుణాల ప్రణాళిక వంటి అన్ని విషయాల్లో అధికారులు రైతులకు ఎలాంటి ఇబ్బంది కలగకుండా ముందుకుసాగారు. రాష్ట్ర ప్రభుత్వం ప్రతిష్టాత్మకంగా అందజేసిన పెట్టుబడి సొమ్ము ఎకరాకు రూ.4వేలు విజయవంతం రైతులకు చేరవేశారు. ఇక ఖరీఫ్ ఊపందుకుంటుందన్న తరుణంలో వరుణుడు ముఖం చాటేశాడు. దాంతో పంటల సాగులో రైతులకు ఇబ్బందులు ఎదురుకావొద్దన్న ఉద్దేశంతో ఎంతో కష్టపడి పనిచేస్తుంటే.. వానలు సకాలంలో పడకపోవడంతో అధికారులు ఒకింత ఆందోళనకు గురయ్యారు. రుతుపవనాల కారణంగా రాష్ట్రంలో విస్తారంగా వర్షాలు కురుస్తుండడంతో అధికారులు సంతోషిస్తున్నారు. రెండుమూడు రోజులుగా కురుస్తున్న వర్షాలకు వాగులు, వంకలు పొంగిపొర్లుతున్నాయి. ప్రాజెక్టుల్లోకి సైతం నీరు భారీగానే చేరుకుంటోంది. పలు జిల్లాల్లో లోతట్టు ప్రాంతాలు జలమయంకావడంతో ప్రజలు ఇబ్బందులు పడుతున్నారు. తెలంగాణలోని పలు ప్రాంతాల్లో వర్షాలు కురుస్తుండడంతో చిన్న చిన్న చెరువులు నిండి ఇప్పటికే అలుగు(మత్తడి) పోస్తున్నాయి. పెద్దపల్లి శ్రీపాద ఎల్లంపల్లి రిజర్వాయర్‌లో నీటి నిల్వ ఎనిమిది టీఎంసీలకు చేరింది. తాలిపేరుకు భారీగా వరద వస్తుండడంతో నాలుగు గేట్లను ఎత్తి నీటిని కిందకు వదులుతున్నారు. కిన్నెరసాని ప్రాజెక్టు పరిస్థితి ఇదే. వర్షాల కారణంగా సింగరేణి ఓపెన్ కాస్ట్ గనుల్లో బొగ్గు ఉత్పత్తి నిలిచిపోగా, దాదాపు 80 వేల టన్నుల బొగ్గు ఉత్పత్తికి అంతరాయం కలిగింది.

ఒక్కరోజులో నాలుగున్నర అడుగులు..
ఇదిలావుంటే.. మహారాష్ట్రలో కురుస్తున్న వర్షాలకు గోదావరి నదిలో వరద ఉధృతి అంతకంతకూ పెరుగుతోంది. గోదావరి నదిలో నీటిమట్టం భద్రాచలం వద్ద నిన్న 26 అడుగులు ఉంటే.. బుధవారం ఉదయం సమయానికే 30.6 అడుగులకు చేరింది. మధ్యాహ్నం సమయానికి ఇది 31 అడుగులకు చేరుకుంది. వర్షాలు భారీగా కురుస్తుండడంతో రాత్రి సమయానికి ఇది ఎక్కువ అవుతుందని అంచనా. 40అడుగుల నీటి మట్టానికి చేరుకుంటే.. వీలిన మండలాలు ముంపునకు గురికానున్నాయి. ఇప్పటికే ఈ మండలాల్లో విద్యా సంస్థలకు సెలవులు ప్రకటించారు. గోదావరి నదిపై నిర్మిస్తున్న ప్రాజెక్టుల పనులను వరద నీటి కారణంగా తాత్కాలికంగా నిలిపివేశారు.


ఖరీఫ్ సీజన్‌లో ఇప్పటిదాకా కురిసిన  వర్షపాతం (మిల్లీమీటర్లలో..)
జిల్లా                                 సాధారణ                    ఈ సీజన్‌లో 
                                                                       వర్షపాతం కురిసింది
సూర్యాపేట                            50                              30.0
యాదాద్రి                            153.2                          138.2
నల్లగొండ                           132.3                           128.9
ఖమ్మం                             192.7                           288.8
వరంగల్ రూరల్                  448.1                           197.9
జనగామ                          260.3                           185.3
మహబూబాబాద్                187.2                           248.0
వరంగల్ అర్బన్                 889.45                         218.0
నిజామాబాద్                    251.1                           304.5
కామారెడ్డి                        240.8                           224.1
ఆదిలాబాద్                     293.9                           482.5
ఆసిఫాబాద్                     280.1                           483.0
నిర్మల్                          280.7                           322.2
మంచిర్యాల                    286.4                          382.7
మహబూబ్‌నగర్             123                             157.0
నాగర్‌కర్నూల్                113                             109.0
గద్వాల                        93.1                            107.3
వనపర్తి                       111.72                           97.0
కరీంనగర్                     257.2                          195.0
సిరిసిల్ల                        222.8                          203.5
జగిత్యాల                     284                             362.4
పెద్దపల్లి                       245.7                          358.9
సంగారెడ్డి                    67.5                             41.5
వికారాబాద్                 261.8                          169.0

Tags
English Title
Mushroom farmer




Related News